PAXAGUENAXAT 17
¿ʼEetec ra lataxac so Jesús?
Ra queta ra ñapaxaguenaqtega so ỹoʼot qataq so nasaxauec so Jesús coʼollaxa so huetalec ana ʼalhua, selaqalec naua lataxaco maye qomiʼ nquigaxatoʼot ñimaye qataq ñi Ltaʼa Jehová. ¿Négueʼt naua lataxaco qomiʼ naueguelaʼt? ¿Qataq négueʼt ca ishet ra soʼotaq yaqtoʼ shenaqtaʼam so Jesús?
1. So Jesús, ¿ʼeetec ra ʼeetaʼam ñi Ltaʼa?
So Jesús huetaʼague ra piguem ỹataqta qalota viʼiyel ỹalletagui ñi huotaxanaqtaqaic Ltaʼa qataq napaxagueetega ra lataxac ñimaye. Ỹoqoʼoye ra lcuennataxac, ra nanomaxa qataq ra lataxac ra huoʼo ye ỹoʼot ʼeetaʼam ñimaye. (ʼautaxaỹaxan Juan 5:19). So Jesús ỹataqta iʼenaxat ra lataxac ñi Ltaʼa, ỹoqoʼoye ʼenapec: «Chaʼaye ca Aỹem ilaʼa, camaye nataqaʼen ilaʼa Ñim Itaʼa» (Juan 14:9). Nache ra nquiguec ra ʼauauatton so Jesús, nquiguec ra ʼauauatton ñi Jehová. Qaỹaloqnaxana, ra nchoxonnataxanaxa ỹachaxana so Jesús na shiỹaxauapi ỹachaxan ra ñi Jehová ỹataqta ʼam iqochaʼa.
2. ¿ʼEetec ra ỹachaxan so Jesús ra ỹauotec ñi Ltaʼa?
So Jesús ʼenapec: «Iuen da salaxaguet Ñim Itaʼa yaqtoʼ ʼenauac da qaỹaỹaten da ỹataqta sauotec Ñimaye» (Juan 14:31). Coʼollaxa so huetalec ana ʼalhua, so Jesús ỹalaxaguet ñi Ltaʼa naiʼctaxa ra huaigui ra nqueʼejnaxac chaʼaye ỹataqta ỹauotec ñimaye. Taqaʼen so Jesús ỹataqta nmeten ra iʼaxatac ñi Ltaʼa taq ra itauan na shiỹaxauapi ra ishet ra nauochaxaua ñi Dios (Juan 14:23).
3. ¿ʼEetec ra ỹachaxan so Jesús ra ỹauotec na shiỹaxauapi?
Aye la Biblia ʼenapec ra so Jesús ỹataqta ỹauotec na shiỹaxauapi. So Jesús ỹachaxan ra lauotaxanaqtaic ra iʼañaqchet qataq itauan na shiỹaxauapi; saishet ra iuattaʼa ra qaisheten. Ỹoʼot so naʼaalaxapi ra ỹachaxan ra lʼañaxac qataq ra lchoxonnataxanaxac (Marcos 1:40-42). Ỹataqta soxoraic qataq saishet ra lcaʼatagui ca laỹipi. Naua lʼaqtaqa ỹanem ra nʼañaxac taq aquitaxac ʼenauac na shiỹaxauapi noʼon lquiyaqteỹaxac maye nʼaxaỹaxaatega somaye. Souaxat ra lauotaxanaqtaic ʼenauac na shiỹaxauapi, so Jesús lhuotta ra ileualec namayepi naiʼctaxa huoʼo ra nqueʼejnaxac. Qalaxaye ỹataqta ỹauotec nam ỹalaxaguet na lapaxaguenataxanaxac (ʼautaxaỹaxan Juan 15:13, 14).
ÑIMITAQ RA PAXAGUENAXAT
Nquiguec ra sauattonaq ra lataxac so Jesús qataq semetenaq ʼeetec ishet ra sheʼenaxataq ra lauotaxanaqtaic qataq ra lachitaqtaxanaxat.
4. So Jesús ỹauotec ñi Ltaʼa
So laloqnaxanaxat so Jesús qomiʼ ỹapaxaguenec ʼeetec ishet ra sachaxanaq ra qarauotaxanaqtaic ñi Dios. Qautaxaỹaxañi Lucas 6:12 taq taqaʼen Juan 15:10; 17:26. Ra ime ra qautaxaỹaxañi ñi ʼoonolec texto, qaumalligui neʼena:
-
ʼEnaʼam so Jesús, ¿ʼeetec ishet ra sachaxanaq ra qarauotaxanaqtaic ñi Jehová?
So Jesús ỹauotec ñi Ltaʼa, ỹoqoʼoye saxaỹet ra natamenot.
5. So Jesús ỹoqochaʼa nam huoʼo ra lhuenaxanaxa
Naiʼctaxa huoʼo ra lhuenaxanaxa, so Jesús iʼauaxaañe ra lhuenaxanaxa na laỹipi, chaʼaye ỹoqochaʼa namayepi. Naiʼctaxa ra nasamñi, roʼogoxona ra lraqaʼ qataq ra lʼañaxac yaqtoʼ itauan na laỹipi. Qautaxaỹaxañi Marcos 6:30-44 qataq qaumalligui neʼena:
-
Souaxat neʼena nʼaqtaguec: ¿ʼEetec so Jesús ỹachaxan ra iqochaʼa na laỹipi? (Qaumichiñi na versículos 31, 34, 41 taq 42).
-
¿Táʼaencoʼ itauan so Jesús seʼeso shiỹaxauapi? (Qaumichiñi ye versículo 34).
-
Semetenaq so Jesús ỹachaxan ra lataxaco ñi Ltaʼa, ¿négueʼt ca ʼam ỹapaxaguenec ra lataxaco ñi Jehová ʼenauac reʼera?
-
¿Négueʼt ca ishet ra soʼotaq yaqtoʼ soqochaqaʼa na laỹipi ʼenaʼam so Jesús?
6. Ñi Jesús chitaqtaxanaxaic
So Jesús chitaqtaxanaxaic naiʼctaxa saishet ra ỹaguec ra yoʼoqchigui loxogoshetpi, ỹoqoʼoye qomiʼ iʼañaqchet ra ishet ra sheʼenaxataq ñimaye. Qautaxaỹaxañi Hechos 20:35 qataq qaumalligui neʼena:
-
Nateeteguet naua lʼaqtaqa so Jesús, ¿négueʼt ca ỹoʼot ra qomiʼ machiguiñi?
Qaumichiñi na VIDEO qataq qaumalligui neʼena:
-
¿Négueʼt ca ishet ra sanaxauec naiʼctaxa ra saishet ra ỹaguec na yoʼoqchigui qorogoxoshetpi?
ʼAmeten ra
Ana la Biblia rapaxaguenec ra ñatamenqot ñi Jehová iuen ra soʼogoxonaxa ra lʼenaxat so Jesús (qautaxaỹaxañi Juan 16:23, 24). Ra soʼotaq reʼera nache sachaxanaq ra sauoqoʼo ra naigui so ỹoʼot so Jesús yaqtoʼ qomiʼ itauan ra qanauochaxaua ñi Jehová.
HUOʼO NA NASAXAUEC RA: «Ñi Dios saishet ra ỹoqochaʼa ra qanqueʼejnaxac».
-
So Jesús ỹachaxan ra lataxaco ñi Ltaʼa, ¿ʼeetec ra ỹachaxan somaye ra qomiʼ ỹoqochaʼalo ñi Jehová?
NA ʼAMAQTAQAIC
So Jesús ỹauotec ñi Jehová, taq taqaʼen ỹauotec na shiỹaxauapi. Souaxat ra so Jesús ʼeetaʼam ra lataxac ñi Ltaʼa, nache ra nquiguec ra ʼauauatton so Jesús taqaʼen nquiguec ra ʼauauatton ñi Jehová.
ʼAntoueetaʼac
-
Souaxat so laloqnaxanaxat so Jesús, ¿ʼeetec ishet ra sachaxanaq ra sauotaxac ñi Jehová?
-
Souaxat so laloqnaxanaxat so Jesús, ¿ʼeetec ishet ra sachaxanaq ra sauotaxac na shiỹaxauapi?
-
¿Négueʼt caua lataxaco so Jesús yoqta ʼarauela?
ʼAUANATA CA LỸA
ʼAmeten caua lataxaco so Jesús ra ishet ra sheʼenaxataq.
«Sheʼenataxaq ra lataxac so Jesús» (Jesús: el camino, la verdad y la vida, laue 317)
ʼAnapaxaguena táʼaencoʼ ra ʼamaqtaqaic ra soʼogoxonaxa ra lʼenaxat so Jesús na qanatamnaxacpi.
¿ʼEnapec aye la Biblia ʼeetec ra lʼoquiaxac so Jesús?
¿Négueʼt ca qomiʼ ỹapaxaguenque ra lataxac so Jesús ra iloʼoguet aso ʼalpi?
«Ñi Dios ỹauoʼo ra naigui ana ʼalpi» (La Atalaya, 1 de septiembre de 2012)
