PAXAGUENAXAT 41
¿Négueʼt ca ʼenapega aye la Biblia ra auogaxac?
Qalota na shiỹaxauapi saq ỹaỹamaxaren ra remalligui ra auogaxac. Qalaxaye, aye lʼaqtac ñi Dios ra remalligui ra auogaxac, nqaʼen ỹataqteguet qataq huoʼo naq ʼenec. Ra ʼenapec aye la Biblia reʼera qomiʼ itauan. Qataq ỹaỹamaqchiguiñi chaʼaye aye la Biblia chigoqoʼot ñi Jehová maye ñacheñi ñi qomiʼ lʼonataqa, taq ỹaỹaten négueʼt ca qomiʼ nʼonaxat. Ñimaye qomiʼ ỹachaxana ʼeetec ra qarataxac ishet ra nqaʼen machiguiñi qataq négueʼt ca nqaʼen ra ñitonaqtapeguec ra achaalataxac chochaq tateec.
1. ¿ʼEetec ra lmejnaxanaxac ñi Jehová ra auogaxac?
Ra auogaxac lachetaqtaxanaxat ñi Jehová. Ñimaye huotaique ra ntootapeguec ca ỹale qataq ʼalo mashe huaron. Reʼera nachetaqtaxanaxat saishet ra ndaʼ ra caua nhuaỹaxac huoʼo na llalaqpi, taqaʼen ra ʼenauaque caua maye ỹachaxan ra lsoxoyec taq noʼon ncopitaxanaqtaic. Huaña nache ra lʼaqtac ñi Dios ʼenapec: «ʼAntonaxaua aca ʼananacteʼ ʼarhua» (Proverbios 5:18, 19). Ñi Jehová iuattaʼa ra na cristianopi mashe huaron saq ỹaxanec ra nhuaỹaxac, ỹoqoʼoye ca cristiano huanna ra hueguet aca sa lhua (ʼautaxaỹaxan Hebreos 13:4).
2. ¿Négueʼt ca naigui ra nquishiguetaxac?
Aye la Biblia qomiʼ ỹapaxaguenec ra «saishet qome da inoxoneuaʼa da loʼonataxanaxac Ñim Loʼonatac ʼEnauacna nam quetaigui da lquisheguetaxac» (1 Corintios 6:9, 10). So nʼaqtac griego roʼogoxona so neraxanecpi aye la Biblia so remalligui ra nquishiguetaxac nacheso so pornéia. Neʼena nʼaqtac ỹache ra 1) huetapega caua shiỹaxauʼ saishet ra huaron, a 2) na huetapeguet ca maiche nallishaxaua qataq aca naloshaxaua taq 3) ra huetapeguet na shiguiỹacpi. Ra sevitaqaʼaguet ra nquishiguetaxac ñaqaʼenaq machiguiñi ñi Jehová qataq ñitonaqtapeguec na qalota noʼon achiquiaxacpi (1 Tesalonicenses 4:3).
ÑIMITAQ RA PAXAGUENAXAT
Semetenaq négueʼt ca ishet ra ʼauʼot ʼam yaqtoʼ saishet ra ʼam loxonec ra nquishiguetaxac qataq négueʼt ca ʼachiquiaxacpi ishet ra ʼantootapeguec ra queta ra quiʼitta ra ʼarataxac.
3. ʼAuataiguesop ra nquishiguetaxac
So shiỹaxaua laxaraic lʼenaxat José nʼañaxat yaqtoʼ nache ʼeetai ra quiʼitta ra lataxac. Qautaxaỹaxañi Génesis 39:1-12 qataq qaumalligui neʼena:
-
¿Táʼaencoʼ ra ratauec so José? (Qaumichiñi ye versículo 9).
-
¿ʼAuʼamaqten ra so José ỹaỹamaqchiguiñi so ỹoʼot? ¿Táʼaencoʼ?
¿ʼEetec ishet na nsoxotpi ra iʼenaxatchigui so José taq rataueguesop ra nquishiguetaxac? Qaumichiñi na VIDEO.
Ñi Jehová huotaique ra ʼenauac qomiʼ saq ñashenaxaguet ra nquishiguetaxac. Qautaxaỹaxañi 1 Corintios 6:18 [TBSNT], qataq qaumalligui neʼena:
-
¿Négueʼt ca aloicpi ishet ra ỹauega ca shiỹaxaua ra loxonec ra nquishiguetaxac?
-
¿ʼEetec ishet ʼam ra ʼauataiguesop ra nquishiguetaxac?
4. ʼAm ishet ra ʼanauec ca ñiʼiguenataguec
¿Négueʼt cam ishet ra nqaʼen qalaqaic ra ñaʼañaxataxaguet ra nquishiguetaxac? Qaumichiñi na VIDEO qataq qaumalligui neʼena:
-
Ra so qarqaỹa so video nanomteguet ra na lcuennataxacpi taq ỹoʼotpi ishet ra ỹauega ra ncachitagueʼ aso saishet ra lhua, ¿négueʼt so ỹoʼot?
Na cristianopi lpeʼetpi taqaʼen huoʼo ye huaña iuen ra nʼañaxat yaqtoʼ nache ʼeetai ra quiʼitta na lcuennataxac. ¿Négueʼt ca ishet ra ʼauʼot ʼam yaqtoʼ saishet ra ʼacuennataxatapeguelec ra nquishiguetaxac? Qautaxaỹaxañi Filipenses 4:8 qataq qaumalligui neʼena:
-
¿Négueʼt ca iuen ra secuennataxanaqtapeguelec?
-
¿ʼAuʼamaqten ra setaxaỹaxanaq aye la Biblia taq semelaxa ra soʼonataxanaqtecot ñi Jehová ishet nqaʼen ra saq alaq ra ñaʼañaxataxaguet ca ñiʼiguenataguec? ¿Táʼaencoʼ?
5. Na lamaxasoxonaxacpi ñi Jehová qomiʼ itauan
Ñi Jehová ỹaỹaten ca ỹataqta qomiʼ nʼonaxat. Ỹoqoʼoye qomiʼ ʼenapega ʼeetec ra nache ʼeetai ra quiʼitta ra qarataxac taq négueʼt ca ʼachiquiaxacpi saconaxaguet ra soʼotaq reʼera. Qautaxaỹaxañi Proverbios 7:7-27 qoʼ qaumichiñi na VIDEO. Ime nache qaumalligui neʼena:
-
¿ʼEetec seʼeso nsoq maiche taỹaʼa so aloic chaqaic? (Qaumichiñi Proverbios 7:8, 9).
-
Nateeteguet ye Proverbios 7:23, 26 ra nquishiguetaxac huetaigui na qauem ca ivireguet. ¿Négueʼt ca nqalanaxacpi saishet ra saconaxaguet ra nache ʼeetai ra quiʼitta ra qarataxac?
-
¿ʼEetec ra quiʼitta nataxac qomiʼ itauan ra ñitonaqtapeguec ra achaalataxac chochaq tateec?
Huoʼo na iʼamaqten ra na ʼenapec aye la Biblia souaxat na huetapeguet ca maiche nallishaxaua qataq aca naloshaxaua, saishet ra ỹachaxan ra nauotaxanaqtaic. Qalaxaye ñi Jehová nacheñi ñi Dios huotaxanaqtaic, taq huotaique ra ʼenauac na shiỹaxauapi ntootapeguec ra achaalataxac chochaq tateec. Qaq yaqtoʼ saconaxaguet reʼera lachetaqtaxanaxat, seuenaq ra salaxasoxoguet na lqataxacpi ñi Jehová. Qautaxaỹaxañi 1 Corintios 6:9-11 [TBSNT], qataq qaumalligui neʼena:
-
Chigoqchigui ra lmejnaxanaxac ñi Dios, ¿ndotec na lqopitaxanaqtaicpi na huetapeguet ca maiche nallishaxaua qataq aca naloshaxaua ra qauem?
Yaqtoʼ qomiʼ ỹaỹamaxareete ñi Dios, ʼenauac qomiʼ seuenaq ra huoʼo ca ñaralaxataq. ¿Huoʼo naq naigui ca qarʼañaxataxac? Qautaxaỹaxañi Salmo 19:8, 11 qataq qaumalligui neʼena:
-
¿ʼAuʼamaqten ra ỹaỹamaqchiguiñi na lqataxacpi ñi Jehová ra qarataxac? ¿Táʼaencoʼ ra nache ʼeetec ra ʼarcuennataxac?
Ñi Jehová masheye itauatac na qalota shiỹaxauapi ra ỹalaxaguet na lqataxacpi ra nataxac, qataq ʼam taqaʼen ishet ra ʼam itauan.
HUOʼO NA NASAXAUEC RA: «Qaica camachaqca ra caua shiỹaxauʼ nauotaʼt huoga».
-
¿ʼEetec ca ʼaraqtac ʼam?
NA ʼAMAQTAQAIC
Ra auogaxac lachetaqtaxanaxat ñi Jehová. Ñimaye huotaique ra ntootapeguec ca ỹale taq aloʼ mashe huaron.
ʼAntoueetaʼac
-
¿Négueʼt ca nʼonataguecpi huetaigui ra nquishiguetaxac?
-
¿Négueʼt ca qomiʼ itauan yaqtoʼ saishet ra qomiʼ loxonec ra nquishiguetaxac?
-
¿Négueʼt ca ʼachiquiaxacpi saconaxaguet ra salaxasoxoguet na lqataxacpi ñi Jehová ra qarataxac?
ʼAUANATA CA LỸA
ʼAnmit táʼaencoʼ ra iuattaʼa ñi Dios ra huaron ca ỹale qataq aloʼ maye huotaique ra nmariaxauʼ.
ʼAuanata táʼaencoʼ ra na ʼenapec aye la Biblia souaxat na huetapeguet ca maiche nallishaxaua qataq aca naloshaxaua saishet ra ỹachaxan ra nquiỹataxanaxac.
ʼAuanata ʼeetec ra qomiʼ npaxajlec na lqataxacpi aye la Biblia ra auogaxac.
«Na nauogaxac qaỹauotaʼa na alap, ¿nachena na auogaxac?» (Paxaguenaxat ye jw.org)
ʼAutaxaỹaxan ye nʼaqtaguec «Namayepi huoʼo ra naigui nqaʼen aỹem», maye iʼaxat négueʼt so iraxan so shiỹaxaua huetapeguet ca maiche nallishaxaua ra naralaxat ra lataxac yaqtoʼ ñi Dios ỹaỹamaxareeta.
«Aye la Biblia naralaxat ra achalaataxac» (La Atalaya, 1 de abril de 2011)
a Neʼenapi nquishiguetaxacpi huetaigui na nauogaxac, nauogaxac qaỹauotaʼa na alap qoʼ ra qaỹauotaʼa añi nqolo qataq qaiʼañaxajlec ca logoxoshet ca ỹale qoʼ logoqte aca ʼalo.
