PAXAGUENAXAT 19

¿Nachena na testigopi de Jehová ʼeesa cristianopi?

aỹeglaxattague

Qomiʼ na testigopi de Jehová saʼamaqtenaq ra qomiʼ ʼeesa cristianopi. ¿Táʼaencoʼ? Ñapaxaguenaxa huáʼague ca chegaqaigui na qarʼamaqtenaxacpi taq na maiche qarʼenaxat qataq semetenaq taqaʼen ʼeetec ra sachaxanaq ra qarauotaxanaqtaic.

1. ¿Huáʼague ca chegaqaʼague na lʼamaqtenaxacpi na testigopi de Jehová?

So Jesús ʼenapega ñi Dios ʼeeta: «Dam ʼaraʼaqtac maye ỹataqta ʼeesa» (Juan 17:17). Na testigopi de Jehová sheʼenaxataq so ỹoʼot so Jesús: saxaỹet ra chigoqchigui ra Lʼaqtac ñi Dios na qarʼamaqtenaxacpi. ʼAmeten so chigoqchiguiña na testigopi de Jehová neʼenaua naʼaxaʼte. Queuoigui so viʼi 1870 huoʼo so estudiantepi aye la Biblia, maye ỹacoolec ra ỹataqta nmit ra Lʼaqtac ñi Dios. Na lʼamaqtenaxacpi ỹachigoxotalec na huetalec aye la Biblia, naiʼctaxa reʼera rataỹaʼaguet na lapaxaguenataxanaxac na iglesiapi. Ime nache chigoqchigui ra iʼaxatem na laỹipi na napaxaguenataxanaxacpi ʼeesa maye ỹanata. a

2. ¿Táʼaencoʼ ra qarʼenaxat testigopi de Jehová?

Ñi Jehová ỹalletaʼa ra na shiỹaxauapi maye ỹiʼoxoren ñimaye ra lalamaxat testigopi, chaʼaye iʼaxatec ra ʼeesa lataxac ñimaye. Qaỹaloqnaxana, coʼollaxa ñi Dios ʼenapega so lauoʼ lʼecpi: «Qamiʼ maye qamiʼ ỹaʼaqtaxanaxanaqa» [«testigopi», NWT] (ʼautaxaỹaxan Isaías 43:10). Qataq so Jesús saxaỹet ra iʼaxatec ra ʼeesa nʼaqtaguec ñi Dios, ỹoqoʼoye qaỹamataʼac ra testigo npeʼet (Apocalipsis 1:5). Ỹoqoʼoye so viʼi 1931 llicaʼaxagui ra qarʼenaxat testigopi de Jehová. Qomiʼ samaxasoqchiguiñe ra sachoqtac reʼera nʼenaxat.

3. ¿ʼEetec ra iʼenaxatchigui ra lauotaxanaqtaic so Jesús na testigopi de Jehová?

So Jesús ỹataqta ỹauotec som ndiscipulopi ʼenaʼam ra maiche lalamaxat lauoʼ lʼecpi somaye (ʼautaxaỹaxan Marcos 3:35). Na testigopi de Jehová ỹataqta nhuoteetaʼt ʼenaʼam na nhuoʼ lʼecpi ʼenauac ana ʼalhua. Ỹoqoʼoye shenaqpega ca qarỹa «qarqaỹa» (Filemón 1, 2). Taqaʼen salaxasoxoguet neʼena namaxasoxonaxac: «Ỹataqta qauauochiic na qadʼamqajnataxanaxauaipi» (1 Pedro 2:17, TBSNT). Qomiʼ na testigopi de Jehová ỹottaʼaʼt ye soʼotaq yaqtoʼ sachaxanaq reʼera nauotaxanaqtaic, ca ʼoonolec nachera ra setauanaq na qarqaỹañecpi ʼenauac ana ʼalhua qom huaigui na queʼejnaxacpi.

ÑIMITAQ RA PAXAGUENAXAT

Nquiguec ra sauattonaq ra nʼaqtaguec na testigopi de Jehová qataq semetenaq táʼaencoʼ ra shenqapec ra qomiʼ ʼeesa cristianopi.

Na ʼeesa cristianopi chegaqaigui na lʼamaqtenaxacpi na huetalec aye la Biblia qataq iʼaxatec reʼera na shiỹaxauapi.

4. Na saʼamaqtenacpi chigoqchigui aye la Biblia

Ñi Jehová ỹachaxanapec coʼollaxa ra na ʼeesa huetalec aye la Biblia nquictauec ra qaỹaỹateeteguet. Qautaxaỹaxañi Daniel 12:4 qataq qaumalligui neʼena:

Na lʼonataxanaxanecpi ñi Dios ra queta ra nmit aye la Biblia nache, ¿négueʼt ca «nquigaxatec»?

ʼAmeten ʼeetec ra nmit na Lʼaqtac ñi Dios so estudiantepi aye la Biblia maye ỹalectaigui so Charles Russell. Qaumichiñi na VIDEO qataq qaumalligui neʼena:

VIDEO: Ỹoltaxa qaỹauatton na ʼeesa huetalec aye la Biblia (7:45)

Nateeteguet so video, ¿ʼeetec ra nmit na Lʼaqtac ñi Dios so Charles Russell qataq so laỹipi estudiantepi?

ʼAmeten ra

Huoʼo naxa seuenaq ra ñaralaxataq na qarʼamaqtenaxacpi. ¿Táʼaencoʼ? Chaʼaye ʼeetaʼam nquictauec na leraxa ca ralaxaic naʼaq nache ivitaʼa ra ỹataqta yoʼoqchiguiñi, ñi Dios ỹasheetec ra nquictauec ra qaỹaỹateeteguet ra Lʼaqtac (qautaxaỹaxañi Proverbios 4:18). Ỹoqoʼoye naiʼctaxa ana la Biblia saishet ra nqochen, ra nquictauec ra ỹataqta saỹatenaqteguet nache ñaralaxataq na qarʼamaqtenaxacpi.

5. Soʼotaq ra naigui ra qarʼenaxat

¿Táʼaencoʼ llicaʼaxagui ra qarʼenaxat testigopi de Jehová? Qaumichiñi na VIDEO qataq qaumalligui neʼena:

VIDEO: Na qarʼenaxat ỹachaxan ra qarataxac (2:40)

¿Táʼaencoʼ ra ỹaỹamaqchiguiñi ra qarʼenaxat testigopi de Jehová?

¿Táʼaencoʼ ñi Jehová lcaʼagui na shiỹaxauapi yaqtoʼ ntestigopi ñimaye? Chaʼaye ye qalota natenataxanaxac ra lataxac ñi Jehová, nache neʼena shiỹaxauapi iʼaxatec ra ʼeesa ra lataxac ñi Jehová, ñi Dios maye ỹataqta ʼeesa. Semetenaq naua dos natenataxanaxaco.

Huoʼo na nʼamaqtenaxacpi rapaxaguenataxanec ra ñi Dios lauela ra qaỹoʼogoxona na nqolacpi yaqtoʼ qaỹiʼoxoren. Qalaxaye, ¿ʼeesa reʼera? Qautaxaỹaxañi Levítico 26:1 qataq qaumalligui neʼena:

Nateeteguet neʼena versículo, ¿négueʼt ca ʼeesa? ¿ʼEetec ra lmejnaxanaxac ñi Dios na nʼenaqtacpi?

Huoʼo na lataxalaʼpi nʼamaqtenaxacpi rapaxaguenec ra ñi Jesús nacheñi ñi Dios. Qalaxaye, ¿ʼeesa reʼera? Qautaxaỹaxañi Juan 20:17 qataq qaumalligui neʼena:

Nateeteguet neʼena versículo, ¿négueʼt ca ʼeesa? Ñi Jesús, ¿nacheñi ñi Dios?
Ñi Jehová ỹamaxalec na testigopi yaqtoʼ ỹapaxaguenec na ʼeesa souaxat ñimaye qataq so Llalec. ¿Négueʼt ca ʼananomaxa reʼera?

6. Qomiʼ ỹataqta ñauotaxaʼt

Ana la Biblia ʼenapec na cristianopi ʼenaʼam na ỹottaʼaʼt qarʼoquiaxac. Qautaxaỹaxañi 1 Corintios 12:25, 26 qataq qaumalligui neʼena:

Ra huoʼo ca cristianopi maye huaigui ra nqueʼejnaxac, ¿négueʼt ca iuen ra ỹoʼot na ʼeesa cristianopi?
Qom ra ʼaualletaʼa, ¿ʼeetec ra ỹachaxan ra lauotaxanaqtaic na testigopi de Jehová?

Ra huoʼo cam testigopi de Jehová huaigui ra nqueʼejnaxac, nache na lqaỹañecpi ʼenauac ana ʼalhua lhuotta ra itauan. Yaqtoʼ ʼauauatton ca ʼoonolec, qaumichiñi na VIDEO. Ime nache qaumalligui neʼena:

VIDEO: Ye Haití rataỹaʼaguet so laʼat ltaʼaraic lʼenaxat Matthew (5:29)

¿ʼEetec ra ltaunaxanaxac na testigopi de Jehová ra ime so laʼat ltaʼaraic?

Na ʼeesa cristianopi ỹachaxana ra lauotaxanaqtaic nam iuen ra ntaunaxanaxac.

HUOʼO NA NASAXAUEC RA: «Na testigopi de Jehová namayepi ralaxaic nʼamaqtenaxac».

¿Chaq lágui ñi Jehová chigoqchigui ra iỹaxana «testigopi» nam ỹiʼoxoren ñimaye?

NA ʼAMAQTAQAIC

Na testigopi de Jehová ʼeesa cristianopi. ʼEnaʼam na maiche lalamaxat nhuoʼ lʼecpi huetalec ʼenauac ana ʼalhua maye ỹiʼoxoren ñi Dios, na lʼamaqtenaxacpi chigoqchigui na huetalec aye la Biblia qataq iʼaxatec na ʼeesa ra lataxac ñi Jehová.