Ñi Jehová huotaique ra ñitonaqtapeguec ra achaalataxac qataq ra huoʼo ca huaña ishet ra soʼotaxañi ca naʼashaxac. Qalaxaye, ¿ỹaỹamaxareeta ñi Dios ʼenauac na naʼashaxacpi? ¿ʼEetec ishet ra sachaxanaq ra sauotaxac qataq ra huoʼo naq naigui ñaqaʼenaq ra lquiyaqteỹaxac ñimaye?

1. ¿Táʼaencoʼ ñi Jehová saq ỹaỹamaxaren na qalota naʼashaxacpi?

Petaʼa ʼauʼaalac ra ʼauanata ra qalota na naʼashaxacpi chegoqtaʼague ra nʼamqajnataxanaxac saq ʼeesa qoʼ napaxaguenataxanaxac saishet ra huetalec aye la Biblia. Ishet petaʼa ra neʼena naʼashaxacpi chigoqchigui na saq ʼeesa nʼamaqtenaxacpi. Nateeteguet na ocultismo qoʼ chigoqchigui ra napaxaguenataxanaxac ra nquiʼi saq chaʼa. Taqaʼen huoʼo na nʼonataguecpi chigoqchigui na saq ʼeesa nʼamaqtenaxacpi taq ra nallitaxac. Ỹoqoʼoye saishet ra qaiʼaalac ra ñi Jehová iquiyeguen na lʼonataxanaxanecpi ra ʼeeta: «Qauỹocheelec; qataq saishet qome da qaʼaitapegueuaʼa ca ishet da deshepaxanaqtaxan» (2 Corintios 6:17). a

2. ¿ʼEetec ra lcuennataxac ñi Jehová na naʼashaxacpi ra qaỹiʼoxoren na shiỹaxauapi?

Ñi Jehová qomiʼ iquiyeguen ra saishet ra shenaqaʼam na shiỹaxauapi maye «ỹaalec da naquitaxac na ỹalleppi» chaʼaye reʼera nqoñiguishec (ʼautaxaỹaxan Jeremías 17:5). Huoʼo na naʼashaxacpi qaỹoʼot yaqtoʼ qaỹiʼoxoren ca ntaʼalpi qoʼ ca nallepi rauegaxan ca alaataxac. Huoʼo na laỹipi ỹanem ra lliʼoxoyec na nʼenaqtacpi huetalec ra naigui ca pais qoʼ ra qaisoueguesop ca pais (1 Juan 5:21). Qataq taqaʼen huoʼo na laỹipi ỹachaxan ra lcuennataxacpi na política taq na movimientos sociales. Ra sanaxam ca ñiʼoxonataxanaxac ca shiỹaxaua qoʼ ca organización maye ỹachaxan ra lcuennataxacpi npaʼagueneʼ ra ʼeetapeguec ñi Dios, ¿ʼeetec ca ʼarcuennataxac ʼam ra lquiyaqteỹaxac ñimaye?

3. ¿Négueʼt queʼeca nataxac ỹoʼot ra ca naʼashaxac ra saq qaỹaỹamaxaren?

Ana la Biblia sa ỹaconguet ra «ntaxa, qataq nam nquiʼaxaguesat, qataq ỹomaxac chochaq tateec» (1 Pedro 4:3, TBSNT). Huoʼo na naʼashaxac, nache na shiỹaxauapi sa naỹaten taq huoʼo na saq ỹalemaq qauem ra lataxac. Ra sauoqtaique ra queta ra qanauochaxaua ñi Jehová iuen ra sevitaqaʼaguet ʼenauac na deshepaxanaqtaxan ra qauem nataxac.

 ÑIMITAQ RA PAXAGUENAXAT

 5. ʼAtauan ca laỹipi yaqtoʼ huoʼo naq ʼenec nqaʼen na ʼarʼamaqtenaxacpi

6. Ñi Jehová huotaique ra samaxasoqchiguiñi

Ñi Jehová lauela ra ñitonaqtapeguec ra salegaqtaʼaguet na qarhuoʼ lʼecpi taq qanauochaxauapi. Qautaxaỹaxañi Eclesiastés 8:15 qataq qaumalligui neʼena:

• ¿ʼEetec ra ỹachaxan neʼena versículo ra ñi Jehová huotaique ra samaxasoqchiguiñi?

Ñi Jehová taqaʼen huotaique ra na lʼonataxanaxanecpi machiguiñi ra ỹalectaʼa. Qaumichiñi na VIDEO yaqtoʼ qauaỹachiñi ʼeetec na qaraponaxacpi ltaʼaraic na ỹottaʼaʼt na paʼaiguelo ana ʼalhua ỹachaxan reʼera.

Qautaxaỹaxañi Gálatas 6:10 qataq qaumalligui neʼena:

• ¿Qaiuen ra qaỹoʼot ca naʼashaxac yaqtoʼ qaỹoʼotec ca noʼon na laỹi shiỹaxauapi?

• ¿Négueʼt ca nachetaqtaxanaxat ʼarauela ra ʼauanec: cam iuen ra qaỹanec chaʼaye tachigui ca naʼashaxac qoʼ cam qoỹan chigoqchigui ra nquiyaqteỹaxac?

• Qalota na testigopi ỹoʼot na laʼashaxacpi na llalaqpi qataq ỹanem ca nachetaqtaxanaxat. ʼAm ra huoʼo ca ʼaiʼalaqpi, ¿négueʼt ca ishet ra ʼauʼot souaxat namayepi?

 NA ʼAMAQTAQAIC

Ñi Jehová huotaique ra ñitonaqtapeguec ra salegaqtaʼaguet na qarhuoʼ lʼecpi taq qanauochaxauapi. Qalaxaye saq lauela ra salegaqtaigui na naʼashaxacpi saq ỹaỹamaxaren ñimaye.

ʼAntoueetaʼac

• ¿Négueʼt ca iuen ra ñinataxanaxalaʼt yaqtoʼ saỹatenaq ra ñi Jehová ỹaỹamaxareeta ca naʼashaxac?

• ¿ʼEetec ishet ra setauanaq na qarhuoʼ lʼecpi taq qanauochaxauapi yaqtoʼ ỹaỹateeteguet cam llicaʼaxauʼa ra soʼotaq souaxat na naʼashaxacpi?

• ¿ʼEetec ra saỹatenaq ra ñi Jehová huotaique ra samaxasoqchiguiñi ra salegaqtaʼa?