Na ntagoʼq ỹaguec ra ʼamaqtaqaic. Ra qaica ca ntagoʼq nache qaica ca ncaʼaltauec. Ñi Dios qomiʼ ỹoʼot, ỹoqoʼoye ñimaye taỹot ra qomiʼ iʼaqtaxanem ʼeetec iuen ra qaỹoʼogoxona. ¿ʼEetec ca lʼaqtac ñimaye na ntagoʼq? ¿Ishet ra qanallic qoʼ qaiʼaroigui ca nʼoquiaxac? ¿Qaq négueʼt ca ʼam itauan yaqtoʼ noʼon ca ʼalcaʼauʼa ra ʼauʼot souaxat neʼena?

1. ¿ʼEetec ra lmejnaxanaxac ñi Jehová na ntagoʼq?

Coʼollaxa so ỹiriñe aye la Biblia, ñi Jehová ʼenapega so lʼonataxanaxanecpi: «Na ntagoʼq, namaye chegaqaigui da lcaʼalaxa ʼenauac na ncaʼaltauec» (Levítico 17:14). Ra lmejnaxanaxac ñi Jehová, na ntagoʼq naigui ra ncaʼalaxa. Ra ncaʼalaxa lachetaqtaxanaxat ñi Dios —ỹataqta quiʼitta—, ỹoqoʼoye na ntagoʼq taqaʼen saishet ra sa qaiyaquen.

2. ¿Saq ỹashen ñi Dios ra huoʼo qaỹoʼogoxona na ntagoʼq?

So saxanaxa ra huoʼo so congregación cristiana, ñi Jehová ỹamaxalec so lʼaqtaxanaxanecpi ra saishet ra chec na ntagoʼq (ʼautaxaỹaxan Génesis 9:4 taq Levítico 17:10). Qaq so mashe huoʼo, ñi Jehová ỹiʼiguelaxalec ra nasaxauec seʼeso namaxasoxonaxac. So Cuerpo Gobernante —nacheso so apostolpi taq ancianopi, maye ilotalec na congregación— ỹanem neʼena nqataxac so cristianopi: «saishet da qolliqui na ntagoʼq» [«qavichiỹaʼaguet na ntagoʼq», NWT] (ʼautaxaỹaxan Hechos 15:28, 29).

¿Négueʼt ca naigui ra qavichiỹaʼaguet na ntagoʼq? Ra huoʼo ca doctor ʼam ʼenapega ra ʼavitaʼaguet na lataxa, ʼam saishet ra ʼanỹomgui, ¿ʼeesa? Qalaxaye ¿qollec ca nallic lalegue na lataxa qoʼ ʼauaroigui na ʼarʼoc? Yoqta ra saisheto. Reʼera ʼenaʼam neʼena namaxasoxonaxac ra qavichiỹaʼaguet na ntagoʼq. Qaỹalaxaguet ñi Dios naigui ra saishet ra sacheguenaq qoʼ nỹomaxagui na ntagoʼq, qoʼ sacheguenaq ca lapat maye saxanaxa ra nmiguiñi na ltagoʼq. Taqaʼen saishet ra sacheguenaq na nallic qaỹalecnaxanguet na ntagoʼq.

¿Qaq ra ca doctor roʼogoxona na ntagoʼq? Huoʼo na lataxacpi roʼogoxona namayepi maye npaʼagueneʼ ra lamaxasoxonaxac ñi Dios. Qaỹaloqnaxana, ra imaʼaʼt na ntagoʼq qaiʼaroigui ca nʼoquiaxac qoʼ ʼenauac naua laỹil ʼamaqtaqaiqa huetaiguilo na ntagoʼq: glóbulos rojos, glóbulos blancos, plaquetas taq plasma. Qalaxaye huoʼo ye huaña saishet ra itchiguiñi ra ca lataxacpi roʼogoxona na doctor npeʼenguet ra lamaxasoxonaxac ñi Dios. Qaỹaloqnaxana, huoʼo na roʼogoxona na iyeta yoqta iyeta lalamaxat naua laỹil ʼamaqtaqaiqa huetaiguilo na ntagoʼq. Qataq huoʼo ye huaña ra qaỹoʼogoxona na maiche ltagoʼq nam nqaretac. Ime ra qanapaxaguena na ỹottaʼaʼt lataxacpi roʼogoxona namayepi, ñi ʼoonolec maiche iuen ra lcaʼauʼa ra ỹoʼot (Gálatas 6:5, TBSNT). a

 ÑIMITAQ RA PAXAGUENAXAT

3. ʼAlcaʼauʼa ra ʼauʼot cam ỹaỹamaxareeta ñi Jehová

¿ʼEetec ishet ca ʼalcaʼauʼa ra ʼauʼot nateeteguet ra lmejnaxanaxac ñi Dios na ntagoʼq? Qaumichiñi na VIDEO ime nache qaumalligui táʼaencoʼ ra ʼamaqtaqaic ra qaỹalaxaguet ye nqataxacpi huetaña na paʼaguiñe:

• ʼAỹaxanaique ca naỹajnec (Santiago 1:5).

• ʼAnmittaique ca nqataxacpi huetalec aye la Biblia maye nateeteguet reʼera qataq ʼameten ʼeetec ra ʼaualaxaguet (Proverbios 13:16).

• ʼAnataxan cam ʼeetec na ỹottaʼaʼt lataxacpi ra roʼogoxona na ntagoʼq na doctorpi ca qonetaña.

• ʼAuaỹaten négueʼt ca saishet ra ʼanashenguet neʼenapi.

• Itchiguiñi ra queʼeca ʼalcaʼauʼa ra ʼauʼot nqaʼen qaica ca tatapigui lauel ra ʼantounaxac (Hechos 24:16). b

• ʼAuaỹateeta ra ʼenauac qomiʼ huoʼo ra qantounaxac. Ỹoqoʼoye —ca ʼarhua, aca ʼarhua, anciano qoʼ ca ʼam ỹapaxaguetac aye la Biblia— saq ishet ra ʼam retaqtapegueuaʼa négueʼt ca iuen ra ʼalcaʼauʼa ra ʼauʼot. Qaica ca ishet ra ỹoʼot reʼera (Romanos 14:12).

• Ỹiriñe ca ʼalcaʼauʼa.

4. Na testigopi de Jehová ñimittaqaique na noʼon doctorpi

Qaỹalaxaguet ra lamaxasoxonaxac ñi Dios na ntagoʼq saishet ra naigui ra saq ñashenaxaguet na ntaunaxanaxac na noʼon doctorpi. Qaumichiñi na VIDEO.

Qautaxaỹaxañi Tito 3:2 qataq qaumalligui neʼena:

• ¿Táʼaencoʼ ra iuen ra setauanaq na doctorpi taq ra ñimittaqaique ca nlaxagayec qataq sauoqoʼo ca ʼenec ra semallaxai namayepi?

 5. Na iyeta yoqta iyeta huetaigui na ntagoʼq

Na ntagoʼq huoʼo naua cuatro laỹil ʼamaqtaqaiqa huetaiguilo: glóbulos rojos, glóbulos blancos, plaquetas taq plasma. Taqaʼen ñi ʼoonolec neʼenaua laỹil huoʼo naua iyeta yoqta iyeta huetaigui. c Huoʼo namayepi ra qaỹoʼogoxona yaqtoʼ qaỹoʼot na lataʼpi na nalolaxapi qoʼ ra qaỹaxanguet ca ntagoʼq.

Ra qaiʼaxat naua iyeta yoqta iyeta huetaigui na ntagoʼq, ñi ʼoonolec cristiano iuen ra maiche lcaʼauʼa naloqteneuo ra ntounaxac quetagueʼ aye la Biblia. Ishet ra huoʼo na lcaʼauʼa ra saq nashenguet ca lataxacpi na doctorpi ra roʼogoxona naua iyeta yoqta iyeta huetaigui na ntagoʼq. Qataq huoʼo na laỹipi petaʼa qaica ca nmaxa ra nasheteguet.

Ra huoʼo ca maiche ʼalcaʼauʼa ʼannajlaʼt:

• ¿ʼEetec ra saʼaqtaxatem ca doctor táʼaencoʼ ra saq ñashenguet qoʼ ñasheteguet caua iyeta yoqta iyeta huetaigui na ntagoʼq?

 NA ʼAMAQTAQAIC

Ñi Jehová huotaique ra sevitaqaʼaguet ca camachaqca saq ỹaỹamaxañi ra qaỹoʼogoxona na ntagoʼq.

ʼAntoueetaʼac

• ¿Táʼaencoʼ ñi Jehová nqaʼen quiʼitta na ntagoʼq?

• ¿ʼEetec ra saỹatenaq ra lamasoxonaxac ñi Dios ra sevitaqaʼaguet na ntagoʼq ỹalectaigui taqaʼen ra qaiʼaroigui na ntagoʼq na nʼoquiaxac?

• ¿Négueʼt ca ishet ra ʼam itauan yaqtoʼ noʼon ca ʼalcaʼauʼa na ỹottaʼaʼt lataxacpi ra roʼogoxona na ntagoʼq na doctorpi?