Ra ñi Dios nauotaxanaqtaic, ¿táʼaencoʼ ra ỹoʼot na qauem na nʼamaqtenaxacpi maye ʼeetega ỹiʼoxoren ñi Dios? Chaʼaye namayepi nʼamaqtenaxac saq ʼeesa. Na latenataxanaxacpi qataq na ỹoʼotpi nshepaxanaqchet ra lataxac ñi Dios. ¿ʼEetec ra ỹoʼot reʼera? ¿ʼEetec ra lquiyaqteỹaxac ñi Dios? ¿Négueʼt ca ỹoʼot ñi Dios qome?

1. ¿ʼEetec ra lapaxaguenataxanaxacpi nshepaxanaqchet ra lataxac ñi Dios?

Na nʼamaqtenaxac saq ʼeesa nqochenaxat «dam ʼeesa lataxac mayi chigoqoʼot ñi Dios, chaqdata dam shipegaxanaxac» (Romanos 1:25, TBSNT). Saloqnaxanaxa: qalota namayepi saishet ra ỹapaxaguenec na shiỹaxauapi ra lʼenaxat ñi Dios. Qalaxaye aye la Biblia ʼenapec ra iuen ra soʼogoxonaxa (Romanos 10:13, 14). Huoʼo na lataxalaʼpi nʼamaqtenaxacpi ʼenapec ra ʼeetapeguec ñi Dios ra huoʼo ca huaigui na qauem. Qalaxaye reʼera natenataxanaxac. Ñimaye huanna ra ỹoʼot na qauem (ʼautaxaỹaxan Santiago 1:13). Souaxat reʼera natenataxanaxacpi ỹoʼot ra na shiỹaxauapi saishet ra ỹauotec ñi Dios.

2. ¿ʼEetec na ỹoʼotpi nshepaxanaqchet ra lataxac ñi Dios?

Na nʼamaqtenaxacpi saq ʼeesa saishet ra ỹauotec na shiỹaxauapi ʼenaʼam ñi Jehová. Aye la Biblia ʼenac ra «ỹataqta qalota da lleʼetaxaloxo, iviroʼot na piguem» (Apocalipsis 18:5). Na nʼamaqtenaxacpi queuoigui qalota viʼiyel ra huetaigui na política, na alaataxacpi, qataq ỹoʼotec qoʼ ỹasheetec ra qaỹalauat na qalota shiỹaxauapi. Huoʼo na nataxalaʼpi nʼamaqtenaxacpi ỹataqta huoʼo ra nsallaxa, chaʼaye ỹaxanot ana anom nam caʼateguepi camaye yaqtoʼ ishet ra isheten nam yoʼoqchigui logoxoshetpi. Neʼena ỹoʼotacpi ỹachaxan ra saishet ra ỹauatton ñi Dios. Ỹoqoʼoye, ¿ʼeetec ishet taxa ra ʼeetega lamaxashecpi ñi Dios? (ʼAutaxaỹaxan 1 Juan 4:8).

3. ¿ʼEetec ra nanomaxa ñi Dios ra ilaʼa na ỹoʼotpi na saq ʼeesa nʼamaqtenaxacpi?

Ra ʼam ʼaualemata souaxat na ỹoʼot na saq ʼeesa nʼamaqtenaxacpi, ¡nache ʼacuennataxana ra nanomaxa ñi Jehová! Ñimaye ỹauotec na shiỹaxauapi, qalaxaye ỹataqta dalemataỹa nam nataxalaʼpi na nʼamaqtenaxacpi chaʼaye nshepaxanaqchet ra lataxac ñimaye qataq sa icherapec nam shiỹaxauapi caʼategue. Ñi Dios ỹachaxanapec ra qailaxachigui na nʼamaqtenaxac saq ʼeesa qataq «saishet qome da qaltaq […] qailaʼa» (Apocalipsis 18:21). Pasaʼa qome ra nlaxajñe na saq ʼeesa nʼamaqtenaxacpi (Apocalipsis 18:8).

 ÑIMITAQ RA PAXAGUENAXAT

4. Ñi Dios saishet ra ỹaỹamaxareeta ʼenauac na nʼamaqtenaxacpi

Qalota na shiỹaxauapi iʼamaqten ra na nʼamaqtenaxacpi ỹottaʼaʼt nqaʼaicpi maye taỹaʼa ñi Dios. ¿Qalaxaye ʼeesa reʼera? Qautaxaỹaxañi Mateo 7:13, 14 qataq qaumalligui neʼena:

• Nateeteguet ana la Biblia, ¿ca ʼeetec na nqaʼaic maye taỹaʼa ra ncaʼalaxa?

Qaumichiñi na VIDEO qataq qaumalligui neʼena:

• ¿Rapaxaguenataxanec ana la Biblia ra ñi Dios nasheeteguet na qalota nʼamaqtenaxacpi?

 6. Ñi Dios nshetaique ra isoueguesop na shiỹaxauapi huetaigui na nʼamaqtenaxacpi saq ʼeesa

Qautaxaỹaxañi Apocalipsis 18:4 a qataq qaumalligui neʼena:

• Ñi Dios nshetaique isoueguesop na shiỹaxauapi na latenataxanaxacpi na nʼamaqtenaxacpi saq ʼeesa. ¿Négueʼt ca ʼarcuennataxac reʼera?

7. Queta ra ʼanapaxagueetega ra lataxac ñi ʼeesa Dios

Souaxat na ỹoʼotec na nʼamaqtenaxacpi saq ʼeesa, ¿ʼacuennataxanaxa ra huoʼo ra lpeʼenaxac ñi Dios? ʼAcuennataxanaxa ca ñallec maye saq nasheenguet na lqataxaco so ltaʼa. Nache ỹalat ye lmaʼ qataq ỹoʼot na qauem. So ltaʼa saq nasheenguet na ỹoʼottac so llalec. ¿Ỹaỹamaqchiguiñi ra ñimaxasoxolec so ltaʼa souaxat na ỹoʼottac so llalec qauemaic?

• ¿Ỹaỹamaqchiguiñi ra ñimaxasoxolec ñi Jehová souaxat na ỹoʼottac na nʼamaqtenaxacpi saq ʼeesa qataq saxanaxañi ra ñapaxaguenaxa ñimaye?

 NA ʼAMAQTAQAIC

Na nʼamaqtenaxacpi saq ʼeesa nshepaxanaqchet ra lataxac ñi Dios ỹauotaʼa na lapaxaguenataxanaxac  qaltaq na ỹoʼotpi qauempi. Ñi Dios yaqtaʼa ra nlaxajñe namayepi.

ʼAntoueetaʼac

• ¿Négueʼt ca ʼarcuennataxac na ỹoʼotpi qataq na lapaxaguenataxanaxacpi na nʼamaqtenaxacpi saq ʼeesa?

• ¿ʼEetec ca lcuennataxac ñi Jehová na nʼamaqtenaxacpi saq ʼeesa?

• ¿Négueʼt ca ỹoʼotec ñi Dios qome na nʼamaqtenaxacpi saq ʼeesa?