Soua huaʼauchiguiñe shiỹaxauʼ, Adán qataq Eva, saq ỹalaxagueta ñi Dios. Ỹoqoʼoye huoʼo ra qarasouaxashet, qanqueʼejnaxac qataq seleuaq. a Qalaxaye huoʼo ra qanaquitaxac. Ñi Jehová huoʼo so ỹoʼot yaqtoʼ qomiʼ isoueguesop ra nasouaxashet qataq ra nleuaxa chigoqchigui so Llalec, Jesucristo. Aye la Biblia rapaxaguenataxanec ra chigoqchigui ra l-leuaxa, so Jesús isheeten aso lashiue. Qaq aso lashiue deshiitenaxana so Jesús nacheso so nachaalataxac nalochiguiñi (ʼautaxaỹaxan Mateo 20:28, TBSNT). So Jesús maiche chegoqtoʼot ra lcaʼauʼa ra saishet ra chochaq tateec ra ncaʼaltauec huetalec ana ʼalhua. So ỹoʼot reʼera, nache ỹauatec so nqaʼaic yaqtoʼ ishet ra qomiʼ ỹeʼeguelaxa ʼenauac so ỹaqataqchet so Adán qataq Eva. Qataq taqaʼen ỹachaxan lcata ra qomiʼ ỹauotec ñi Jehová qataq somaye. Neʼena paxaguenaxat ʼam itauan ra nquictauec ra anachiquiaxac ra l-leuaxa so Jesús.

1. ¿ʼEetec ra qomiʼ itauan nagui ra l-leuaxa so Jesús?

Ye huoʼo ra qarasouaxashet qalota na soʼotaq saq ỹaỹamaxaren ñi Jehová. Qalaxaye ishet ra iviraʼa ra qomiʼ noʼon nauochaxaua ñi Dios ra ʼeesa ra ñetouenaqtac na qarasouaxashetpi qataq seỹaxanqot ñi Jehová chigoqchigui so Jesús ra qomiʼ ichoxoren, qataq taqaʼen ra ñaʼañaxataq ra saishet ra ỹoltaxa soʼotaq queʼeca qarasouaxashetpi (1 Juan 2:1). Ana la Biblia ʼenapec: «Chaʼaye So Cristo ʼoonolec coʼollaxa da ileu, nache sa lỹa da ỹeʼeguelaxalec da ileu, da yaqtoʼ ỹapalaxat na qarasouaxashetpi [...] souaxat na ʼetaxaloxoicpi da yaqtoʼ qamiʼ qaviyeetaʼa da qanauochaxauai Ñim Loʼonatac ʼEnauacna» (1 Pedro 3:18).

2. ¿ʼEetec ra qomiʼ itauan qomchiye ra l-leuaxa so Jesús?

Ñi Jehová namaq so Llalec ra ỹan so nachaalataxac nalochiguiñi «yaqtoʼ ʼenauac nam ỹaʼamaqten namaye [Jesús] saishet da ileu, nachaqrata da huoʼo da lcaʼalaxa maye chochaq tatec» (Juan 3:16). Qanaʼachec so ỹoʼot so Jesús, ñi Jehová yaqtaʼa ra ỹapalaxat ʼenauac na qauemsat souaxat ra so Adán saq ỹalaq. Reʼera naigui ra sachaxanaq ra huoʼo ra qarpiʼiỹaxac so nʼañanaxac so Jesús, ishet ra ñitonaqtapeguec ca achaalataxac chochaq tateec ana ʼalhua mataqaʼ (Isaías 65:21-23).

 ÑIMITAQ RA PAXAGUENAXAT

3. Ra l-leuaxa so Jesús qomiʼ isoueguesop ra nasouaxashet qataq nleuaxa

1. So Adán ỹale nalochiguiñi coʼollaxa, qaq so saq ỹalaxaguet ñi Dios ỹauega na shiỹaxauapi ra nasouaxashet qataq nleuaxa.

2. So Jesús ỹale nalochiguiñi, qaq so ỹalaxaguet ñi Dios ỹauatec so nqaʼaic yaqtoʼ na shiỹaxauapi ishet ra nalochiguiñi qataq chochaq tateec ra ncaʼaltauec.

4. Ra l-leuaxa so Jesús ishet ra itauan ʼenauac na shiỹaxauapi

 5. Aso lashiue ra lcaʼalaxa lachetaqtaxanaxat ñi Jehová ʼam ỹanem

Na nauochaxauapi ñi Jehová nanomteguet ra aso lashiue ra lcaʼalaxa nachetaqtaxanaxat qoỹanem ñi ʼoonolec. Yaqtoʼ qaỹauatton ca ʼoonolec naloqnaxanaxat, qautaxaỹaxañi Gálatas 2:20 qataq qaumalligui neʼena:

• ¿Négueʼt caua lʼaqtaqa so apóstol Pablo ỹachaxan ra nanomteguet ra aso lashiue ra ncaʼalaxa qoỹanem ñi ʼoonolec?

So repeʼenaxan so Adán, somaye qataq ʼenauac na llalaqpi iviraʼa ra ileu. Qalaxaye ñi Jehová namaxa so Llalec ana ʼalhua ra ileu yaqtoʼ ʼam huoʼo ca ʼanaquitaxac ra chochaq tateec ra ʼancaʼaltauec.

Ra ʼautaxaỹaxan neʼenaua versículopi, ʼanʼañaxat ra ʼacuennataxana ʼeetec ra lquiyaqteỹaxac ñi Jehová so ilotaʼa ra nqueʼejnaxac so Llalec. Qautaxaỹaxañi Juan 19:1-7 taq 16-18, qataq qaumalligui neʼena:

• ¿ʼEetec ca ʼarquiyaqteỹaxac ra ʼacuennataxana so ỹoʼot ñi Jehová qataq Jesús souaxat ʼam?

 NA ʼAMAQTAQAIC

Qanaʼachec ra l-leuaxa so Jesús, ñi Jehová ỹapalaxat na qarasouaxashetpi qataq qomiʼ ỹanem ra qanaquitaxac ra chochaq tateec ra ñicaʼalaqtauec.

ʼAntoueetaʼac

• ¿Táʼaencoʼ ra ileu so Jesús?

• ¿ʼEetec ra nachaalataxac nalochiguiñi so Jesús «isheten aso lashiue ra lcaʼalaxa»?

• ¿ʼEetec ra ʼam itauan ra l-leuaxa so Jesús?