PAXAGUENAXAT 15
¿Négueʼt so Jesús?
Queuoigui na viʼiyel qalota na shiỹaxauapi huaqteguelec ra qaiʼaxat so Jesús. Ỹaguec na ỹauatton ra lʼenaxat somaye, qalaxaye saq amaqtac nam yoqta ỹauatton ra lataxac so Jesús qataq huoʼo na ỹottaʼaʼt na lʼamaqtenaxac ra négueʼt somaye. ¿Négueʼt ca rapaxaguenataxanec aye la Biblia somaye?
1. ¿Négueʼt so Jesús?
Ñi Jesús ángel ʼañaxaic maye lmaʼ ra piguem. Ñi Jehová huaʼauñe ra iʼoxon somaye, ime nache ỹoʼot ʼenauacna. Ỹoqoʼoye aye la Biblia ʼenac ra so Jesús «nache ʼeetaiʼ da huoʼo coʼollaxa saxanaqca ʼenauacna» (Colosenses 1:15). Taqaʼen qaiỹaxana ra «ʼoonolec Llalec» ñi Dios, chaʼaye ñi Jehová roʼogoxona coʼollaxa naua lhuaxaye ra iʼoxon somaye (Juan 3:16). So Jesús netauʼa na laỹi ñi Ltaʼa, Jehová, roʼonataxatac itauaatac ra ỹoʼot ʼenauacna (ʼautaxaỹaxan Proverbios 8:30). Qataq ñi Jesús ñaq queta ra ntonatan ra nauochaxaua ñi Jehová. Ñi Jesús nacheñi ñi «Naʼaqtac», chaʼaye saxaỹet ra iʼaxat na lqataxacpi qataq na ỹachaxanapecpi ñi Ltaʼa (Juan 1:14).
2. ¿Táʼaencoʼ ra naỹa ana ʼalhua so Jesús?
So 2.000 viʼiyel, ñi Jehová roʼogoxona ra lʼañaxac saq chaʼa yaqtoʼ ỹoʼot so naʼaalaxa: ỹacoosop ra lcaʼalaxa so Jesús, seʼeso ángel ʼañaxaic, chigoqchiguiña ra piguem ra ỹachaigui añi lcoʼoxoqui aso ʼalo saxanaxa ra huaron lʼenaxat María. Qanaʼachec reʼera, so ñiguiñi so Jesús nache shiỹaxaua (ʼautaxaỹaxan Lucas 1:34, 35). Somaye nacheso so Cristo lcaʼaguishec maye naỹa ana ʼalhua ra ncaʼalaxatec ʼenauac na shiỹaxauapi. a Somaye ipacchigui ʼenauac na profeciapi aye la Biblia ra iʼaxat so Mesías. Reʼera itauan na shiỹaxauapi ra ỹaỹaten ra so Jesús nacheso so «Lcaʼaguishec qataq [...] Llalec Ñim Loʼonatac ʼEnauacna» (Mateo 16:16).
3. ¿Huáʼague ca netaʼague so Jesús nagui?
So lcopaʼague ra ileu so Jesús qaỹiʼiguelaxatem ra ncaʼalaxa saq chaʼa nache ỹiʼiguelaxague ra piguem. Huaña nache ñi Dios ỹanem «da qaica ca ʼenaʼam laʼamaqchec» (Filipenses 2:9). Nagui ñi Jesús huoʼo ra ʼenec ra piguem; ndotec ñi Jehová napacalec ñimaye.
ÑIMITAQ RA PAXAGUENAXAT
Semetenaq négueʼt so Jesús qataq táʼaencoʼ ra ʼamaqtaqaic ra sauattonaq.
4. Ñi Jesús saishet ra ʼenaʼam ñi Dios Qaica ca Ỹaqalanapec
Naiʼctaxa ra ñi Jesús ángel ʼañaxaic huetaʼague ra piguem, ana la Biblia ʼenapec ra ỹalaxaguet ñi Jehová maye Lataxalaʼ qataq Ltaʼa. ¿Táʼaencoʼ ra shenqapec reʼera? Qaumichiñi na VIDEO yaqtoʼ qauachiñiteguet táʼaencoʼ aye la Biblia ʼenapec ra ñi Jesús saq ʼenaʼam ñi Dios maye Qaica ca Ỹaqalanapec.
Semetenaq na textopi maye qomiʼ itauan ra saỹatenaqteguet ra ñi Jesús saq ʼenaʼam ñi Jehová. Qautaxaỹaxañi ñi ʼoonolec texto, ime nache qaumalligui neʼena:
Qautaxaỹaxañi Lucas 1:30-32.
-
¿ʼEetec ra ỹachaxan so lʼaqtacpi so ángel ra ñi Jesús saq ʼenaʼam ñi Jehová «maye ʼamaqtaqaic»?
Qautaxaỹaxañi Mateo 3:16, 17.
-
So nachel so Jesús nache huoʼo so navilỹaxac chemqot ra piguem, ¿négueʼt so nasaxauec?
-
¿ʼEetec ca ʼarcuennataxac négueʼt ca lavilỹaxac seʼeso?
Qautaxaỹaxañi Juan 14:28.
-
¿Négueʼt ca ỹe qataq ỹactec ra laʼamaqchec: ca ntaʼa qoʼ ca llalec?
-
¿Négueʼt ca naigui ra so Jesús ʼenapega ñi Jehová «Ñim Itaʼa»?
Qautaxaỹaxañi Juan 12:49.
-
¿Lcuennataxac so Jesús ra ʼenaʼam ñi Ltaʼa? ¿ʼEetec ca ʼarcuennataxac?
5. So Jesús nacheso so Mesías
Ana la Biblia huetalec na profeciapi maye itauan so shiỹaxauapi ra ỹauattoota ca Mesías, ca lcaʼaguishec ñi Dios ra ncaʼalaxatec ʼenauac na shiỹaxauapi. Qaumichiñi na VIDEO maye iʼaxat so profeciapi ra ipacchigui so Jesús so huetalec ana ʼalhua.
Qautaxaỹaxañi neʼenaua profeciapi huetalec ana la Biblia, qataq qaumalligui neʼena:
Qautaxaỹaxañi ye Miqueas 5:2 yaqtoʼ qauaỹajñi huáʼague ca lañoqoʼ so Mesías. b
-
¿Ipacchigui neʼena profecía so ñiguiñi so Jesús? (Mateo 2:1).
Qautaxaỹaxañi Salmo 34:20 taq Isaías 53:5 maye iʼaxataʼaguet ʼeetec ra ileu so Mesías.
-
¿Ipacchigui neʼenaua profecía? (Juan 19:33-37).
-
¿ʼAuʼamaqten ra so Jesús nacheso so ilotalec ra ipacchigui neʼenaua profecía?
-
Ra ʼanapaxaguena ʼenauac reʼera, ¿négueʼt ca ʼanqaʼen so Jesús?
6. Qomiʼ itauan ra sauattonaq so Jesús
Ana la Biblia ỹachaxan ra huoʼo ra naigui ra ñapaxaguenaxa ra lataxac so Jesús qataq so nʼonataxanaxac ỹanem ñi Dios coʼollaxa. Qautaxaỹaxañi Juan 14:6 taq 17:3, qataq qaumalligui neʼena:
-
¿Táʼaencoʼ ra huoʼo ra naigui ra sauattonaq so Jesús?
So Jesús ỹauateec so nqaʼaic yaqtoʼ ishet ra qanauochaxaua ñi Dios qataq rapaxaguenataxanec ra ʼeesa ñi Jehová. Taqaʼen ishet ra ñaloqtauʼa ra ncaʼalaxa chochaq tateec chigoqchigui somaye.
HUOʼO NA NASAXAUEC RA: «Na testigopi de Jehová saishet ra iʼamaqten so Jesús».
-
¿ʼEetec ca ʼarasataxac ʼam?
NA ʼAMAQTAQAIC
Ñi Jesús ángel ʼañaxaic. Llalec ñi Dios qataq so qaiʼaxattaʼaguet Mesías.
ʼAntoueetaʼac
-
¿Táʼaencoʼ ra qaiỹaxana so Jesús ra «nache ʼeetaiʼ da huoʼo coʼollaxa saxanaqca ʼenauacna»?
-
¿Négueʼt na ỹoʼottac so Jesús so saxanaxa ra nalec ana ʼalhua?
-
¿ʼEetec ra saỹatenaq ra so Jesús nacheso so qaiʼaxattaʼaguet Mesías?
ʼAUANATA CA LỸA
ʼAnapaxaguena na laỹipi maye ỹachaxan ra so Jesús nacheso so Mesías.
«¿Ỹachaxan na profeciapi aye la Biblia ra so Jesús nacheso so Mesías?» (Paxaguenaxat ye jw.org)
ʼAmeten ra aye la Biblia rapaxaguenataxanec petaʼa ra ñi Dios iviraʼa ra Ltaʼa so Jesús ʼenaʼam na shiỹaxauapi huoʼo na llalaqpi.
«¿Táʼaencoʼ ra qaiỹaxana ñi Jesús ra Llalec ñi Dios?» (Paxaguenaxat ye jw.org)
ʼAnmit táʼaencoʼ na trinidad saishet ra napaxaguenataxanaxac huetalec aye la Biblia.
«Ñi Jesús: ¿nacheñi ñi Dios?» (La Atalaya, 1 de abril de 2009)
ʼAutaxaỹaxan ʼeetec ra naralaxat ra lataxac aso ʼalo so ime ra nmit ra ʼenapec aye la Biblia so Jesús.
a Ye paxaguenaxat 26 taq 27 iʼaxat táʼaencoʼ na shiỹaxauapi iuen ra ncaʼalaqtaxanaxac qataq ʼeetec ra qomiʼ ncaʼalaxatec so Jesús.
