«Chaʼaye nache ʼam [ñi Dios] huetoʼot ra ncaʼalaxa» (Salmo 36:9). ¿ʼAuʼamaqten reʼera? Huoʼo na shiỹaxauapi iʼamaqten ra qaica ca ỹoʼot ra ncaʼalaxa, maiche ʼoonole ra huoʼo. Ra qaica ca lʼonatac ʼenauacna ra ỹoqta ʼeesa reʼera choche sonaqtaina, nache ra qarcaʼalaxa qaica ca naigui. Qalaxaye, ram ñi Jehová ỹoʼot ra ncaʼalaxa, neʼena iuen ra huoʼo ra ʼeetapeguec, ¿ʼeesa? a ʼAnmit ra nʼaqtaguec huetalec aye la Biblia maye iʼaxat ra chigoqchigui ra ncaʼalaxa qataq ʼameten táʼaencoʼ ra ỹaỹamaqchiguiñi.

1. ¿Négueʼt ca chigoqchigui na universo?

Aye la Biblia ʼenapec: Ñi Dios «coʼollaq chetaʼague da ỹoʼotna, nache ỹoʼot na piguem qataq ana ʼalhua» (Génesis 1:1). Qalota na científicopi iʼamaqten ra na universo huoʼo ca chigoqchigui. ¿ʼEetec ra ỹoʼot ñi Dios na universo? Ñi maye roʼogoxona «so Saqchaʼa Laʼañaxac» -so espíritu santo- yaqtoʼ ỹoʼot ʼenauac na huetaigui na universo: galaxiapi, huaqajñepi qataq planetapi... (Génesis 1:2).

2. ¿Táʼaencoʼ ñi Dios ỹoʼot ana ʼalhua?

Ñi Jehová «ñim ỹoʼot coʼollaxa [ana ʼalhua] qalaxaye saishet da huotaique da quiʼittelec, nacherata da huoʼo cam netalec anamaye» (Isaías 45:18). Ñimaye ỹoʼot ana ʼalhua ʼonaxai qataq nalochiguiñe yaqtoʼ chochaq tateec ra lmaʼ na shiỹaxauapi (ʼautaxaỹaxan Isaías 40:28 taq 42:5). Na científicopi ʼenapec ra ana ʼalhua qaica ca ʼenaʼam. Taqaʼen saishet ra qaỹauatton ca lỹa planeta ra ishet ra netalec na shiỹaxauapi.

3. Na shiỹaxauapi, ¿táʼaencoʼ ra saishet ra ʼenaʼam na shiguiỹacpi?

Coʼollaxa ime ra ỹoʼot ana ʼalhua, ñi Jehová ỹoʼot ʼenauac na ncaʼaltauec huetalec anamaye. Huaʼauñe, nlaxatalec ana ʼAlhua na nanguishecpi qataq na shiguiỹacpi. Qaq ime, ñi Dios «ỹoʼot so shiỹaxaua, ỹeʼenaxatchigui da maiche lataxac Ñimaye» (ʼautaxaỹaxan Génesis 1:27). ¿Táʼaencoʼ ra saq shenaqaʼam na shiguiỹacpi? Ñi Dios qomiʼ ỹoʼot ʼenaʼam ra lataxac ñi maye, ỹoqoʼoye ishet ra sachaxanaq ra lataxac, ʼenaʼam ra nauotaxanaqtaic qataq ỹaỹamaxaqchiguiñisat. Ñimaye taqaʼen qomiʼ ỹoʼot yaqtoʼ ishet ra ñapaxaguenaxa na nʼaqtacpi, ñemetenaq na noʼonecpi qataq ʼenauac na ỹataqta ʼonaxaic. Qataq qomiʼ ishet ra shiʼoxorenaq ñi Iʼotapecna, reʼera saq ishet ra ỹoʼot na shiguiỹacpi.

 5. Ra nʼaqtaguec huetalec ana la Biblia so qaỹoʼot ʼenauacna ỹataqta ỹaỹamaqchiguiñi

6. Na shiỹaxauapi saishet ra ʼenaʼam ca lỹa lʼonatac ñi Dios

Qomiʼ saishet ra shenaqaʼam na shiguiỹacpi. Qautaxaỹaxañi Génesis 1:26 qataq qaumalligui neʼena:

• Qomiʼ na shiỹaxauapi ishet ra sachaxanaq ra nsoxoyec qataq nchoxonnataxanaxa chaʼaye shenaqaʼam ra lataxac ñi Dios. ¿Négueʼt ca ʼam ỹapaxaguenec reʼera ra lataxac ñi Jehová?

 NA ʼAMAQTAQAIC

Ñi Jehová ỹoʼot na universo qataq ʼenauac na ncaʼaltauecpi huetaigui namaye.

ʼAntoueetaʼac

• ¿Négueʼt ca rapaxaguenataxanec aye la Biblia na chigoqchigui na universo?

• ¿Ỹaxaneec ñi Dios ra ca ʼoonole célula ñigui na ỹottaʼaʼt ncaʼaltauecpi, qoʼ nachiñi ñimaye ỹoʼot ʼenauac?

• ¿Táʼaencoʼ na shiỹaxauapi napacalec ca lỹa lʼonatacpi ñi Dios?