PAXAGUENAXAT 42
¿Négueʼt ca ʼenapec aye la Biblia na ndoxoicpi taq na nhuaỹaxac?
Huoʼo na culturapi na shiỹaxauapi lcuennataxa ra yaqtoʼ machiguiñi nache iuen ra huaron. Qalaxaye saisheto ra ʼenauac na mashe huaron ra machiguiñi qataq na ndoxoicpi saishet ra ʼenauac ra saq machiguiñi. Ra ʼeesa ra ʼenapec aye la Biblia ra na ndoxoicpi taq na nhuaỹaxac lachetaqtaxanaxat ñi Jehová.
1. ¿Négueʼt ca achiquiaxacpi ỹaconguet na ndoxoicpi?
Aye la Biblia ʼenapec: «Ca huaron camaye ỹaỹamaqchiguiñi da ỹoʼot. Qaq ca saishet da huaron, nache camaye ỹataqta ỹactec da ỹaỹamaqchiguiñi da ỹoʼot» (ʼautaxaỹaxan 1 Corintios 7:32, 33, 38). ¿Négueʼt ca naigui ra ca shiỹaxaua «ỹactec da ỹaỹamaqchiguiñi da ỹoʼot» ra saishet ra huaron? Na cristianopi ndoxoicpi saisheto ra iuen ra lhuogoxo souaxat ra laỹamaxa ca nhua qoʼ aca nhua. Ỹoqoʼoye namayepi qaica ca ỹaptapigui. Huoʼo na saishet ra iqalan ra nquiguec ra ỹiʼoxoren ñi Jehová. Qaỹaloqnaxana, taỹaʼa ca lỹa ʼalhua yaqtoʼ iʼaxat ra noʼon nʼaxaỹaxac. Taq ra ʼamaqtaqaic nʼachiquiaxac na ndoxoicpi nachera ra huoʼo na lraqaʼ yaqtoʼ iʼañaqchet ra nauochaxac ñi Jehová.
2. ¿Négueʼt ca ʼachiquiaxacpi ỹaconguet caua ỹereuo ca laronaxac?
ʼEnaʼam na ndoxoicpi na nhuaỹaxac taqaʼen huoʼo na nachiquiaxacpi. Aye la Biblia ʼenapec «ỹactec da ʼonaxaic da dos caua ntaueetegaʼt shiỹaxauʼ» (Eclesiastés 4:9). Reʼera ipacchigui ra na nhuapi ỹalaxaguet na nqataxacpi huetalec aye la Biblia. Na shiỹaxauapi ỹereuo ca laronaxac ỹachaxanapec ra nauotaʼt, huoʼo naq ʼenec qataq ñi ʼoonolec ntelaʼa ca lỹa. Namayepi nanomta ra itchiguiñi ca lmariaxac saishet ra ʼenaʼam ca saishet ra ỹereuo ca laronaxac. Taqaʼen ca nhuaỹaxac ỹanem ca ñalaqpi ca itchiguiñi lmariaxac maye lañoqoʼ.
3. ¿Négueʼt ca lmejnaxanaxac ñi Jehová na nhuaỹaxac?
So ime ra ỹoʼot so huaʼauchiguiñe nhuaỹaxac, ñi Jehová ʼenapec: «Ca ỹale caʼai qome ca ltaʼa qataq aca lateʼe» nache «lmayaxaua aca lhua» (Génesis 2:24). Ñi Jehová huotaique ra ca nhua qataq aca nhua nauotaʼt taq nʼattaʼaʼt ra ñaq ncaʼaltauec. Qataq ndotec ỹaxanec ra qaỹoʼot ca lmalate ra nalateʼ ra ca ʼoonolec caua maye hueguet ca saq lhua. Huaña nache ñi Dios ipataxalec ca nhua qoʼ aca nhua saishet ra lasouaxashet reʼera, ra lcaʼagui ra ỹoʼot ca lmalate ra nalateʼ camaye a (Mateo 19:9, TBSNT). Ñi Jehová saq nashenguet ra na cristianopi ỹaguec na lhua (1 Timoteo 3:2).
ÑIMITAQ RA PAXAGUENAXAT
Sanataxa négueʼt ca ishet ra ʼauʼot—ʼam ndoxoic qoʼ mashe ʼauaron— yaqtoʼ ʼauamaqchiguiñi taq ʼanqaʼen machiguiñi ñi Jehová.
4. Noʼon ra naigui ʼanqaʼen ra nachetaqtaxanaxat ndoxoic
So Jesús ndoxoic ʼera ỹamataʼac ra nachetaqtaxanaxat (Mateo 19:11, 12, TBSNT). Qautaxaỹaxañi Mateo 4:23 qataq qaumalligui neʼena:
-
So Jesús ra ndoxoic, ¿ʼeetec ra huoʼo ra naigui nqaʼen yaqtoʼ roʼonataxanot ñi Ltaʼa qataq itauan na laỹipi?
Na cristianopi ndoxoicpi ishet ra machiguiñi ra huoʼo ra naigui nqaʼen ra ñaq ndoxoic ʼenaʼam so ỹoʼot so Jesús. Qaumichiñi na VIDEO qataq qaumalligui neʼena:
-
¿ʼEetec ishet ra noʼon ra naigui nqaʼen na cristianopi na ñaq ndoxoicpi?
ʼAmeten ra
Aye la Biblia saishet ra ʼenapec ra lcata ca llaxa ca shiỹaxaua yaqtoʼ ishet ra huaron. Qalaxaye ʼenapec ra ca shiỹaxaua iuen ra iuattaʼa ra «mashe iviʼ ye llaxa da ishet da» huaron, chaʼaye ra saxanaxa ra iviʼ ye llaxa chaxague ye lyaxa ra huoʼo ca hueguet. Reʼera ỹoʼot ra qalaqaic ra noʼon ca lcaʼauʼa (1 Corintios 7:36).
5. Noʼon ra ʼalcaʼauʼa ca ʼannaỹaxaua
Ra ʼalcaʼauʼa négueʼt ca ʼauaronguet reʼera ỹataqta ʼamaqtaqaic huetaigui ra ʼanachaalataxac. Qautaxaỹaxañi Mateo 19:4-6, 9 [TBSNT], qataq qaumalligui neʼena:
-
Huaʼauñe ra huaron ca cristiano, ¿táʼaencoʼ ra iuen ra yoqta recuennataxalec na sochaqna?
Ana la Biblia ʼam itauan ra ʼauaỹaten négueʼt caua lataxaco iuen ra ỹachaxan ca noʼon nhua qoʼ aca nhua. ʼAmaqtaqaic ra ʼanmittaique cam ỹauotec ñi Jehová. b Qautaxaỹaxañi 1 Corintios 7:39 taq 2 Corintios 6:14 [TBSNT], Ime nache qaumalligui neʼena:
-
Ca ʼeesa cristiano ra lcaʼauʼa ra huaron, ¿táʼaencoʼ iuen ra lcaʼauʼa cam nateeteguet ra lʼamaqtenaxacpi?
-
Ra ʼauaronguet ca saishet ra ỹauotec ñi Jehová, ¿ca ʼeetec ʼapettega ra lquiyaqteỹaxac ñimaye?
Ra qaicotaxana caua dos ỹottaʼaʼt shiguiỹac yaqtoʼ ỹache cam nachoxonaxalaʼ, ʼenauaque huoʼo ra nqueʼejnaxac. Nache ʼenaʼam ca cristiano ra huaronguet cam saishet ra ỹauotec ñi Jehová, ỹaguec na nqueʼejnaxacpi.
6. Ra ʼarmejnaxanaxac na nhuaỹaxac nateeteguet ra lmejnaxanaxac ñi Jehová
So israel lʼecpi, coʼollaxa huoʼo so ỹoʼot ca lmalate ra nalateʼ na lhuapi souaxat ra napagaqajnaxaicpi somayepi. Qautaxaỹaxañi Malaquías 2:13, 14, 16 qataq qaumalligui neʼena:
-
¿Táʼaencoʼ ñi Jehová nquiỹa ra huoʼo na ỹoʼot ca lmalate ra nalateʼ ỹasouaxat cam saishet ra huomshe netalec aye la Biblia?
Ra hueguet ca saq lhua taq ra qaỹoʼot ca lmalate ra nalateʼ ỹoʼot ra ỹaguec ra nquiʼic ca nhua qoʼ aca nhua saishet ra lasouaxashet reʼera, taq na llalaqpi.
Qaumichiñi na VIDEO qataq qaumalligui neʼena:
-
Ra ʼauaronguet ca saishet ra ỹauotec ñi Jehová, ¿négueʼt ca ishet ra ʼauʼot yaqtoʼ machiguiñi ra ʼarhuaỹaxac?
7. ʼAualaxaguet na lamaxasoxonaxacpi ñi Jehová ra nhuaỹaxac
Huoʼo na ishet ra nqaʼen qalaqaic ra qaỹalaxaguet na lamaxasoxonaxacpi ñi Jehová ra nhuaỹaxac. c Qalaxaye ñimaye ỹanem na achiquiaxacpi cam nʼañaxat ra ỹoʼot reʼera. Qaumichiñi na VIDEO.
Qautaxaỹaxañi Hebreos 13:4 [TBSNT], qataq qaumalligui neʼena:
-
¿ʼAuʼamaqten ra ỹaỹamaqchiguiñi na lamaxasoxonaxacpi ñi Jehová na nhuaỹaxac? ¿Táʼaencoʼ ra nache ʼeetec ra ʼarcuennataxac?
Ñi Jehová iuattaʼa ra ca cristiano ỹereuo ca laronaxac taq ca lmalate ra nalateʼ, chaʼaye na paʼaiguelo ana ʼalhua reʼera lamaxasoxonaxacpi na ntaʼalpi. Qautaxaỹaxañi Tito 3:1 [TBSNT], qataq qaumalligui neʼena:
-
Ra ʼam mashe ʼauaron, ¿itchiguiñi ra ʼereuo ca ʼarhuaỹaxac qataq ra ʼaupacchigui na lamaxasoxonaxacpi na ntaʼalpi?
HUOʼO NA RENATAXAN RA: «¿Táʼaencoʼ caua shiỹaxaʼu ra ỹereuo ca laronaxac? ¿Saq ishet ra choche nmariaxauʼ caua maye?».
-
¿ʼEetec ca ʼarasataxac?
NA ʼAMAQTAQAIC
Na ndoxoicpi taq nhuaỹaxac lachetaqtaxanaxat ñi Jehová. Namayepi ishet ra ntootapeguec ra achaalataxac taq machiguiñi ra ca ỹoʼot nateeteguet ra lmejnaxanaxac ñi Jehová.
ʼAntoueetaʼac
-
¿ʼEetec ishet ca shiỹaxaua ra noʼon ra naigui nqaʼen ra ndoxoic?
-
¿Táʼaencoʼ aye la Biblia ʼenapec ra na cristianopi iuen ra huaronguet cam nateeteguet na lʼamaqtenaxacpi?
-
Nateeteguet aye la Biblia, ¿négueʼt ca ʼoonolec huomshe ỹasheeta aye la Biblia ra caua nhuaỹaxac ishet ra ỹoʼot ca lmalate ra nalateʼ?
ʼAUANATA CA LỸA
¿Négueʼt ca naigui ra ca shiỹaxaua ra huaron, «huaroneguet ca [...] laʼamqaanataxanaxaua»?
«Na nnataxacpi na shiỹaxauapi retaxaỹaxanataxatac» (La Atalaya, 1 de julio de 2004)
ʼAuauatton caua dos nʼaqtaguec ra nauonaxac taq na nhuaỹaxac maye ishet ra ʼam itauan ra noʼon na ʼalcaʼauʼapi.
ʼAuanata táʼaencoʼ so ʼoonolec qarqaỹa ỹataqta iʼamaqten ra ñi Jehová ỹanem so ỹaguec ra huoʼo naq naigui napacalec so ỹalat coʼollaxa.
Huaʼauñe ra qaicuennataxana ra qaỹoʼot ca lmalate ra nalateʼ qoʼ nalateʼ ¿négueʼt ca iuen ra naloqteneuo ca cristiano?
«Seyaquenaq caua mashe ỹauaxaỹaxanaʼt ñi Qartaʼa» (La Atalaya, diciembre de 2018)
b Huoʼo na culturapi, naua ntaʼal lcaʼauʼa négueʼt ca huaronguet ca llalec qoʼ aca llale. Huaña nache, caua noʼon ntaʼal saishet ra recuennataxalec ra choxoraq qoʼ sallaxanec camaye, ndaʼ ra camaye qoʼ acamaye ỹauotec ñi Jehová.
c ʼAm ra huoʼo ca ʼarmariaxaua qalaxaye saishet ra ʼereuo ca ʼararonaxac, ishet ra ʼereuo ca ʼararonaxac qoʼ ʼaxaañi reʼera maiche ʼam paʼaỹoʼot ra ʼalcaʼauʼa.
