PAXAGUENAXAT 35
¿ʼEetec ra noʼon ca qalcaʼauʼa ra qaỹoʼot?
ʼEnauac qomiʼ iuen ra huoʼo ra llicaʼaxauʼa ca soʼotaq. Reʼera ishet ra qomiʼ nʼonaxat qoʼ naʼaqchet ra qanachaalataxac qataq ra qanauochaxac ñi Jehová. Saloqnaxanaxa, petaʼa iuen ra llicaʼaxauʼa huáʼague ca qarmaʼ, ʼeetec ra ñipaxajlexac ra qarhuenaxanaxa, qataq ra saronaq qoʼ saishet. Ra noʼon ca llicaʼaxauʼa ra soʼotaq, nache ishet ra samaxasoqchiguiñi qataq ñaqaʼenaq machiguiñi ñi Jehová.
1. ¿ʼEetec ana la Biblia ishet ra ʼam itauan ra noʼon na ʼalcaʼauʼa ra ʼauʼot?
Ra huoʼo ca ʼalcaʼauʼa ra ʼauʼot, huaʼauñe ʼaỹaxanot ca ltaunaxanaxac ñi Jehová, qataq ʼanʼañaxat ra ʼalalec aye la Biblia ra lhuennataxac ñimaye souaxat queʼeca ʼalcaʼauʼa (ʼautaxaỹaxan Proverbios 2:3-6). Huoʼo naxa ʼaulaʼa ñi Jehová ỹan na lamaxasoxonaxacpi tachigui ra yoʼoqchigui aloic. Nache noʼon ra ʼalcaʼauʼa ra ʼaualaxaguet.
Qalaxaye, ¿cam ʼeetec ra aye la Biblia saishet ra ỹan ca namaxasoxonaxac tachigui ca aloic, maye ỹataqtegue ra ỹachaxan négueʼt ca ʼauʼot? Naiʼctaxa reʼera, ñi Jehová ʼam ỹauecteuga ye «nqaʼaic maye iuen ra qoquegue» (Isaías 48:17). ¿Cam ʼeetec? Chigoqchigui na nqataxacpi ra ʼam ỹauecaʼaguet. Na nqataxacpi ana la Biblia nachena na ỹataqta ʼeesapi taq ʼamaqtaqaicpi ishet ra qomiʼ itauan ra saỹatenaqteguet ra lcuennataxac qataq ra lquiyaqteỹaxac ñi Jehová. Qataq neʼena qalota selaqalec ra setaxaỹaxanaq na nʼaqtaguec huetaigui aye la Biblia. Ra saỹatenaqteguet ra lmejnaxanaxac ñi Jehová, qomiʼ itauan ra ʼonaxaic ra llicaʼaxauʼa na soʼotaq maye ỹaỹamaxareeta ñimaye.
2. Ra huaʼauñe ra huoʼo ca ʼalcaʼauʼa ra ʼauʼot, ¿négueʼt ca iuen ra ʼannajlaʼt?
Ana la Biblia ʼenac: «Ca huoʼo na ỹaỹaten qalaq ilotagueʼ da lqauaxac» (Proverbios 14:15). Reʼera naigui ra huaʼauñe ra huoʼo ca ʼalcaʼauʼa, iuen ra ʼauennataxalec ra ỹottaʼaʼt ishet ra ʼauʼot. Ra ʼauennataxalec naua, iuen ra ʼannajlaʼt: «¿Négueʼt ca nqataxacpi huetalec aye la Biblia tachigui neʼena llicaʼauʼa? ¿Ỹoʼot ra ilaxagayec ca llicaʼauʼa? ¿ʼEetec ra ivirauga na laỹipi ra llicaʼauʼa? Qaq ra ʼamaqtaqaic, ¿ỹoʼot ra machiguiñi ñi Jehová?» (Deuteronomio 32:29).
Ñi Dios huoʼo ra ʼenec ra qomiʼ iʼaqtaxanem ca ʼonaxaic qataq ca qauem. Ra yoqta sauattonaq na lamaxasoxonaxacpi qataq nqataxacpi qataq ra itchiguiñi ra salaxasoxoguet, nache noʼon ye qantounaxac. Ra ntounaxac nachena na pauo navilỹaxac maye qomiʼ iʼaxatem négueʼt ca ỹaỹamaqchiguiñi qataq saq ỹaỹamaxañi (Romanos 2:14, 15). Ra noʼon qaỹapaxaguenec ye qantounaxac qomiʼ itauan ra noʼon ca llicaʼaxauʼa ra soʼotaq.
ÑIMITAQ RA PAXAGUENAXAT
Nquiguec ra ñapaxaguenaxa ra ʼenec qoỹanem na nqataxacpi aye la Biblia qataq ra ntounaxac qom huoʼo ca llicaʼaxauʼa ra soʼotaq.
3. ʼAxaneec ra aye la Biblia ʼam ỹauecaʼaguet
¿ʼEetec ra qomiʼ ỹauecaʼaguet na nqataxacpi aye la Biblia ra iuen ra huoʼo ca llicaʼaxauʼa ra soʼotaq? Qaumichiñi na VIDEO qataq qaumalligui neʼena:
-
¿Négueʼt ca nachetaqtaxanaxat huoʼo ra lyac qomiʼ ỹanem ñi Jehová?
-
¿Táʼaencoʼ ñi Jehová qomiʼ ỹanem ra huosoxoc ra maiche llicaʼaxauʼa ra soʼotaq?
-
¿Négueʼt ca qomiʼ ỹanem ñi Dios yaqtoʼ qomiʼ itauan ra noʼon ca llicaʼaxauʼa ra soʼotaq?
Yaqtoʼ qaimeten ra ʼoonolec naloqnaxanaxat ca nqataxac aye la Biblia, qautaxaỹaxañi Efesios 5:15, 16. Ime nache qaumalligui ʼeetec ishet ra ñoqopitaxanaqtapegue «naua naʼaxaʼte» ra soʼotaq «ca ỹaỹamaqchiguiñi» ra...
-
qaitaxaỹaxan aye la Biblia ʼenauaque naua naʼaxaʼte.
-
noʼon nhua, ntaʼal qoʼ ñalacpi.
-
qaỹalectauaʼa ca naponaxacpi añi la congregación.
4. ʼAuapaxaguen na ʼantounaxac yaqtoʼ noʼon ra ʼalcaʼauʼa
Ra huoʼo ca lamaxasoxonaxac aye la Biblia tachigui ca aloic, nache ỹactec ra saq alaq ra llicaʼaxauʼa ca ỹaỹamaqchiguiñi. Qalaxaye, ¿qaq ra qaica? Qaumichiñi na VIDEO qataq qaumalligui neʼena:
-
Souaxat na video, ¿négueʼt so ỹoʼotpi aso qarqaỹa yaqtoʼ ỹapaxaguen ra ntounaxac taq ca lcaʼauʼa ra ỹoʼot ỹaỹamaxareeta ñi Jehová?
¿Táʼaencoʼ ra saishet ra iuen ra seỹaxanqot ca lỹa ra lcaʼauʼa ca iuen ra llicaʼaxagui qomiʼ? Qautaxaỹaxañi Hebreos 5:14 qataq qaumalligui neʼena:
-
Naiʼctaxa ra ishet ra saq alaq ra seỹaxanqot ca lỹa ra lcaʼauʼa ca iuen ra llicaʼaxagui, ¿táʼaencoʼ ra ñi ʼoonolec iuen ra iviraʼa ra ỹaỹaten ca ỹaỹamaqchiguiñi?
-
¿Négueʼt ca ntaunaxanaxacpi ishet ra qomiʼ itauan ra sapaxaguenaq na qantounaxac qataq ra noʼon ca llicaʼaxauʼa?
Ra ntounaxac ʼenaʼam ca mapa, maye qomiʼ itauan ra llicaʼaxauʼa ca soʼotaq ra qanachaalataxac.
5. ʼAuauoʼo ra ʼenec na ntounaxac na laỹipi
Ye ʼenauac saq qomiʼ ʼenaʼa na llicaʼaxaʼaguepi taqaʼen saq ʼenaʼa. ¿ʼEetec ishet ra sachaxanaq ra sauoqoʼo ra naigui na ntounaxac na laỹipi? Semetenaq caua dos naloqnaxanaxat:
Naloqnaxanaxat 1: Aso qarqaỹa maye nmeten ra naʼameta nqochenaʼat so congregación maye qalota na qarqaỹañecpi alpi saq maguiñi ra huoʼo añi naʼameta.
Qautaxaỹaxañi Romanos 15:1 taq 1 Corintios 10:23, 24, qataq qaumalligui neʼena:
-
Nateeteguet neʼenaua versículos, ¿négueʼt ca ishet ra lcaʼauʼa ra ỹoʼot aso qarqaỹa? Qaq ʼam, ¿négueʼt ca ʼauʼot ra ca ntounaxac ca lỹa shiỹaxaua saq ỹashenem ra ỹoʼot ca ʼam ỹashetem ra ʼantounaxac ra ʼauʼot?
Naloqnaxanaxat 2: So qarqaỹa ỹaỹaten ra aye la Biblia saishet ra ʼenapec ra saq ỹaỹamaxañi ra qanỹomgui na lataxa, qalaxaye somaye lcaʼauʼa ra saishet ra nỹomgui. Huoʼo so naʼaq qaiỹaxana ra ỹalectaʼaguet na qarqaỹañecpi nache ilaʼa somayepi ra nỹomtapigui na lataxa.
Qautaxaỹaxañi Eclesiastés 7:16 taq Romanos 14:1, 10, qataq qaumalligui neʼena:
-
Nateeteguet neʼenaua versículos, ¿négueʼt ca ishet ra lcaʼauʼa ra ỹoʼot so qarqaỹa? Qaq ʼam, ¿négueʼt ca ʼauʼot ra ʼaulaʼa ca lỹa shiỹaxaua ra ỹoʼot ca saishet ra ʼam ỹashenem ra ʼauʼot ra ʼantounaxac?
¿Négueʼt ca iuen ra ʼauʼot yaqtoʼ noʼon ca ʼalcaʼauʼa?
1. ʼAviaxanot ñi Jehová ra ʼam itauan ra ʼalcaʼauʼa négueʼt ca ʼauʼot (Santiago 1:5).
2. ʼAnmittaique ana la Biblia qataq ana qanmejnapi qaỹachigoxotaigui anamaye yaqtoʼ ʼaulalec na nqataxacpi ishet ra ʼam itauan ra qouaigui reʼera. Taqaʼen ishet ra ʼaunat ca qarqaỹañecpi qaramta ra lpiʼiỹaxac.
3. ʼAuennataxan ra queʼeca ʼalcaʼauʼa négueʼt ca ʼam iʼotec ca maiche ʼantounaxac qataq na ntounaxacpi ca laỹipi.
HUOʼO NA NASAXAUEC RA: «ʼAm ishet ra maiche ʼalcaʼauʼa ca ʼauʼot. ¡Qaica ca naigui ra ʼam detaqtegueuaʼa ca laỹipi!».
-
¿Táʼaencoʼ iuen ra seqochaqaʼa ra lquiyaqteỹaxac ñi Dios qataq na laỹipi?
NA ʼAMAQTAQAIC
Noʼon ra llicaʼaxauʼa ra soʼotaq ra ñapaxaguenaxa ra lcuennataxac ñi Jehová ca ʼoonolec aloic qataq ra secuennataxanaxa ra ca soʼotaqpi itauan qoʼ iquemaqchet ca laỹipi.
ʼAntoueetaʼac
-
ʼAm, ¿ʼeetec ishet ra ca ʼalcaʼauʼapi lauela ñi Jehová?
-
¿Négueʼt ca ishet ra ʼauʼot yaqtoʼ ʼauapaxaguen ra ʼantounaxac?
-
¿ʼEetec ishet ʼam ra ʼauachaxan ra ʼauʼot ca naigui ra ntounaxac na laỹipi?
ʼAUANATA CA LỸA
¿ʼEetec ishet ra ca ʼalcaʼauʼapi iʼañaqchet ra ʼanauochaxac ñi Dios?
«Ỹauoʼo ra lliʼoxoyec ñi Dios ra llicaʼaxauʼa ra soʼotaq» (La Atalaya, 15 de abril de 2011)
Nquiguec ra ʼauaỹateeteguet ʼeetec ra qomiʼ ỹapaxaguen ñi Jehová.
Saishet ra saq alaq so huotaique lcaʼauʼa ra ỹoʼot so ỹale. ʼAuanata négueʼt so itauan somaye.
Nquiguec ra ʼameten ʼeetec ra ʼam ỹaỹamaxareeta ñi Jehová naiʼctaxa ra ñimaye saishet ra ỹan ca namaxasoxonaxacpi tachigui ca yoʼoqchigui aloic.
