So Jesús ʼenapega som ndiscipulopi, ʼeeta: «qamiʼ saishet da qoñiitaʼam namayepi» (Juan 15:19). Reʼera naigui ra qaica ca tategueuaʼa na huetalecpi ana ʼalhua, saq tategueuaʼa na política qoʼ na alaataxacpi. Qalaxaye, ʼeesa ra saishet ra saq alaq ra soʼotaq reʼera. Ỹoqoʼoye petaʼa ishet ra qomiʼ qaiʼen souaxat reʼera. ¿ʼEetec ishet ra qaica ca sataqtegueuaʼa na huetalecpi ana ʼalhua qataq queta ra saq saxanaxauec ñi Jehová?

1. ¿ʼEetec ra qarmejnaxanaxac qomiʼ na ʼeesa cristianopi na ntaʼalpi na shiỹaxauapi?

Na cristianopi sauoqoʼo ra ʼenec na ntaʼalpi. So Jesús ʼenapec: «qaỹaʼañim qome ñim ltaʼa na ntaʼalpi cam maiche lalamaxat ñimaye». Nache ʼera ra soʼotaq: salaxasoxoguet na lamaxasoxonaxacpi ca país, ʼenaʼam ra qaisheeten cam iỹaxanaique na ntaʼalpi (Marcos 12:17). Ana la Biblia rapaxaguenataxanec ra na ntaʼalpi na shiỹaxauapi roʼonataxan chaʼaye ñi Jehová ỹasheetec reʼera (Romanos 13:1). Ỹoqoʼoye saỹatenaqta ra na lʼañaxac neʼena ntaʼalpi huoʼo ra logaʼt, saishet ra napacalec ñi Dios. Ỹataqta sepiʼiỹaqaʼa ra ñi Qan Dios taq Lʼonataxanaxac ñimaye huetaʼague ra piguem, ỹaỹamaxajñe na nqalanaxacpi na shiỹaxauapi.

2. ¿ʼEetec ra sachaxanaq ra qaica ca sataqtegueuaʼa na huetalecpi ana ʼalhua?

ʼEnaʼam so Jesús, qomiʼ saishet ra sataqtegueuaʼa na política. Coʼollaq so shiỹaxauapi ilaʼa so nʼaalaxa ỹoʼot so Jesús taq huotaique ra ỹoʼot ra ntaʼa na ʼalhua, somaye saishet ra ỹasheetec reʼera (Juan 6:15). ¿Táʼaencoʼ ra saishet? So lcoʼopague somaye nasaxauec: «Da iʼonataxanaxac da aỹim ntaʼa, damayi sa ishit da nachana ana ʼalhua» (Juan 18:36, TBSNT). Qomiʼ na ndiscipulopi so Jesús ỹottaʼaʼt ye qarataxac ra sachaxanaq ra qaica ca sataqtegueuaʼa na huetalecpi ana ʼalhua. Qaỹaloqnaxana, saishet ra saxaỹa na alaataxac (ʼautaxaỹaxan Miqueas 4:3). Naiʼctaxa ra sauoqoʼo ra ʼenec na nʼenaqtacpi huetalec ra naigui ca país—ʼenaʼam na bandera—, saishet ra sanemaq ra lliʼoxoyec, chaʼaye reʼera ʼenaʼam ca ñiʼoxonataxanaxac (1 Juan 5:21). Saishet ra qanpaʼaguenaxaua qoʼ setauanaq ca partido político qoʼ cam huotaique ra nataxalaʼ. Ra soʼotaq reʼera taq ca laỹipi, sachaxanaq ra saq saxanaxauec ra Lʼonataxanaxac ñi Dios maye ỹoʼot ñimaye.

 ÑIMITAQ RA PAXAGUENAXAT

3. Na saq sataqtegueuaʼa na huetalecpi ana ʼalhua qomiʼ na ʼeesa cristianopi

So Jesús taq so ndiscipulopi qomiʼ ỹanem so laloqnaxanaxat. Qautaxaỹaxañi Romanos 13:1, 5-7 taq 1 Pedro 2:13, 14. Ime nache qaumichiñi na VIDEO qataq qaumalligui neʼena:

• ¿Táʼaencoʼ ra iuen ra sauoqoʼo ra ʼenec na ntaʼalpi na shiỹaxauapi?

• ¿ʼEetec ishet ra sachaxanaq ra salaxasoxoguet namayepi?

Ra huoʼo ca alaataxac, huoʼo na paispi ʼenapec ra saq tategueuaʼa na huetalecpi ana ʼalhua, qalaxaye itauan ñi ʼoonolec caua ỹoʼot ra alaataxac. ¿Ỹachaxan reʼera ra yoqta ʼeesa ra saq tategueuaʼa na huetalecpi ana ʼalhua? Qautaxaỹaxañi Juan 17:16. Ime nache qaumichiñi na VIDEO qataq qaumalligui neʼena:

• ¿Négueʼt ca naigui ra saq tategueuaʼa na huetalecpi ana ʼalhua?

Huoʼo ye huaña na ntaʼalpi na shiỹaxauapi iỹaxanaique ra soʼotaq cam npaʼagueneʼ ra lamaxasoxonaxac ñi Dios. ¿Négueʼt ca iuen ra soʼotaq? Qautaxaỹaxañi Hechos 5:28, 29. Ime nache qaumichiñi na VIDEO qataq qaumalligui neʼena:

• Ra huoʼo ca lamaxasoxonaxac na ntaʼalpi npaʼagueneʼ ra lamaxasoxonaxac ñi Dios, ¿négueʼt ca iuen ra salaxasoxoguet?

• ¿Huoʼo ca ʼacuennataxanalec ra huoʼo ye huaña na ʼeesa cristianopi saishet ra ỹalaxaguet na ntaʼalpi?

 4. Saq ʼauatategueuaʼa na huetalecpi ana ʼalhua ra ʼarcuennataxac taq ca ʼauʼot

Qautaxaỹaxañi 1 Juan 5:21. Ime nache qaumichiñi na VIDEO qataq qaumalligui neʼena:

• ¿Táʼaencoʼ ra lcaʼauʼa so Ayenge ra saishet ra ỹalegoigui so partido político taq na naʼashaxacpi ca país, ʼenaʼam ra nquinaxanaxac aso bandera?

• ¿ʼAuʼamaqten ʼam ra somaye noʼon so lcaʼauʼa ra ỹoʼot?

¿Négueʼt caua lỹa aloicpi ishet ra ỹeʼeguen ra saq sataqtegueuaʼa na huetalecpi ana ʼalhua? Qaumichiñi na VIDEO qataq qaumalligui neʼena:

• ¿ʼEetec ishet ra sachaxanaq ra saq sataqtegueuaʼa na huetalecpi ana ʼalhua ra semetenaq ca qomitaxac na lmaʼ na paʼaiguelo ana ʼalhua?

• ¿ʼEetec ishet ra saq sataqtegueuaʼa na huetalecpi ana ʼalhua ra qalcaʼauʼa ra ỹoʼot na ntaʼalpi na shiỹaxauapi qomiʼ iviraugalo, ʼonaxaic qoʼ qauem?

• ¿ʼEetec ishet ra naʼaqchet na saq sataqtegueuaʼa na huetalecpi ana ʼalhua ra saxasoqtega na noticia qoʼ na nasaxauec na ñinaxaicteguepi?

 NA ʼAMAQTAQAIC

Na cristianopi ỹataqta nʼañaxat ra saq tategueuaʼa na política taq reʼera huetaigui na lcuennataxacpi, na nasaxauecpi taq na ỹoʼotpi.

ʼAntoueetaʼac

• ¿Négueʼt ca qomiʼ paỹoʼot ra soʼotaq souaxat na ntaʼalpi na shiỹaxauapi?

• ¿Táʼaencoʼ ra saq sataqtegueuaʼa na política?

• ¿Négueʼt ca aloicpi ishet ra qomiʼ ỹeʼeguen ra saq sataqtegueuaʼa na huetalecpi ana ʼalhua?