Ana la Biblia ʼenapec ra na shiỹaxauapi huoʼo «da nachaalataxac sa qaỹaʼague qataq qalota na nqueʼeenaxacpi» (Job 14:1). Qalaxaye, ¿ʼera ra qanachaalataxac lauela ñi Dios? Qaq ra saishet ra nache ʼeetec, ¿négueʼt ca ʼeetapeguec ñi Dios so qomiʼ ỹoʼot? ¿Huoʼo ca naʼaq ra ipacchigui? ʼAmeten ra noʼon lasataxac aye la Biblia.

1. ¿ʼEetec ca qanachaalataxac lauela ñi Dios?

Ñi Jehová huotaique ra noʼon ca qoyiquiaxac. So ỹoʼot so huaʼauchiguiñe shiỹaxauʼ Adán qataq Eva, ỹanalec so mataqaʼ ỹataqta ʼonaxaic, so nanguishec Edén. Huaiye ñi Dios «ỹanema da noʼon laʼaqtac, ʼeetaʼ: ‹Ỹataqta qalota qome ca qaỹaʼalquipi, qanlaxacheetelec ana ʼalhua qataq qauloỹeegue›» (Génesis 1:28). Ñi Jehová huotaique ra huoʼo ca llalaqpi soua maye, ỹoʼot ra mataqaʼ ʼenauac ana ʼalhua qataq ra iloʼogue na shiguiỹacpi. Ra ʼeetapeguec ñi Dios nachera: ra ʼenauac na shiỹaxauapi noʼoita nalochiguiñi qataq ra chochaq tateec ra ncaʼaltauec.

Naiʼctaxa ra saishet ra nache ʼeetec reʼera, a ra ʼeetapeguec ñi Dios saishet ra nqochen (Isaías 46:10, 11). Ñimaye queta ra huotaique ra na shiỹaxauapi laxaraicpi chochaq tateec ra ncaʼaltauec huetaña ca nalochiguiñi (ʼautaxaỹaxan Apocalipsis 21:3, 4).

2. ¿ʼEetec ishet ra ñitonaqtapeguec ra qanachaalataxac nagui?

So qomiʼ ỹoʼot, ñi Jehová nqaʼen ñanaqteueegue ra ñauatonaxalaʼt ra seuenaq ra ltaunaxanaxac ñimaye, naigui ra qaryaxa ra sauattonaq taq shiʼoxorenaq (ʼautaxaỹaxan Mateo 5:3-6, TBSNT). Ñi Dios huotaique ra ỹataqta qanauochaxaua ñimaye, ra salaxasoxoguet, ra sauotaxac qataq ra shiʼoxorenaq ʼenauac ra qarquiyaqteỹaxac (Deuteronomio 10:12; Salmo 25:14). Ra soʼotaq ʼenauac reʼera, nache ishet ra ỹataqta samaxasoqchiguiñe naiʼctaxa ra huoʼo na nqalanaxacpi. Ra shiʼoxorenaq ñi Jehová, nache ỹoʼot ra huoʼo ra ʼeetapeguec ra qanachaalataxac

4. Ra ʼeetapeguec ñi Jehová saishet ra nqochen

Qautaxaỹaxañi Salmo 37:11, 29 taq Isaías 55:11, qataq qaumalligui neʼena:

• ¿ʼEetec ra saỹatenaq ra ʼeetapeguec ñi Jehová so qomiʼ ỹoʼot saishet ra nqochen?

5. Ra shiʼoxorenaq ñi Jehová nache ỹoʼot ra huoʼo ra ʼeetapeguec ra qanachaalataxac

 NA ʼAMAQTAQAIC

Ñi Jehová huotaique ra ñitonaqtapeguec ra achaalataxac chochaq tateec qataq nalochiguiñi huaña ana ʼalhua. Qalaxaye nagui taqaʼen ra qanachaalataxac huoʼo ra yoqta ʼeesa ʼeetapeguec ra shiʼoxorenaq ñi Jehová imauec ra qarquiyaqteỹaxac.

ʼAntoueetaʼac

• ¿Négueʼt so ʼeetapeguec ñi Jehová ra ỹoʼot so Adán qataq Eva?

• ¿ʼEetec ra saỹatenaq ra ʼeetapeguec coʼollaxa ñi Dios so qomiʼ ỹoʼot saishet ra nqochen?

• ¿Négueʼt ca ʼam itauan yaqtoʼ ʼantootapeguec ra ʼanachaalataxac nagui?