PAXAGUENAXAT 09

Ra atamnaxac ỹoʼot ra ʼanquigot ñi Dios

aỹeglaxattague

¿Huoʼo ye huaña ʼananomteguet ra ʼauen ca ỹauecaʼaguet ra ʼanachaalataxac? ¿Huoʼo ca ʼannataxac ʼamaqtaqaic saxanaxa ra ʼauanata ca lasataxac? ¿ʼAuen ra ʼam qaỹaʼañaqchet? ¿ʼArauela ra nquiguec ra ʼanquigot ñi Jehová? Na atamnaxac ʼam itauan ra ʼampaxajlec ʼenauac neʼena ʼananomteguetpi. Qalaq, ¿ʼeetec iuen ca lataxac ra atamnaxac? ¿Naxaỹaxana ñi Dios ʼenauac na atamnaxacpi? ¿Négueʼt ca ishet ra ʼauʼot ʼam yaqtoʼ ñi Dios naxaỹaxana na ʼanatamnaxacpi? Semetenaq.

1. ¿Négueʼt ca iuen ra ñatamnaqot? ¿Négueʼt ca ishet ra saʼaxataq ra ñatamenaq?

So Jesús rapaxaguenataxanec ra iuen ra ñatamnaqot ʼoonolec ñi Qartaʼa piguem lʼec. So maye natameetecot ñi Jehová. Huoʼo so huaña ʼenapec: «Qaq ỹoqoʼoyi da qanqouagaxauñi, qalaq qoñiitaʼ: ʼAm qadtaʼa Dios mayi qonetoʼot na piguem...» (Mateo 6:9, TBSNT). Ra ñatamnaqot ñi Jehová, nache ra qanauochaxac ñimaye nquiguishiguem.

Ra ñatamenaq nache ishet ra saʼaxataq camachaqca. Qalaq, ra sauoqtaique ra ñi Dios qomiʼ ỹasategueta, nache saishet ra sequiguioqoʼot ca saỹaỹamaxaren ñimaye. Aye la Biblia ʼenapec ra ishet ra «seỹaxanqaique ca ỹaỹamaxadeeta ñimayi, qalaq ishit da qomiʼ huaʼaxaỹalo» (1 Juan 5:14, TBSNT). So Jesús ỹan so naloqnaxanaxatpi na ishet ra seỹaxanqaique ra ñatamenaq (ʼautaxaỹaxan Mateo 6:9-13). Taqaʼen ishet ra saʼaxataxam na maiche qomiʼ huaigui, saishet ra secouaqaʼai ra sanqot ra qanachec na ỹoʼot ñi Dios souaxat qomiʼ qataq seỹaxanqot ra itauan na laỹi shiỹaxauapi.

2. ¿ʼEetec ra iuen ra lataxac ra qanatamnaxac?

Aye la Biblia qomiʼ ỹanem neʼena nỹaxanaxac: «ỹataqta qaumachiỹoʼot da qarquiyaqteỹaxaqui da qanatamñiitacot» (Salmo 62:8). Nache na qanatamnaxacpi iuen ra chigoqchigui añi qarquiyaqte. Ishet ra alam qoʼ saq alam ra ñatamenaq. Qataq ishet ra ñachataqtañi, ñisonaqtañi qoʼ saqriñe ñiua qar-llicte, ra ʼamaqtaqaic ra ỹachaxan ra ʼenec ñi Jehová. Taqaʼen ishet ra camachaqca laloqoʼ ca naʼaq qataq ca huaʼague ra ñatamnaq.

3. ¿ʼEetec ra ỹasateguet ñi Dios na qanatamnaxacpi?

Ỹottaʼaʼt ca roʼogoxona ra ỹoʼot reʼera. Huoʼo ye huaña roʼogoxona ye Lʼaqtac la Biblia yaqtoʼ ỹasateguet na qannataxacpi. Ra qaitaxaỹaxan ye Lʼaqtac ñi Dios nache «ỹoʼot da ỹaanaxanaxaic ca shiỹaxaua huesota da lataxac» (Salmo 19:7; ʼautaxaỹaxan Santiago 1:5). Qaq ra huoʼo ca qanqalanaxacpi, ñi Jehová ishet ra qomiʼ ỹanem ra nlagaxayec. Qataq ishet ra roʼogoxona na nsiervopi yaqtoʼ qomiʼ itauan qom huoʼo ca seuenaq.

ÑIMITAQ RA PAXAGUENAXAT

Semetenaq ʼeetec ishet ra soʼotaq ra atamnaxacpi chigoqchigui añi qarquiyaqte ỹaỹamaxareeta ñi Dios qataq ʼeetec na atamnaxacpi ishet ra qomiʼ itauan.

4. Na qaiỹaxanaique yaqtoʼ qanatamenot ñi Dios

¿Négueʼt ca iuen ra soʼotaq yaqtoʼ ñi Dios ỹaconguet na qanatamnaxacpi? Qaumichiñi na VIDEO.

VIDEO: ¿Huaʼaxaỹa ñi Dios ʼenauac na atamnaxacpi? (fragmento) (2:42)

Ñi Jehová huotaique ra ndotec ñatamnaqot ñimaye. Qautaxaỹaxañi Salmo 65:2 qataq qaumalligui neʼena:

¿ʼAuʼamaqten ra ñi Dios maye huaʼaxaỹa ra qouagaxaunaxac huotaique ra ʼam ʼanatamenot? ¿Táʼaencoʼ ra nachi ʼeetec ra ʼarcuennataxac?

Ra sauoqtaique ra ñi Dios nʼaxaỹaxana na qanatamnaxacpi, seuenaq ra ñaʼañaxataq ra qolaxague na namaxasoxonaxacpi. Qautaxaỹaxañi Miqueas 3:4 qataq 1 Pedro 3:12, qataq qaumalligui neʼena:

¿ʼEetec ishet ra saỹatenaq ra ñi Dios huaʼaxaỹa na qanatamnaxacpi?

Ishet petaʼa ra dos caua ejércitos iỹaxanot ñi Dios ra rauegaxan ca nalaataxac. ¿Ỹaỹamaqchiguiñi ra secuennataxanaxa ra ñi Dios ỹasateguet neʼena atamnaxacpi?

5. Na qanatamnaxacpi iuen ra chigoqchigui añi qarquiyaqte

Qalota na qaỹapaxaguenec ra iuen ra ntoueetaʼac qataq ỹiʼiguelaxattalec ca atamnaxacpi. Qalaq neʼena atamnaxacpi ¿lauela ñi Dios? Qautaxaỹaxañi Mateo 6:7 [TBSNT], qataq qaumalligui neʼena:

¿Négueʼt ca ishet ra soʼotaq yaqtoʼ saishet ra sheʼeguelaxasoqtalec ca qarʼaqtaqa «maye qaica ca naigui» ra ñatamenaq?

¿Ishet ra ʼacuennate ye naʼaq ca ʼonaxaic ʼam huaigui, ime nache ʼauanot ra nʼachec ñi Jehová souaxat reʼera? Ra ʼauʼot reʼera ca la semana, nache saishet ra ʼaviʼiguelaxattalec na ʼanasaxauec ra ʼanatamen.

Ca noʼon ntaʼa huotaique ra ca llalec demalle chigoqchigui añi lquiyaqte. Ñi Jehová ʼenaʼam huotaique ra na qanatamnaxacpi chigoqchigui añi qarquiyaqte.

6. Ra atamnaxac lachetaqtaxanaxat ñi Dios

¿ʼEetec ra qomiʼ ỹanem ca qarʼañaxac ra atamnaxac qom souaqaigui ca qanqalanaxacpi ra achaalataxac? Qaumichiñi na VIDEO.

VIDEO: Ra atamnaxac qomiʼ itauan ra ñaʼañaxataxaguet na nqalanaxacpi (1:32)

Ra atamnaxac qomiʼ ỹanem ra ʼeesa nlagaxayec, reʼera ana la Biblia qomiʼ ỹachaxanalo. Qautaxaỹaxañi Filipenses 4:6, 7 qataq qaumalligui neʼena:

Naiʼctaxa ra na atamnaxac saishet ra ỹaỹamaxajñe ʼenauac na qanqalanaxacpi, qalaq ¿ʼeetec ra qomiʼ itauan?
¿Négueʼt ca ʼarauela ra ʼanatamnaique?

ʼAmeten ra

Ra nʼaqtac ʼeetaʼ: amén naigui «ajaʼ nache ʼeetec». Coʼolloxochiye leʼena ra qanasaxauec «ajaʼ nache ʼeetec» ra ime ca atamnaxac (1 Crónicas 16:36).

7. ʼAuʼot ca ʼalraqaʼ yaqtoʼ ʼanatamen

Huoʼo naxa ra ỹaguec na soʼotaq, ỹoqoʼoye secouaqaʼai ra ñatamenaq. ¿ʼEetec ra lmejnaxanaxac so Jesús ra atamnaxac? Qautaxaỹaxañi Mateo 14:23 qataq Marcos 1:35, qataq qaumalligui neʼena:

So Jesús, ¿ʼeetec ra ỹañoxot ra ỹoʼot so lraqaʼ yaqtoʼ natamen?
Qaq ʼam, ¿ʼeetec ishet ra ʼauʼot ca ʼalraqaʼ yaqtoʼ ʼanatamen?

HUOʼO NA NASAXAUEC RA: «Ra atamnaxac qaica ca naigui, chaʼaye qaica ca ʼam nʼaxaỹaxatega».

¿ʼEetec ca ʼarcuennataxac?

NA ʼAMAQTAQAIC

Na atamnaxacpi maye chigoqchigui añi qarquiyaqte ỹoʼot ra ñiquiguioqoʼot ñi Dios. Taqaʼen qomiʼ ỹanem ra nlagaxayec qataq ra nʼañaxac yaqtoʼ ishet ra salaxasoxoguet ñi Jehová.