Ñi Jehová huotaique ra sauattonaq na lhuoʼ lʼecpi huetaʼague ra piguem. Na lhuoʼ lʼecpi ñi Dios huetaigui na namaxashecpi piguem lʼecpi, taqaʼen qaỹauatton ra «llalaqpi» ñi Dios (Génesis 6:2; Job 38:7). ¿ʼEetec ra rapaxaguenataxanec aye la Biblia na namaxashecpi piguem lʼecpi? ¿Négueʼt na ỹoʼot namayepi? ¿Ỹalectauʼa na lhuoʼ lʼecpi ñi Dios ʼenauac na namaxashecpi piguem lʼecpi?

1. ¿Négueʼt na namaxashecpi piguem lʼecpi?

Ñi Jehová huaʼauñe ra ỹoʼot na angelpi, qaq ime nache ỹoʼot ana ʼalhua. ʼEetaʼam ñimaye, namayepi saq chaʼa qataq lmaʼ ra piguem (Hebreos 1:14). Ỹataqta qalota na angelpi qataq ñi ʼoonolec saq ʼenaʼam ra lataxac ca lỹa (Apocalipsis 5:11). Aye la Biblia ʼenapec namayepi «qaupaquiichiguilo naua laʼaqtaqa [Jehová, NWT], qataq qaualaqaigueta naua lamaxasoxonaxaco Ñimaye» (Salmo 103:20). Coʼolloxochiye, huoʼo so huaña ñi Jehová ỹamaq na angelpi yaqtoʼ iʼaxat ra nʼaqtaxanaxac taq retaunaxan qataq ncaʼalaxateguesop so npueblo. Nagui na qonaqtaigui, na angelpi ỹauectaʼaguet na cristianopi yaqtoʼ ỹanata na shiỹaxauapi huotaique ra napaxaguena ra lataxac ñi Dios.

2. ¿Négueʼt so Satanás taq na demoniopi?

Huoʼo so angelpi ỹaxanec ra lpeʼet ñi Jehová. So huaʼauñe ra mpaʼaguen «nachiso so [...] mayi lʼatchiguiñi da datenataxan, lʼenaxat Satanás, som shiỹaxaua mayi lmaʼna» (Apocalipsis 12:9, TBSNT). So Satanás huotaique ra ramaxasoxoolec ca laỹipi, ỹoqoʼoye ỹoʼot ra so huaʼauchiguiñi shiỹaxauʼ saq ỹalaxagueta ñi Jehová. Qaq so lcopaʼague nache ỹañoxot ra so laỹipi angelpi taqaʼen ỹoʼot reʼera. Seʼeso mpaʼaguen angelpi qaiỹaxana ra demoniopi. Ñi Jehová iʼorauec ra piguem nache iʼoralec ana ʼalhua, taqaʼen yaqtaʼa ra nlaxajñe namayepi (ʼautaxaỹaxan Apocalipsis 12:9, 12).

3. ¿ʼEetec ra huotaique qomiʼ ỹatenachet so Satanás taq na demoniopi?

So Satanás taq na demoniopi ỹatenachet na qalota shiỹaxauapi ỹauotaʼa na espiritismo qoʼ na ỹottaʼaʼt ocultismo. Reʼera camachaqca nʼonataguecpi huetaigui ra qanʼaqtaxaneʼ na saq yoʼoqpi. Qaỹaloqnaxana, huoʼo na shiỹaxauapi itaxaỹaxan na horóscopo qaq na laỹipi nqoʼonua na astrólogopi, na ilaviigui ca lỹa, na iʼaxatta ca ñaq natauo, na piʼoxonaqpi qataq na conaxanaxaicpi. Huoʼo na nmittaique na lataʼ yaqtoʼ noʼoita qalaq reʼera nʼattauʼa na ocultismo. Qataq huoʼo na qaipetaqchet ra ishet ra remalli na leuaxaicpi. Qalaxaye ñi Jehová qomiʼ iquiyeguen: «Saishet qome da qanqoʼoñiỹa ca ltaxaỹaxaua na nquiʼipi, qataq ca ilaviigui ca lỹa» (Levítico 19:31). Ñimaye huotaique ra qomiʼ npaxalguete ra latenataxanaxac so Satanás taq na demoniopi chaʼaye mpaʼaguenaxauapi ñimaye qataq huotaique ra qomiʼ iquemaqchet.

 ÑIMITAQ RA PAXAGUENAXAT

6. ʼAuauegaxan ca nhuaganaxac ra qaỹataỹaʼaguet so Satanás taq na demoniopi

So Satanás nacheso so ilotalec na demoniopi. Qalaxaye na namaxashecpi piguem lʼecpi npeʼetpi ilotalec so Miguel, maye lỹa lʼenaxat qoỹanem so Jesús. ¿Lcata ra lʼañaxac so Miguel? Qautaxaỹaxañi Apocalipsis 12:7-9 qataq qaumalligui neʼena:

• ¿Négueʼt ca ỹactec ra lʼañaxac: so Miguel taq na lamaxashecpi piguem lʼecpi qoʼ so Satanás taq na demoniopi?

• ¿ʼAuʼamaqten ra na quetagueʼ so Cristo iuen ra ñiʼiỹa so Satanás taq na demoniopi?

ʼAm ishet ra ʼauauegaxan ca nhuaganaxac ra qaỹataỹaʼaguet so Satanás taq na demoniopi. Qautaxaỹaxañi Santiago 4:7 qataq qaumalligui neʼena:

• ¿ʼEetec ishet ra ʼantelaʼaguet ʼam so Satanás qataq na demoniopi?

 NA ʼAMAQTAQAIC

Na angelpi npeʼetpi qomiʼ itauan. So Satanás taq na demoniopi mpaʼaguenaxauapi ñi Jehová, qataq roʼogoxona na ocultismo yaqtoʼ ỹatenachet na shiỹaxauapi.

ʼAntoueetaʼac

• ¿Négueʼt na ỹoʼot na angelpi npeʼetpi yaqtoʼ na shiỹaxauapi ỹauatton ñi Jehová?

• ¿Négueʼt so Satanás taq na demoniopi?

• ¿Táʼaencoʼ ra saishet ra ʼauʼot camachaqca naʼattaguet na ocultismo?