PAXAGUENAXAT 11
ʼEetec ra ỹataqta ñaqataxauec ra naigui aye la Biblia
¿ʼAcuennataxana ra huotaique ʼannoxosheguem ca noỹic, qaye saq ʼauaỹaten ca ʼauachegoxoqchigui? Yaqtoʼ saishet ra qapatta reʼera ltaʼaraic nʼonataxanaxac, ʼanpootegue ra ʼauʼot. Huaʼ, nache ʼenaʼam ra ntaxaỹaxanataxanaxac aye la Biblia. Petaʼa ʼannajlaʼt: «¿Négueʼt ca sachegoxoqchiguiña?». Neʼena paxaguenaxat semetenaq naua ʼamaqtaqaic nqataxaco ʼam itauan ra ʼantonatan ra ʼautaxaỹaxan taq ʼanapaxaguena aye la Biblia.
1. ¿Táʼaencoʼ ra noʼon ra setaxaỹaxanaq ana la Biblia ʼenauaque naua naʼaxaʼte?
Ca shiỹaxaua ra itaxaỹaxan ʼenauaque naua naʼaxaʼte ana la Biblia, qoʼ «naua lapaxaguenataxanaxaco» ñi Jehová, machiguiñi qataq ỹaỹamaqchiguiñi na ỹoʼot (ʼautaxaỹaxan Salmo 1:1-3). Ra ʼauañoxot reʼera, nache ʼanañaxat ra ʼautaxaỹaxan ye naʼaq naiʼctaxa ra iyetaiʼ ca ʼalraqaʼ. Ra nquiguec ra ʼauauatton ra Lʼaqtac ñi Dios, nache nquiguec ra ʼantonaxac ra ʼautaxaỹaxan.
2. ¿Négueʼt ca ishet ra ʼauʼot yaqtoʼ ʼanqatec ra naigui ra ntaxaỹaxanataxanaxac ana la Biblia?
Yaqtoʼ ỹataqta ñaqataxauec ca naigui ra setaxaỹaxanaq aye la Biblia, iuen ra secuennataxanaxalec na setaxaỹaxanaqtac. Anaʼana nere saishet ra choche qaitaxaỹaxan, taqaʼen seuenaq ra secuennataxanaxalec anamaye (Salmo: 1:2). Ra ʼautaxaỹaxaatac anamaye, nache ʼannajlaʼt: «¿Négueʼt ca aỹem ỹapaxaguenec ñi Jehová neʼenaua versículos? ¿ʼEetec ishet ra salaxaguet neʼenaua? ¿ʼEetec ishet ra soʼogoxona yaqtoʼ setauan ca laỹipi shiỹaxauapi?».
3. ¿ʼEetec ishet ra ʼauʼot ca ʼalraqaʼ yaqtoʼ ʼautaxaỹaxan aye la Biblia?
¿Qalaqaic ra ʼanqatec ca iyetaiʼ ʼalraqaʼ yaqtoʼ ʼautaxaỹaxan aye la Biblia? Reʼera ʼenauac qomiʼ huetoʼot. ʼAnʼañaxat ra ʼaucopitaxanapec naua naʼaxaʼte ra ʼauʼot ca ỹaỹamaqchiguiñi (Efesios 5:16). Ishet ra ʼauañoxot reʼera, ra ʼanqatec ca ʼalraqaʼ ye naʼaq yaqtoʼ ʼautaxaỹaxan aye la Biblia. Huoʼo na nteʼeta ỹacoolec ra itaxaỹaxan aye la Biblia. Ca laỹipi ra requeʼe ye naʼaq laiñi nache ỹoʼot reʼera. Qataq huoʼo na laỹipi ra itaxaỹaxan aye la Biblia na pe. ¿Négueʼt ca noʼon laloqoʼ ʼaushet ʼam?
ÑIMITAQ RA PAXAGUENAXAT
Semetenaq négueʼt ca ishet ra soʼotaq yaqtoʼ qomiʼ naueguelaʼt ra ntaxaỹaxanataxanaxac aye la Biblia. Nagui semetenaq na nqataxacpi qomiʼ itauan ra ỹataqta ñaỹamaxataqta qataq ñaqataxauec ra naigui neʼena paxaguenaxac aye la Biblia.
ʼEnaʼam ra saỹatenaq ra ñitonaqtapeguec ra sacheguenaq na laỹi nallec, ishet ra saỹatenaq ra ñitonaqtapeguec ra setaxaỹaxanaq aye la Biblia.
4. ʼAuaỹaten ʼeetec ra ʼauʼot ca ʼantonaxac ra ʼautaxaỹaxan aye la Biblia
Petaʼa saishet ra saq alaq ra chigoqchigui ra setaxaỹaxanaq aye la Biblia. Qalaxaye, ʼenaʼam ra queuoigui caua naʼaxaʼte qoʼ viʼi ra ñamanaq ca ralaxaic nallec, taqaʼen ishet ra nquictashiguem ra qaryaxa ra setaxaỹaxanaq aye la Biblia. Qautaxaỹaxañi 1 Pedro 2:2 [TBSNT], qataq qaumalligui neʼena:
-
Ra ʼautaxaỹaxan aye la Biblia ʼenauac naua naʼaxaʼte, ¿ʼauʼamaqten ra nquictauec ra ʼaryaxa qataq ra ʼancopita ra ʼautaxaỹaxan?
Qaumichiñi na VIDEO yaqtoʼ qauaỹajñi ʼeetec so nsoxotpi napaxaguena ra ntonatan ra itaxaỹaxan aye la Biblia. Ime, nache qaumalligui neʼena:
-
¿Négueʼt ca nqalanaxacpi napacalec so nsoxotpi seʼeso video?
-
¿Négueʼt ca itauan somayepi yaqtoʼ queta ra itaxaỹaxan aye la Biblia?
-
¿Négueʼt so ỹoʼot somayepi yaqtoʼ ncopita ra itaxaỹaxan aye la Biblia?
Nqataxacpi ʼam itauan:
-
ʼAlcaʼauʼa ca traducción ỹataqteguet qataq ra roʼogoxona naua naʼaqtaqa saq alaq. ʼAviʼiguen ye Traducción del Nuevo Mundo ra huoʼo na maiche ʼarʼaqtaqa.
-
ʼAuacoolec ra ʼautaxaỹaxan ca laỹi aye la Biblia ỹactec ra ʼancopita. ʼAuanata ca nqataxacpi ye tabla «ʼEetec ishet ra ʼauachegoqchiguiña ra ʼautaxaỹaxan ana la Biblia».
-
ʼAuʼan na mashe ʼautaxaỹaxaatac. ʼAuʼogoxona ye tabla: «Laỹiʼ ra saʼan ra setaxaỹaxan ca nere aye la Biblia», huetaigui anaʼana nmejna.
-
ʼAuʼogoxona ye JW Library®. Ra ʼanqajñe ye ʼanteléfono qoʼ ca lỹa, ishet ra ʼautaxaỹaxan qataq ʼanaxaỹaxana aye la Biblia camachaqca qontaʼague.
-
ʼAuʼogoxona ye laỹi seccionpi huetaigui ye Traducción del Nuevo Mundo. ʼAuanata na mapapi, tablapi qataq ca glosario maye ỹoʼot ra nquictashiguem ra ʼancopita ra ʼautaxaỹaxan aye la Biblia.
5. ʼAnaỹamaxataguet ca paxaguenaxac aye la Biblia
Qautaxaỹaxañi Salmo 119:34 qataq qaumalligui neʼena:
-
Ra ʼautaxaỹaxan aye la Biblia qo ʼanaỹamaxataguet ca paxaguenaxac aye la Biblia, ¿táʼaencoʼ ra huoʼo ra naigui ra huaʼauñe ʼanatamen?
¿ʼEetec ishet ra ʼanqatec ca naigui ra paxaguenaxac aye la Biblia? Ra ʼanapaxaguena na paxaguenaxatpi, ʼauañoxot ra qoquegue neʼena nqataxaco:
-
ʼAutaxaỹaxan ʼenauac na parrafopi ye huaʼauñe laỹi na paxaguenaxat.
-
ʼAnmittaique qataq ʼautaxaỹaxan ʼenauac na textopi, qataq ʼanaloqtenguet ra nateeteguet ca ʼanapaxagueetega.
-
ʼAuʼan na nʼaqtacpi ʼamaqtaqaic maye ỹasateguet na nnataxacpi. Reʼera ʼam itauan qom ʼanapaxaguena ca lección, ca ʼam ỹapaxagueetac.
ʼAmeten ra
Na testigopi de Jehová coʼollaxa soʼogoxonaxa na ỹottaʼaʼt traducciones aye la Biblia, qalaxaye llicaʼaxaʼua na Traducción del Nuevo Mundo chaʼaye ỹataqtegue qataq saq alaq naua lʼaqtaqa, qataq huetalec ra lʼenaxat ñi Dios (ʼameten na paxaguenaxat ye jw.org: «Na testigopi de Jehová ¿huoʼo ca maiche na Biblia?»
HUOʼO NA NASAXAUEC RA: «Ra qanapaxaguena aye la Biblia saq yalouaʼa. Qaica ca iraqaʼ, qataq qaica ca iyaxa ra ñapaxaguena».
-
ʼAm, ¿ʼeetec ca ʼarcuennataxac?
NA ʼAMAQTAQAIC
Yaqtoʼ ỹataqta ʼanqatec ca naigui aye la Biblia, ʼauʼot ca ʼaldaqaʼ yaqtoʼ ʼautaxaỹaxan, ʼaiỹaxanot ñi Dios ra ʼam itauan ra ʼauaỹateeteguet na ʼautaxaỹaxaatac qataq ʼanaỹamaxattaguet ca paxaguenaxac aye la Biblia.
ʼAntoueetaʼac
-
¿Négueʼt ca ʼam itauan ra ỹataqta ʼanqatec ca naigui aye la Biblia?
-
¿Négueʼt ca laloqoʼ ye naʼaq ishet ra ʼam ʼoonolec ra yaqtoʼ ʼautaxaỹaxan qataq ʼanapaxaguena aye la Biblia?
-
¿Táʼaencoʼ ra huoʼo ra naigui ra ʼanaỹamaxattaguet ca paxaguenaxac aye la Biblia?
ʼAUANATA CA LỸA
ʼAmeten na nqataxacpi maye ishet ra ʼam itauan ra ỹataqta ʼanqatec ca naigui aye la Biblia.
«ʼAntonatan ra ʼautaxaỹaxan aye la Biblia» (La Atalaya, núm. 1 2017)
ʼAmeten caua tres lataxaco ra ishet ra qaitaxaỹaxan aye la Biblia.
ʼAmeten ʼeetec ra ʼantonatan ra ʼautaxaỹaxan aye Biblia.
ʼAmeten na nqataxacpi ỹan na shiỹaxauapi ra mashe qaỹoqtegue ra itaxaỹaxaatac aye la Biblia.
ʼEetec ra ʼanapaxaguena qataq ʼanqatec ra naigui aye la Biblia (2:06)
