Ñi Jehová lauela ra naỹamaxatta (1 Corintios 14:33). Ỹoqoʼoye seuataqtaʼa ra nam npueblo ỹataqta naỹamaxatta. ¿ʼEetec ra laỹamaxataxac añi congregación cristiana? ¿ʼEetec ishet ra setaunaxanaq yaqtoʼ huoʼo ra nlaxagayec?

1. ¿Négueʼt ca ilotalec añi congregación cristiana?

«So Cristo nacheso so lqaic [...] na ʼamqaanataxanaxaicpi» (Efesios 5:23). Chigoqchiguiña na piguem, ñi Jesús ilotalec ʼenauac na lʼonataxanaxac nam npueblo ñi Jehová ʼenauac ana ʼalhua. Lcaʼauʼa «ca nlatac da ỹataqta ipactelec ca lʼonatac qataq huoʼo na ỹaỹaten»: maye nachena naua saq ʼamaqtaq na ancianopi huoʼo ra lliquiaxac, taqaʼen qaiỹaxana na Cuerpo Gobernante (ʼautaxaỹaxan Mateo 24:45-47, TBSNT). ʼEnaʼam na ỹoʼottac so apostolpi taq so ancianopi ye Jerusalén so huaʼañe siglo, na Cuerpo Gobernante ilotalec ʼenauac ana congregacionpi ana ʼalhua (Hechos 15:2). Qalaxaye neʼenaua ỹaleʼt saishet ra nataxalaʼpi añi qanʼorganización. Nmittaique ra lcoỹaraxanaxac ñi Jehová qataq ye Lʼaqtac, taqaʼen lhuotta ra ỹalaxaguet ñi Jesús.

2. ¿Négueʼt ca lʼonataxanaxac nam ancianopi?

Nam ancianopi, nachena na ỹaleʼt maye naʼatchiguiñi ra lpiʼiỹaxac, ʼenaʼam ca maestropi rapaxaguenataxanec ana la Biblia, qataq ʼenaʼam ca qagueta loʼo itauan taq iʼañaqchet nam huetaigui añi la congregación. Saishet ra qaisheten ra lʼonataxanaxac. Nachaqrata, ỹataqta nasapatta na ỹoʼottac «chaʼayi nachida da ʼeetapeguec ñi Dios»; saishet ra ỹoʼottac damaye ra choche naquitaʼa ra laueque aca anom (1 Pedro 5:1, 2, TBSNT). Nam ancianopi ỹaconguet ra ltaunaxanaxac na ltauapi añi la congregación, queuoigui na viʼiyel namayepi ishet ra iviraʼa ra ancianopi.

Na Cuerpo Gobernante lcaʼagui nam ancianopi yaqtoʼ ishet ra iviraʼa na superintendente na circuito. Neʼenaua qarqaỹa namaqtega ana congregacionpi yaqtoʼ ỹanem na lqataxacpi qataq nʼañaqtaxanaxac. Taqaʼen nateeteguet na huetalec aye la Biblia, lcaʼagui na qarqaỹañecpi yaqtoʼ ishet ra ancianopi qataq na ltauapi añi la congregación (1 Timoteo 3:1-10, 12; Tito 1:5-9).

3. ¿Négueʼt ca iuen ra ỹoʼot ca ʼoonolec na testigopi?

ʼEnauac na huetaigui añi congregación «ỹiʼoxoren ra lʼenaxat ñi Jehová» ra ỹalectauo qataq ỹalegueuaʼa nam qaraponaxacpi, taqaʼen ra iʼaxat ra nʼaqtac maiche ca nalotauaʼa ñi ʼoonolec (ʼautaxaỹaxan Salmo 148:12, 13, NWT).

 ÑIMITAQ RA PAXAGUENAXAT

4. Ñi qarataxalaʼ Jesús ỹan ra nmataxac

So Jesús qomiʼ ỹanem ra ʼonaxaic nỹaxanaxac. Qautaxaỹaxañi Mateo 11:28-30 qataq qaumalligui neʼena:

• ¿ʼEetec ra lataxac ñi qarataxalaʼ Jesús? ¿Qataq négueʼt ca nshetaique ra qomiʼ ỹanem?

5. Ra lataxac na ancianopi qomiʼ ỹapaxaguen

1. Na ancianopi iʼañaqchet ra lauochaxac ñi Jehová qataq itauan na maiche lalamaxatpi ra ỹoʼot reʼera.

2. Na ancianopi ỹoqochaʼa ʼenauac na qarqaỹañecpi añi congregación.

3.   Na ancianopi saxaỹet ra iʼaxat ra nʼaqtac.

4. Na ancianopi paxaguenataxanaxaic. Taqaʼen rtaunaxan ra qaiyaquen añi laponaxaqui qataq na laỹipi nʼonataxanaxac.

6. Ishet ra setauanaq na ancianopi

Ana la Biblia qomiʼ iʼaqtaxanem táʼaencoʼ iuen ra setauanaq na ancianopi. Qautaxaỹaxañi Hebreos 13:17 qataq qaumalligui neʼena:

• ¿Táʼaencoʼ ra ʼenapec aye la Biblia ra iuen ra qomiʼ lhuotteʼ ra salaxasoxoguet nam qomiʼ ilotagueʼ? ¿ʼAuʼamaqten ra ỹaỹamaqchiguiñi reʼera? ¿Táʼaencoʼ?

Qautaxaỹaxañi Lucas 16:10 qataq qaumalligui neʼena:

• ¿Táʼaencoʼ ra saxaỹet iuen ra salaxasoxoguet na ancianopi, naiʼctaxa ra qaica ca naigui ñaqaʼenaq ca qomiʼ ỹamaxalec?

 NA ʼAMAQTAQAIC

Ñi Jesús nacheñi ñi lqaic na congregación cristiana. Na ancianopi huetaigui na lamaxasoxonaxac ñimaye, qaq qomiʼ lhuotta ra setauanaq namayepi chaʼaye qomiʼ ntelaʼa qataq qomiʼ ỹapaxaguenec ra laloqnaxanaxat.

ʼAntoueetaʼac

• ¿Négueʼt ca ilotalec añi congregación cristiana?

• ¿ʼEetec ra itauan na ancianopi añi congregación?

• ¿Négueʼt ca iuen ra ỹoʼot ca ʼoonolec na lʼonataxanaxanec ñi Jehová?