¿Petaʼa mashe ileu ca ʼanauochaxaua qoʼ ʼarhuoʼ lʼec maye ʼam ʼauauotec? Seʼeso qouaigui ỹataqta quiʼaq, nache petaʼa ʼannajlat: «¿Ca ʼeetec ra aloic na leuaxaicpi? ¿Ishet ra ỹoltaxa selaʼa na ỹauotaxatpi?». Neʼena paxaguenaxat qataq ca lỹa semetenaq na lasataxacpi qomiʼ ỹanem aye la Biblia qataq qomiʼ iʼañaqchet.

1. ¿ʼEetec ca aloic na leuaxaicpi?

So Jesús raloqnaxana ra nleuaxa ʼeetaʼam ca noʼochaxa qoỹoqchiguingui. ¿Táʼaencoʼ ra nleuaxa ʼenaʼam ca noʼochaxa? Ca shiỹaxaua ra roʼochetum saq nanoma nam coleeteguesop. Ra huoʼo na ileu, saishet ra nanomteguet na nquiʼic qataq qaica ca nqueʼejnaxac. Ana la Biblia ʼenapec ra «nam leuaxaicpi qaica ca ỹaỹaten» (ʼautaxaỹaxan Eclesiastés 9:5).

2. ¿Táʼaencoʼ ra qomiʼ itauan ra saỹatenaq na ʼeesa ra nleuaxa?

Qalota na shiỹaxauapi huoʼo ra lliʼiỹaxa ra nleuaxa, qataq taqaʼen na leuaxaicpi. Ra ʼam nache ʼeetec ca qouaigui, ra ʼenapec aye la Biblia ra nleuaxa ishet ra ʼam nmanaqchet. So Jesús ʼenapec: ra «ʼeesa lataxac, nachera da ỹataqta qamiʼ huesochiyiñi naqaʼen» (Juan 8:32). Npeʼenguet na lapaxaguenataxanaxac na nʼamaqtenaxacpi, aye la Biblia saishet ra iʼaxat ra na shiỹaxauapi huoʼo ca lquiʼi saq chaʼa qoʼ ra huoʼo ca netaña ra ñaq ncaʼaltauec na mashe ileu. Ỹoqoʼoye cam ileu, qaica ca nqueʼejnaxac. Ye na leuaxaicpi qaica ca ỹaỹaten, saq ishet ra huoʼo ca qomiʼ ỹoʼoteque qauem. Ỹoqoʼoye saishet ra iuen ra qanatamelec qataq qaỹiʼoxoren yaqtoʼ qanmanaqchet namayepi.

Huoʼo na shiỹaxauapi ʼenapec ra ishet ra remaltegue na leuaxaicpi. Qalaxaye reʼera saq ishet ra qaỹoʼot. Mashiye semetenaqtac ra «nam leuaxaicpi qaica ca ỹaỹaten». Nam iʼamaqten ra remaltegue na shiỹaxauapi mashe ileu, saq nanoma ra nachena na demoniopi remaltegue maye iʼenaxatchigui ra lataxac na mashe ileu. Ỹoqoʼoye ra saỹatenaq ra yoqta ʼeesa ra nleuaxa, qomiʼ npaxalguete na demoniopi. Ñi Jehová qomiʼ iquiyeguen ra saishet ra semallaxai na leuaxaicpi, chaʼaye ỹaỹaten ra chaqaic ca souaqaigui ra semallaxai na demoniopi (ʼautaxaỹaxan Deuteronomio 18:10-12).

3. Na yoqta aloic ñi ʼoonolec ra ileu

ʼEnauac ana ʼalhua, huoʼo na ỹottaʼaʼt nʼamaqtenaxac na souaqaigui ra seleuaq. Qalaxaye saishet ra ʼenauac neʼena nʼamaqtenaxacpi yoqta ʼeesa.

• ¿Négueʼt ca nʼamaqtenaxac na leuaxaicpi iʼamaqten na shiỹaxauapi cam qonetaña?

 4. Ra ʼeesa ra nleuaxa qomiʼ isoueguesop

Ra saỹatenaq ra ʼeesa ra nleuaxa qomiʼ isoueguesop ra ñiʼiỹaxa na leuaxaicpi. Qautaxaỹaxañi Eclesiastés 9:10 qataq qaumalligui neʼena:

• ¿Ishet ra qomiʼ naʼaqchet na leuaxaicpi?

Na ʼeesapi huetalec ana la Biblia taqaʼen qomiʼ isoueguesop na nʼamaqtenaxac ra iuen ra qanmanaqchet qoʼ qaỹiʼoxoren na leuaxaicpi. Qautaxaỹaxañi Isaías 8:19b [NWT], maye ʼenapec: «¿Iuen na shiỹaxauapi ra inat na leuaxaicpi ra renataxalec ra itauan ra ñaq ncaʼaltauecpi? Qalaq ỹaỹamaqchiguiñi ra na pueblo inat ñi Dios», qataq Apocalipsis 4:11 qataq qaumalligui neʼena:

• Ra huoʼo ca ỹiʼoxoren na leuaxaicpi qoʼ nmittaique ra ltaunaxanaxac namayepi, ¿ʼam négueʼt ca ʼauʼamaqten ra lquiyaqteỹaxac ñi Jehová?

5. Na ʼeesa napaxaguenataxanac ra nleuaxa qomiʼ iʼañaqchet

Qalota na shiỹaxauapi qaỹapaxaguenec ra qom ileu nache huoʼo ra nqueʼejnaxac souaxat na ỹoʼottac qauem so ñaq ncaʼaltauec. Qalaxaye qomiʼ iʼañaqchet ra saỹatenaq ra huoʼo ñi ileu nache qaica ca nqueʼejnaxac, naiʼctaxa ra ỹoʼot ca ỹataqta qauem. Qautaxaỹaxañi Romanos 6:7 [TBSNT] qataq qaumalligui neʼena:

• Aye la Biblia ʼenapec ra na nleuaxa isoueguesop ca shiỹaxaua ra lasouaxashet. Nache, ¿ʼauʼamaqten ra na leuaxaicpi huoʼo ra nqueʼejnaxac souaxat ra isheeten na lasouaxashetpi coʼollaxa?

Ra nquictashiguem ra sauattonaq ñi Jehová, nache ỹataqta saỹatenaq ra ñimaye huanna ra ỹoʼot ra nqueʼejnaxac na leuaxaicpi. Qautaxaỹaxañi Deuteronomio 32:4 taq 1 Juan 4:8, qataq qaumalligui neʼena:

• Neʼenaua versículos iʼaxat ra ʼonaxaic lataxaco ñi Dios, nache, ¿ỹaxanec ra qaỹoʼot ca nhuaxanaguec na shiỹaxauapi mashe ileu?

• ¿ʼAuʼamaqten ʼam ca ʼeesa napaxaguenataxanaxac ca nleuaxa qomiʼ iʼañaqchet? ¿Táʼaencoʼ?

 NA ʼAMAQTAQAIC

Ra huoʼo ñi ileu, nache imeuo ra lcaʼalaxa. Na leuaxaicpi qaica ca nqueʼejnaxac qataq saq ishet ra naʼaqchet na laỹipi.

ʼAntoueetaʼac

• ¿Ca ʼeetec ca aloic na leuaxaicpi?

• ¿Táʼaencoʼ ra qomiʼ isoueguesop ra saỹatenaq ra ʼeesa napaxaguenataxanaxac ra nleuaxa?

• ¿Táʼaencoʼ ra qomiʼ iʼañaqchet ra ʼeesa napaxaguenataxanaxac ra nleuaxa?