¿ISHETO ca lʼataxanactac ñi Dios ra nasoqchigue ye noʼon lataxac ra huaigui ca aloic? ¿Qaq ra qaica ca naigui ye lʼañaxataxac? So shiỹaxaua lʼenaxat Job taqaʼen huaigui so aloic. Semetenac cam ʼeeteco coʼolloxoche reʼera.

So Job lauolʼec so Abrahán nache lmaʼ ye aʼlhua nagui lʼenaxat Arabia, huaʼuchigui coʼolloxoche so israelitapi ñaq netaña ye Egipto. Nache huoʼo so naʼaq reʼera piguem Ñi Dios laponat na lamaxashecpi, nache taqaʼen ỹalectauo so Satanás, nache Ñi Dios ỹachaʼaxatac ra noʼon lataxac so Job, qaica ʼeetaʼam. Qalaxaye so Satanás lʼaqtac ra ỹalaxaguet ñi Dios so Job chaʼaye ỹami ra lsallaxa qataq iloʼogue ra nachaalataxac. Nache ʼenapecoʼ ra huaigui ca aloic so Job nache ỹalaq ra ỹamaqteetac Ñi Dios.

Nache Ñi Dios ỹauaxaỹa so Diablo ra ỹoʼot so lachoxoyec so Job, qataq ralataxañigui so llalacpi, taqaʼen ỹasaxalec so leguemaxaic nʼuetaxanaxa so maye. Nache so Job saq noma ra nacheso so Satanás ra ỹoʼot ra huaigui so salaxaic nquejnaxac, nache maiche naqtaxatapeguela so maye ra taʼencoʼ ñi Dios ra ỹaxatec ra lachoxoyec, qalaxaye naiʼtaxa ra huoʼo ye lachoxoyec qalaxaye sa ishet ra ỹalat ye lʼamqajtaxanaxac.

Nache ivitʼteua so Job soua tres ʼeetegalo nauochaxauʼ so maye, nache so mayepi huotaique ra qaỹañoxot so Job ra huoʼo ca lasouaxasheʼt ỹoqoʼoye Ñi Dios nache ỹasaxac ra huaigui ye aloic. ¡Qalaxaye reʼera sa ishet ʼeesa! Taqaʼen qoitega so maye ra Ñi Dios saq itenʼa na lataxanatacpi qataq sa ishet peʼetega na mayepi. Qalaxaye so Job saỹamaqten ra lʼaqtac so mayepi, nache ʼenapecoʼ so maye ra nache quichiguiñe ra l-leuaxa ra saq ỹaxanec ye noʼon lataxac.

Qalaxaye so Job huoʼo ra npeʼen chaʼaye ỹaxaqanauec ye maiche lliʼoxoyec. Huoʼo so nsoq lʼenaxat Elihú naxaỹaxatac coʼollaxa nache ʼenapega so Job ra taʼencoʼ ra ỹapaxaqcheetac ra maiche lliʼoxoyec qaica ra imatalec ra lliʼoxoyec ñi Dios qataq ra imatot ra ỹalaxaguet ra lamaxasoxonaxac ñi maye. Nataqaʼen nache nlaxa soua ʼeetegalo ra nauochaxauʼ so Job.

Nache nataqaʼen Ñi Dios maiche ỹachaxana ye sa ỹaỹaten so Job, nache rogoxona na ỹottaʼaʼt lʼonatacpi ñi maye yaqto nache ỹaỹaten ra qaica ca shiỹaxaua ʼeetaʼam ra lliʼoxoyec ñi Dios. So Job sa ishet ra nʼamaqajnaxaic ỹoqoʼoye ishet ra ỹalaq coʼolloxoche qaiapaxaguenec ye sa ỹaỹaten. Chaʼaye Ñi Jehová, “ỹataqta soxoraic qataq choxonnataxanaxaic”, nache nqat so lʼuetaxanaxa qataq ỹiʼiguelaxalec ra nquigueec ra lsallaxa qataq ỹanem ra ỹoltaxa rcoʼoi so diez llalacpi ralaxaicpi (Santiago 5:11 DNS). Ra noʼon lataxac so Job nache ỹachaxana so Satanás ra ʼeetaʼ: na shiỹaxauapi ishet ra ỹalaxaguet Ñi Dios nʼaiqtaxa ra huaigui ca aloic.

(Qaỹachigoxotaña ye nere huetalec so Job.)