So Jesús rapaxaguenataxanec ra ca shiỹaxaua huotaique ra cristiano, nache iuen ra nachel (ʼautaxaỹaxan Mateo 28:19, 20). Qalaxaye, ¿négueʼt ca naigui ra achelaxac? ¿Qataq négueʼt ca iuen ra ỹoʼot ca shiỹaxaua yaqtoʼ iviraʼa reʼera ʼeetapeguec?

1. ¿Négueʼt ca naigui ra achelaxac?

Ra nʼaqtac achelaxac chegaqaigui ra griego lʼaqtac maye naigui ra «qaiuomaxaañi» huangui ca ʼetaxat. So nachel so Jesús somaye qaiuomaxaañi huangui so tala Jordán, qaq ime nache «nnoxooshiguem so ʼetaxat» (Marcos 1:9, 10, TBSNT). Ra nachel na ʼeesa cristianopi taqaʼen qaiuomaxaañi huangui ca ʼetaxat.

2. ¿Négueʼt ca ỹachaxan ca shiỹaxaua ra nachel?

Ca shiỹaxaua ra nachel, ỹachaxan ra masheye ra nañanot ñi Jehová. ¿Qaq négueʼt ca iuen ra qaỹoʼot yaqtoʼ qanañanot ñi Jehová? Ñi ʼoonolec iuen ra natamenot ñi Dios iʼaqtaxanem ra huotaique ra chochaq tateec ra ỹiʼoxoren. Reʼera huaʼauñe iuen ra qaỹoʼot. Seʼeso atamnaxac ca shiỹaxaua nañan, ỹachaxanapec ra ndaʼ ra ỹiʼoxoren ñi Jehová qataq ra ỹactec ʼamaqtaqaic ca nachaalataxac nachera ra ỹoʼot ca lauela ñi Dios. Taqaʼen lcaʼauʼa ra quegue ra laloqnaxanaxat taq na lapaxaguenataxanaxacpi so Jesús, maye ʼenapec: «Da huoʼo ca nshitaique da aỹim quegue, qaq noʼon da ỹalat ʼenauac na maichi lhuennataxa, ime, qaq aỹim quegue» (Mateo 16:24, TBSNT). Qanaʼachec ra nʼañanaxac qataq achelaxac, queʼeca shiỹaxaua ishet ra ỹataqta nauochaxaua ñi Jehová qataq na laỹipi ỹiʼoxoretac ñimaye.

3. ¿Négueʼt ca iuen ra ʼauʼot yaqtoʼ ishet ra ʼanachel?

Ra ʼauotaique ʼanachel huaʼauñe iuen ra ʼanapaxaguena ra lataxac ñi Jehová qataq ʼauʼot ca ʼarpiʼiỹaxac ñimaye (ʼautaxaỹaxan Hebreos 11:6). Ra nquictashiguem ra ʼarauattonaxanaxac qataq ra ʼarpiʼiỹaxac taqaʼen nquictashiguem ra ʼauauotec ñi Jehová. Qaq reʼera ỹoʼot ra ʼaryaxa ra ʼauʼaxatec ra nʼaqtac qataq ra ʼaualaxaguet na namaxasoxonaxacpi huetalec aye la Biblia (2 Timoteo 4:2; 1 Juan 5:3). Ra lataxac ca shiỹaxaua «nateeteguet ram ỹoqta ʼeetapeguec ñi Jehová» nache ishet ra lcaʼauʼa ra nañanot ñi Dios qataq nachel (Colosenses 1:9, 10, NWT). a

 ÑIMITAQ RA PAXAGUENAXAT

4. Na qomiʼ ỹapaxaguenque so nachelaxac so Jesús

Yaqtoʼ nquiguec ra qaỹaỹaten so nachelaxac so Jesús, qautaxaỹaxañi Mateo 3:13-17. Ime nache qaumalligui neʼena:

• So nachel so Jesús, ¿ñaq ʼoshaic somaye?

• ¿Qaicorelec na lqaic somaye so iyeta ʼetaxat? ¿Qaq ʼeetec so nachel?

So nachel so Jesús nache chigoqchigui ra ipaquejlec so nʼonataxanaxac ỹanem ñi Dios. Qautaxaỹaxañi Lucas 3:21-23 taq Juan 6:38, qataq qaumalligui neʼena:

• So ime ra nachel, ¿négueʼt so nʼonataxanaxac ỹactec ra ỹoʼot ra naigui so Jesús?

5. Ra achelaxac ishet ra qanalotauaʼa

Petaʼa huoʼo ra ʼayiʼiỹaxa ra ʼacuennataxana ra ʼanañan qataq ʼanachel. Qalaxaye ra queta ra ʼanapaxagueetega ra lataxac ñi Jehová qataq nquictashiguem ra ʼauauatton ñimaye, nache ishet ra itchiguiñi ra ʼalcaʼauʼa reʼera ʼamaqtaqaic lliquiaxac. Yaqtoʼ sauattonaq ca shiỹaxauapi ra masheye ỹañoxot reʼera, qaumichiñi na VIDEO.

Qautaxaỹaxañi Juan 17:3 qataq Santiago 1:5, qataq qaumalligui neʼena:

• ¿Négueʼt ca ishet ra itauan ca shiỹaxaua yaqtoʼ naỹamaxattaʼaguet ra achelaxac?

1. Nañanqot ñi Jehová ra saʼaqtaxanaxam ra sauoqtaique shiʼoxorenaq ñimaye chochaq tateec.

2. Ra ñachelaq nache sachaxanam na shiỹaxauapi ra masheye nañanqot ñi Dios.

 6. Ca shiỹaxaua ra nachel, nache ỹaleuoigui na lauoʼ lʼecpi ñi Jehová

Ra ñachelaq, nache salegaxaigui na nhuoʼ lʼecpi huetaʼa ʼenauac ana ʼalhua qataq ỹataqta nhuoteetaʼt. Naiʼctaxa ra ỹottaʼaʼt ra sachegoxosoqtaʼague qoʼ qarataxac, ʼenauac qomiʼ ʼenaʼa na qaraʼamaqtenaxacpi taq qolaxague nam lqataxacpi aye la Biblia. Qautaxaỹaxañi Salmo 25:14 taq 1 Pedro 2:17 [TBSNT], qataq qaumalligui neʼena:

• Nateeteguet neʼenaua versículos, ¿négueʼt ca achiquiaxacpi qomiʼ ỹanem ra achelaxac?

 NA ʼAMAQTAQAIC

So Jesús rapaxaguenataxanec ra ca cristiano iuen ra qanachelaxan. Yaqtoʼ qanalotauʼa reʼera, ca shiỹaxaua iuen ra naʼatchiguiñi ra lpiʼiỹaxac ñi Jehová, quegue na lqataxacpi qataq nañanot ñimaye.

ʼAntoueetaʼac

• ¿Négueʼt ca naigui ra achelaxac, qataq táʼaencoʼ ra ỹataqta ʼamaqtaqaic?

• ¿ʼEetec ra nʼañanaxac nateeteguet ra achelaxac?

• ¿Négueʼt ca iuen ra huaʼauñe ỹoʼot ca shiỹaxaua yaqtoʼ ishet ra nañan qataq nachel?