PAXAGUENAXAT 22

¿ʼEetec ishet ra ʼauʼaxat ʼam na noʼon nʼaxaỹaxacpi?

aỹeglaxattague

So ʼalalec na ʼeesa huetaigui aye la Biblia, petaʼa ʼam ʼacuennataxana: «¡ʼEnauac iuen ra ỹaỹaten reʼera!». Ajá nache ʼeetec; chaʼaye ʼenauac na shiỹaxauapi iuen ra ỹaỹaten reʼera. Qalaxaye, petaʼa ʼayeʼe ra ʼauʼaqtaxanem ca laỹipi na ʼanapaxagueetega. Semetenaq ʼeetec ishet ra ʼanapacalec na ʼayiʼiỹaxapi nache ishet ra huoʼo ra ʼantonaxac ra ʼauʼaqtaxanem na laỹipi naua noʼon nʼaxaỹaxac huetalec aye la Biblia.

1. ¿ʼEetec ishet ra ʼauʼaqtaxanem na ʼanauattonaxauapi na ʼanapaxagueetega?

So discípulopi so Jesús ʼenapec: «Saishet da saxanaxañi da saʼaxataqtac ʼenauac nam sauanaqchigui qataq nam saʼaxasoqchigui» (Hechos 4:20). Somayepi ỹataqta ỹauotec ra ʼeesa, ỹoqoʼoye huotaique ra iʼaqtaxanem ʼenauac na shiỹaxauapi. ¿Nache ʼeetec ra ʼarquiyaqteỹaxac? Huaʼ, nache ʼanmittaique chaq lágui ishet ra ʼauʼaqtaxanem na ʼarhuoʼ lʼecpi taq ʼanauochaxauapi ra ʼanapaxagueetega qalaq iuen ra ỹaỹamaqchiguiñi caua ʼarʼaqtaqa (ʼautaxaỹaxan Colosenses 4:6).

Na nqataxacpi yaqtoʼ ishet ra ʼamalle ca arỹa

Ra ʼanʼaqtaxaneʼ ca ʼarhuoʼ lʼec ishet ra ʼauʼaqtaxanem ana la Biblia ra qonapec: «Neʼena Ia semana ỹataqta ʼonaxai so ñapaxagueetega».
Ralola qoʼ huoʼo ra lhuogoxo ca ʼanauochaxaua, nache ʼauachaxana ca ʼoonolec texto aye la Biblia ra iʼañaqchet camaye.
Ra ʼam inat ca ʼarʼonataxanaxauapi négueʼt ca ʼauʼotac na la semana, nache ʼauʼaqtaxanem ca ʼanapaxagueetega so ʼanapaxaguenaxac ana la Biblia qoʼ ca naponaxac añi la congregación.
ʼAuachaxana ca ʼanauochaxauapi ye sitio ye internet jw.org.
ʼAỹaxana ca laỹipi ra ỹalectauʼa ca ʼanapaxaguenaxac aye la Biblia, qoʼ ʼauachaxana ʼeetec ishet ra iỹaxanaique ca paxaguenaxac aye la Biblia ỹauotaʼa ye jw.org.

2. ¿Táʼaencoʼ huoʼo ra naigui ra ʼannaictegueʼ na qarqaỹañecpi añi la congregación ra ʼauʼaxat ra nʼaqtac?

So ndiscipulopi so Jesús saishet ndotec ra iʼaqtaxanem ra noʼon nʼaxaỹaxac nam nauattonaxauapi. So Jesús «ỹamaq somayepi dostegaʼt naqaʼen, da ỹaʼauaxaataʼa ʼenauac na naña na saq ʼamaqtaq nỹecpiolec qataq naua lỹaʼt ʼaleuʼ» yaqtoʼ iʼaxat ra nʼaqtac (Lucas 10:1). Reʼera naỹamaxataxac ra qaiʼaxat ra nʼaqtac itauan ra qalota so shiỹaxauapi nʼaxaỹaxana naua noʼon nʼaxaỹaxac. Taqaʼen so ndiscipulopi ỹataqta ntonatan ra nnaictegaʼt iʼaxatac ra nʼaqtac (Lucas 10:17). ¿ʼAm taqaʼen ishet ra ʼanʼañaxat yaqtoʼ qome ʼauʼaxat ra nʼaqtac ʼannaictegueʼ na qarqaỹañecpi añi la congregación?

ÑIMITAQ RA PAXAGUENAXAT

Semetenaq négueʼt ca ishet ra ʼam itauan yaqtoʼ ʼanapacalec ra ʼayiʼiỹaxa nache huoʼo ra ʼantonatan ra ʼauʼaxat naua noʼon nʼaxaỹaxac.

3. Ñi Jehová ʼam huetaʼaguet

Nam huotaique iʼaxat ra nʼaqtac huoʼo ra ihuogoxoqchetac ra lasataxac na shiỹaxauapi qoʼ ra lcuennataxac namayepi.

Qaq ʼam, ra ʼacuennate ra ʼauʼaxatem ca laỹipi na ʼanapaxagueetega, ¿huoʼo ra ʼayiʼiỹaxa qoʼ qaica? ¿Táʼaencoʼ?

Qaumichiñi na VIDEO qataq qaumalligui neʼena:

VIDEO: Seỹaxanot ñi Jehová ra aỹem itauan ra saishet ra sheʼe (4:05)

¿ʼEetec ra napacalec ra lliʼiỹaxapi na nsoxotpi neʼena video?

Qautaxaỹaxañi Isaías 41:10 qataq qaumalligui neʼena:

Ra ʼayiʼi ra ʼauʼaxat ra nʼaqtac, ¿táʼaencoʼ iuen ra ʼanatamen?

ʼAmeten ra

Qalota nagui na masheye testigopi de Jehová coʼollaxa icuennate ra nauangueʼ ra iʼaxatec ra nʼaqtac. Qaỹaloqnaxana, so ỹale lʼenaxat Sergey nanomteguet ra qaica ca naigui qataq iqalan ra remalli na shiỹaxauapi. Qalaq huoʼo so naʼaq chigoqchigui ra napaxaguena ana la Biblia. Somaye ʼenac: «Naiʼctaxa ra huoʼo ra sheʼe, ishet ra saʼaxatem ca laỹipi na ñapaxagueetega. Ỹataqta saʼaalac reʼera chaʼaye iʼañaqchet ra ỹataxac, qataq ỹoʼot ra paxaguenaxatpi ana la Biblia huetaigui añi iquiyaqte».

4. ʼAuauoʼo naq ʼenec ca laỹipi

Ra saxanaxa ra ʼauʼaxatem ra nʼaqtac ca laỹipi, huaʼauñe iuen ra ʼacuennate négueʼt ca ʼanasaxauec, qataq taqaʼen iuen ra ʼacuennate ʼeetec ishet ra ʼauʼogoxona naua noʼon ʼarʼaqtaqa. Qautaxaỹaxañi 2 Timoteo 2:24 taq 1 Pedro 3:15, qataq qaumalligui neʼena:

Ra ʼauʼaxatem ca laỹipi ana la Biblia, ¿ʼeetec ishet ra ʼaualaxaguet na ʼenapec neʼenaua versículos?
Petaʼa huoʼo na ʼarhuoʼ lʼecpi qataq na ʼanauochaxauapi ra saq lauela nam ʼauʼotac. ¿Négueʼt ca ishet ra ʼauʼot? ¿Qataq négueʼt ca saishet ra ʼauʼot?
¿Táʼaencoʼ ra ʼamaqtaqaic ra ʼamalteʼ camayepi taq ra huoʼo naq ʼenec ʼanqaʼen qoʼ ra qongaʼ négueʼt ca iuen ra iʼamaqten?

5. Ra saʼaxataq ra noʼon nʼaxaỹaxac qomiʼ machiguiñi nqaʼen

Ñi Jehová ipataxalec ra nʼonataxanaxac so Jesús ra iʼaxatec ra noʼon nʼaxaỹaxac. ¿ʼEetec ra lmejnaxanaxac so Jesús reʼera nʼonataxanaxac? Qautaxaỹaxañi Juan 4:34 qataq qaumalligui neʼena:

Ra sacheguenaq ca noʼon nallic ỹoʼot ra queta ra ñiqaʼalaqtauec qataq qomiʼ machiguiñi. Ra qaiʼaxat ra nʼaqtac noʼon nʼaxaỹaxac huetaigui ra ʼeetapeguec ñi Dios. ¿Táʼaencoʼ ʼenapec so Jesús ra reʼera enaʼam ra sacheguenaq ca nallic?
ʼEetec ca ʼarcuennataxac, ¿négueʼt ca ʼachiquiaxacpi ishet ra ʼauaconguet ra ʼauʼaxatec ra noʼon nʼaxaỹaxac?

Na nqataxacpi

Ra qonetaña ca qaraponaxac ye la semana, ʼameten ʼeetec ishet ra ʼam chigoqtot ra ʼamalle na laỹi shiỹaxauapi.
ʼAnat ca ʼam ỹapaxaguetac ana la Biblia négueʼt ca iuen ra ʼauʼot yaqtoʼ ʼam qaỹalecnaxaneuo ca programa na naponaxac ye la semana. Queʼeca neʼenaqtaxanaxac ʼam qoỹanem ra ʼauʼot ishet ra ʼam itauan ra ʼanaỹamaxatta yaqtoʼ ishet ra ʼauʼaqtaxanem ca laỹipi ra ʼanapaxagueetega.
ʼAuʼogoxona ye laỹi «Huoʼo na nasaxauec ra» qataq «Huoʼo na renataxan ra» neʼena paxaguenaxac yaqtoʼ ʼanaỹamaxatta ʼeetec ra ʼauasateguet na nnataxacpi na shiỹaxauapi.

HUOʼO NA RENATAXAN RA: «¿Ca ʼeetec naxa?».

Ra nache ʼeetec ra ʼam qainat nache, ¿ʼeetec ishet ra ʼauʼaxatem ca qarỹa na ʼanapaxagueetega ra ʼanapaxaguenaxac aye la Biblia?

NA ʼAMAQTAQAIC

Ra saʼaxataq ra noʼon nʼaxaỹaxac qomiʼ machiguiñi nqaʼen, qataq petaʼa ʼacuennataxana ra qalaqaic ra ʼauʼot, qalaxaye ishet ra ʼauañoxot reʼera.

ʼAntoueetaʼac

¿Táʼaencoʼ huoʼo ra naigui ra saʼaqtaxanaxam ra noʼon nʼaxaỹaxac na laỹipi?
Ra ʼauʼaxat na nʼaqtac nache, ¿ʼeetec ishet ra ʼauoʼo naq ʼenec ca ʼamaltegue?
¿ʼEetec ishet ra ʼanapacalec na ʼayiʼiỹaxapi?

Na paxaguenaxat qaimat na naʼaq:

Na maiche ra ʼauʼot

ʼAcuennate ca shiỹaxaua ra ʼauotaique ra ʼauʼaqtaxanem ra nʼaqtac. Ime nache ʼacuennate négueʼt ca ʼauʼaqtaxanem, ca qontec ra ʼauʼaqtaxanem qataq lágui ra ʼauʼot.

Ca laỹipi:

Ca laỹipi