PAXAGUENAXAT 36

Noʼon ra qarataxac ʼenauac ra qoyiquiaxac

aỹeglaxattague

ʼEnauac na shiỹaxauapi huotaique ra noʼon ra lataxac na nauochaxauapi. Qataq taqaʼen ñi Jehová huotaique reʼera na nauochaxauapi. Qalaq ỹataqta alaqaic ra noʼon ra qarataxac souaxat na shiỹaxauapi ỹatenachet ca laỹipi. ¿Huoʼo ca nachiquiaxacpi souaxat ra noʼon ra qarataxac ʼenauac ra qoyiquiaxac? ¿Négueʼt caua?

1. ¿Táʼaencoʼ ra iuen ra noʼon ra qarataxac?

Ra na laỹipi ilaʼa ra noʼon qarataxac, nache sachaxanqot ñi Jehová ra sauotaxac taq sauoqoʼo ra ʼenec. ʼAntoueetaʼac ra ñi Jehová ỹaỹaten ʼenauac ra qarcuennataxacpi taq na soʼotaqpi (Hebreos 4:13). Ra llicaʼaxauʼa na saishet ra qomiʼ pegueraiqa, ñimaye nanomtaʼa, qataq ỹataqta ỹauoʼo ra naigui. Ye lʼaqtac ʼenapec: «Ñim Nataxalaʼ ỹataqta ỹaỹemec na qauemaicpi, qalaxaye nauochaxaua ca noʼon da lataxac» (Proverbios 3:32).

2. ¿Négueʼt caua lataxaco ʼenauac na naʼaxaʼte ra iuen ra noʼon ra qarataxac?

Ñi Jehová iuattaʼa ra soʼotaq ra ʼenapec ye lʼaqtac: «da qanaʼaqtaxañiitegaʼt qalaq ỹataqta qamiʼ ʼeesora» (Zacarías 8:16, 17). ¿Négueʼt ca naigui reʼera? Saishet ra ñasaxasoxouec ca natenataxanaxac qoʼ satenachetaq ca qarhuoʼ lʼecpi, ca qarʼonataxanauapi, na qarqaỹañecpi añi la congregación qataq na ntaʼalpi. Na shiỹaxauapi noʼon ra lataxac saishet ra decache taq saishet ra ỹayen ca lỹa (ʼautaxaỹaxan Proverbios 24:28 taq Efesios 4:28). Taqaʼen isheeten nam ỹaxanaique na ntaʼalpi (Romanos 13:5-7). Neʼena qataq na laỹipi lataxac ra qanachaalataxac sauoqtaique ra «nachaqrata da ỹataqta npeʼet» qataq noʼon ra qarataxac (Tito 2:10).

3. ¿Négueʼt ca achiquiaxacpi saconaxaguet ra noʼon ra qarataxac?

Ra qomiʼ qaỹauatton ra noʼon ra qarataxac, nache qaraueguec ra na laỹipi qomiʼ ipiʼiỹaʼa. Qataq setauanaq ra ñi ʼoonolec añi la congregación saishet ra ñiʼi qataq ra ipiʼiỹaʼa ca laỹipi ʼenaʼam na nhuoʼ lʼecpi. Taqaʼen ñitonaqtapeguec ra huoʼo ra noʼon ra qantounaxac. Ra noʼon ra qarataxac ỹoʼot «da lyac da lapaxaguenataxanaxac Ñim Loʼonatac ʼEnauacna» taq ishet ra ỹañoxot ra na laỹipi huotaique ra ỹiʼoxoren ñi Jehová (Tito 2:10).

ÑIMITAQ RA PAXAGUENAXAT

Semetenaq ʼeetec ra iʼañaqchet ra qanauochaxac ñi Jehová, qataq ʼeetec ra ishet ra noʼon ra qarataxac ye ỹottaʼaʼt lataxac ra qanachaalataxac.

4. Ñi Jehová lauela na shiỹaxauapi noʼon ra lataxac

Qautaxaỹaxañi Salmo 44:21 taq Malaquías 3:16, qataq qaumalligui neʼena:

¿Huoʼo ra naigui ra secuennataxanaxa ra ishet ra soxotaxañi ra ʼeesa? ¿Táʼaencoʼ ra nache ʼeetec ra ʼarcuennataxac?
Ra llicaʼaxauʼa ra saʼaxataq ra ʼeesa naiʼctaxa ra qalaqaic, ¿ʼeetec ra lquiyaqteỹaxac qome ñi Jehová?

Na ñalaqpi ra iʼaxat ra ʼeesa, nache nqaʼen machiguiñi caua ltaʼal. Ra qomiʼ saʼaxataq ra ʼeesa nache ñaqaʼenaq machiguiñi ñi Jehová.

5. Saxaỹet ra noʼon ra qarataxac

Naiʼctaxa ra qalota na shiỹaxauapi iʼamaqten ra huoʼo ye huaña ra qaica ca naigui ra noʼon ra qarataxac. Qalaxaye semetenaq táʼaencoʼ ra iuen ra noʼon ra qarataxac saxaỹet. Qaumichiñi na VIDEO.

VIDEO: ¿Négueʼt ca ishet ra qomiʼ itauan ra samaxasoxoqchiguiñi? Ra noʼon ra qantounaxac (2:32)

Qautaxaỹaxañi Tito 2:10 qataq qaumalligui ʼeetec ra qomiʼ npeʼet qataq noʼon ra qarataxac...

... ca qarhuoʼ lʼecpi.
... huaña ca qarʼonataxanqaʼ qoʼ aca escuela.
... ca laỹipi lataxac ra qanachaalataxac.

6. Ra noʼon nataxac qomiʼ ỹanem ra ʼachiquiaxac

Ishet petaʼa ra ỹoʼot na qanqalanaxacpi ra noʼon ra qarataxac. Qalaxaye queuoigui ca laloqoʼ reʼera saxaỹet ra noʼon ra llicaʼaxauʼa. Qautaxaỹaxañi Salmo 34:12-16 qataq qaumalligui neʼena:

¿ʼEetec ishet ra nʼonaxat ra qanachaalataxac ra noʼon nataxac?

Ra ñi nhua qataq añi nhua noʼon ra lataxac, nache iʼañaqchet ra nhuaỹaxac.
Na ʼonataxanaxaicpi ra noʼon ra lataxac, nache laueguec ra na naʼaco ipiʼiỹaʼa namayepi.
Na qailotaguepi ra noʼon ra lataxac, nache laueguec ra noʼon nʼenaxat ra ratatoʼot ca ntaʼalpi.

HUOʼO NA NASAXAUEC RA: «Qaica ca iquemaqchet cataiʼ iyeta natenataxanaxac».