Nagui ye ʼanapaxagueetega ana la Biblia, ¿ʼananomtaʼa ra ỹataqta ʼanquigot ñi Dios? ¿ʼArauela ra reʼera ʼarauochaxac ñimaye nquictauec ra qaramchigui? Ra nache ʼeetec reʼera, ʼantoueetaʼac ra ñi Jehová ilotaʼa ra nquictauec ra ʼauauotec, nache ñimaye taqaʼen nquictauec ra ʼam ỹauotec qataq ʼam iloʼogue. ¿ʼEetec ishet ra ʼauachaxanot ʼam ra ʼauauotec ñimaye?

1. ¿ʼEetec ra sachaxanqot ñi Jehová ra sauotaxac?

Ra salaxasoxoguet nache sachaxanqot ñimaye ra qarauotaxanaqtaic (ʼautaxaỹaxan 1 Juan 5:3). Qalaxaye ñimaye qaica ca ỹamaqtapeguelec ra ỹalaxaguet. Ndaʼ ra qomiʼ ỹanem ra ishet ra llicaʼaxauʼa ra salaxasoxoguet qoʼ saishet. ¿Táʼaencoʼ? Chaʼaye ñi Jehová huotaique ra salaxasoxoguet «ỹataqta imauec» ra qarquiyaqteỹaxac (Romanos 6:17). Reʼera naigui ra ñi Jehová huotaique ra ʼam ʼaualaxaguet, qalaxaye saisheto ra ʼam qaỹamaqtapeguelec, ndaʼ ra souaxat ra ʼauauotec ñimaye. Ra ʼeetapeguec neʼenaua laỹi 3 taq 4 neʼena nere, nachera ra ʼam itauan ra ʼauachaxana ra ʼarauotaxanaqtaic ñi Jehová huetaigui neʼenaua dos lataxaco: ʼauʼottac ca ỹaỹamaxareeta ñimaye qataq ʼavitaʼaguet na saq ỹaỹamaxaren.

2. ¿Táʼaencoʼ ra ishet ra qalaqaic ra sachaxanqot ñi Jehová ra qarauotaxanaqtaic?

«Ca shiỹaxaua noʼon da lataxac qalota na ivireguet qauempi» (Salmo 34:19). ʼEnauac qomiʼ ñaʼañaxataxaguet na maiche qarpeʼenaxacpi. Qataq ỹalega petaʼa sataỹaqaʼaguet nam qalota qarhuenaxanaxac, na sa ỹaỹamaxañisat qataq ca laỹipi nqalanaxacpi. Ra souaqaigui na qauempi, nache petaʼa seqalanac ra soʼotaq na qomiʼ ỹaxañot ñi Jehová ra soʼotaq. Chaʼaye petaʼa saq alaq ra saishet ra salaxasoxoguet. Qalaxaye ra ʼanʼañaxat ra ʼauʼot na ʼam ỹaxanot ñi Jehová, nache ʼauachaxatecot ñimaye ra ʼarauotaxanaqtaic napacalec camachaqca. Qataq taqaʼen ʼauachaxanot ra saq ʼaxaneec ñimaye. Qaq ñimaye saq ʼam ỹaxaneec. Chaʼaye ñimaye ʼenapec: «saishet ra ʼam salat» (ʼautaxaỹaxan Hebreos 13:5).

4. ʼAuʼot ra machiguiñi ra lquiyaqteỹaxac ñi Jehová

Qautaxaỹaxañi Proverbios 27:11 qataq qaumalligui neʼena:

• ¿ʼEetec ra lquiyaqteỹaxac ñi Jehová ra ʼaualaxaguet qataq ra noʼon ca ʼalcaʼauʼa ra ʼauʼot? ¿Táʼaencoʼ?

 5. ʼAm ishet ra saq ʼaxaneec ñi Jehová

6. Ra salaxasoxoguet ñi Jehová qomiʼ itauan

Ra salaxasoxoguet ñi Jehová saxaỹet ra noʼon ra qoyiquiaxac. Qautaxaỹaxañi Isaías 48:17, 18 qataq qaumalligui neʼena:

• ¿ʼAuʼamaqten ʼam ra ñi Jehová ỹaỹaten nam qomiʼ nʼonaxat? ¿Táʼaencoʼ ra ʼarcuennataxac reʼera?

• ¿Ca ʼeetec ra ʼam itauan nam mashe ʼanapaxagueetega ana la Biblia qataq ra ʼauauattoota ñi Jehová, Ñim ʼeesa Dios?

 NA ʼAMAQTAQAIC

ʼAm ʼauachaxan ra ʼauauotec ñi Jehová ra ʼaualaxaguet qataq queta ra saq ʼaxaneec ñimaye naiʼctaxa ra qalaqaic.

ʼAntoueetaʼac

• ¿Négueʼt ca ʼam ỹapaxaguenec ra laloqnaxanaxat so Job?

• ¿ʼEetec ʼam ra ʼauachaxanapec ra ʼarauotaxanaqtaic ñi Jehová?

• ¿Négueʼt ca ʼam itauan ra nache queta ra saq ʼaxaneec ñi Jehová?