PAXAGUENAXAT 46
¿Táʼaencoʼ ra nañanaxac qataq achelaxac?
Ra huoʼo ca nañanot ñi Jehová nache ỹaqataxanʼot chigoqchigui ca atamnaxac ra ỹiʼoxoren ʼoonolec ñimaye taq ca ʼamaqtaqaic ra nachaalataxac nachera ra ỹoʼot ra ʼeetapeguec ñi Dios (Salmo 40:8). Ime ra nachel, nache ỹachaxana na laỹipi ra masheye nañanot ñi Dios. Ra ñañanqot ñi Jehová ʼamaqtaqaic llicaʼaxagui ra ishet ra soʼotaq. Ỹataqta ʼamaqtaqaic chaʼaye naralaxat ra qanachaalataxac. ¿Négueʼt ca ishet ra ʼam iraxan yaqtoʼ ʼauʼot reʼera?
1. ¿Négueʼt ca qomiʼ iraxan yaqtoʼ ñañanqot ñi Jehová?
Ra nauotaxanaqtaic nachera ra qomiʼ iraxan ra ñañanqot ñi Jehová (1 Juan 4:10, 19). Aye la Biblia qomiʼ ʼenapega: «Ỹataqta ʼauauotec qome ñi qadataxalaʼ Dios, imauec ʼanqaʼen da ʼadquiyaqteỹaxac, qataq da ʼanachaalataxac, qataq da ʼadhuennataxa, qataq ʼenauac da ʼadʼañaxac» (Marcos 12:30, TBSNT). Ra qarauotaxanaqtaic ñi Jehová yoʼoqchigui na ñasaxasoxouecpi taq na soʼotaqpi. ʼEnaʼam caua nauotegaʼt ra ʼeesa ra ỹauotec ñi ʼoonolec caua maye nache huaron, ra ʼeesa ra sauotaxac ñi Jehová nache llicaʼaxauʼa ra ñañanqot ra qanachaalataxac qataq ñachelaq.
2. ¿Négueʼt ca ʼachiquiaxacpi ỹanem ñi Jehová na testigopi mashe nachel?
Ra ʼam ʼanachel, nache iviraʼa ra ʼaualegoigui na lauoʼ lʼecpi ñi Jehová, nhuoʼ lʼecpi ỹataqta machiguiñi. Nache ỹottaʼaʼt ye lataxac ra ʼananomteguet ra lauotaxanaqtaic ñi Dios qataq nquiguec ra ʼanquigot ñimaye (ʼautaxaỹaxan Malaquías 3:16-18). Taqaʼen iviraʼa ra ʼArtaʼa ñi Jehová, ʼantonatan na lhuoʼ lʼecpi ñi Jehová huetaña na paʼaiguelo ana ʼalhua, maye ỹauotec ñimaye taq ʼam (ʼautaxaỹaxan Marcos 10:29, 30, TBSNT). Qalaxaye, huaʼauñe ra ʼanachel, ʼam ʼauen ra huoʼo ca ʼauʼot. ʼAuen ra ʼauauatton ñi Jehová, ʼauauotec qataq ʼauachaxan ra ʼaupiʼiỹaʼa so Llalec. Nache ra paʼatec, ʼauen ra ʼauachaxanapec ñi Jehová ra ʼanañanot ra ʼanachaalataxac. Ra ʼauʼot ʼenauac reʼera taq ʼanachel, ishet ra huoʼo ca ʼanaquitaxac ra ʼantonatan ca ncaʼalaxa chochaq tateec. Ye lʼaqtac ñi Dios ʼenapec: «Da achilaxac mayi chigoqchigui da [qamiʼ] qancaʼalaxatreec nagui» (1 Pedro 3:21, TBSNT).
ÑIMITAQ RA PAXAGUENAXAT
Semetenaq táʼaencoʼ ra ʼamaqtaqaic ra ʼam ʼanañanot ñi Jehová taq ʼanachel.
3. ʼEnauac qomiʼ seuenaq ra llicaʼaxauʼa négueʼt ca soʼonataxanqot
So Israel lʼecpi, huoʼo so shiỹaxauapi lcuennataxa ra ishet ra ỹiʼoxoren ñi Jehová qataq so atamnaxalaʼ saq ʼeesa Baal. Qalaxaye repeʼenaxan somayepi. Ỹoqoʼoye ñi Jehová ỹamaq so profeta Elías yaqtoʼ nlaxanecpi. Qautaxaỹaxañi 1 Reyes 18:21 qataq qaumalligui neʼena:
-
¿Négueʼt ca iuen ra lcaʼauʼa ra ỹoʼot so israelitapi?
ʼEnaʼam so israelitapi, qomiʼ taqaʼen seuenaq ra llicaʼaxagui négueʼt ca soʼonataxanqot. Qautaxaỹaxañi Lucas 16:13 qataq qaumalligui neʼena:
-
¿Táʼaencoʼ ra saq ishet ra shiʼoxorenaq ñi Jehová qataq taqaʼen ca shiỹaxaua qoʼ ca lỹa?
-
¿Négueʼt ca ishet ra soʼotaq yaqtoʼ ñi Jehová ilaʼa ra masheye llicaxaʼauʼa ra shiʼoxorenaq ñimaye?
4. ʼAcuennataxalec lcata ñi Jehová ra ʼam ỹauotec
Ñi Jehová qalota na lachetaqtaxanaxatpi qomiʼ ỹanem huoʼo ra naigui. ¿Qaq négueʼt ca ishet ra sanaxam ñimaye? Qaumichiñi na VIDEO.
¿Négueʼt caua lataxaco ra ñi Jehová ʼam ỹachaxana ra lauotaxanaqtaic? Qautaxaỹaxañi Salmo 104:14, 15 taq 1 Juan 4:9, 10, qataq qaumalligui neʼena:
-
Na qalota lachetaqtaxanaxatpi qomiʼ ỹanem ñi Jehová, ¿négueʼt caua ỹataqta ʼauanec ra ʼanaʼachec?
-
Ra ʼacuennataxalec neʼena lachetaqtaxanaxatpi, ¿ʼeetec ca ʼarquiyaqteỹaxac ʼam ñimaye?
Ra huoʼo ca qomiʼ ỹanem ca nachetaqtaxanaxat ỹataqta yauelaxa, sauoqtaique ra camaye ỹaỹaten ra qanʼachiquiaxac souaxat seʼeso qomiʼ ỹanem. Qautaxaỹaxañi Deuteronomio 16:17 qataq qaumalligui neʼena:
-
Ra ʼacuennataxalec ʼenauac na ʼam ỹanem ñi Jehová, ¿ʼananomta ca ʼaryaxa ra huoʼo ca ʼauanem ñimaye? ¿Négueʼt ca ʼauanem?
5. Ra nañanaxac ỹauega ca qalota ʼachiquiaxacpi
Qalota na shiỹaxauapi iʼamaqten ra na naỹajnaguec, ca ʼonaxaic lʼonataxanaxac qoʼ aca alom nqaʼen machiguiñi. ¿Qalaxaye ʼeesa reʼera? Qaumichiñi na VIDEO qataq qaumalligui neʼena:
-
Naiʼctaxa ra seʼeso elegaxaic so video nanomta ra ỹataqta lauela ra nelegaxac, ¿táʼaencoʼ ra ỹalat seʼeso?
-
Somaye lcaʼauʼa ra nañanot ra nachaalataxac ñi Jehová, saishet ra nelegaxac. ¿ʼAuʼamaqten ʼam ra ỹaỹamaqchiguiñi so lcaʼauʼa ra ỹoʼot? ¿Táʼaencoʼ?
So saxanaxa ra cristiano, so apóstol Pablo ishet taxa ra ʼamaqtaqaic so lʼonataxanaxac. Somaye lapaxaguenatac so ʼamaqtaqaic rapaxaguenataxanec na namaxasoxonaxacpi so judiopi. Qalaxaye somaye ỹalat ʼenauac seʼeso yaqtoʼ iviraʼa ra cristiano. ¿Ntogottac so lcopaʼague? Qautaxaỹaxañi Filipenses 3:8 [TBSNT], qataq qaumalligui neʼena:
-
¿Táʼaencoʼ so Pablo ra ʼenapec «chochi lasogoñi» ʼenauac so ỹoʼot so saxanaxa ra cristiano?
-
¿Négueʼt so ʼachiquiaxacpi nmenguet so ỹalat coʼollaxa?
-
¿ʼAuʼamaqten ra nʼonaxat ʼra ʼanachaalataxac ra ʼalcaʼauʼa ra ʼaviʼoxoren ñi Jehová? ¿Táʼaencoʼ ra nache ʼeetec ra ʼarcuennataxac?
So ñigui ra cristiano so Pablo nache ỹaconguet so qalota ʼachiquiaxacpi maye napacalec so ỹalat coʼollaxa.
HUOʼO NA NASAXAUEC RA: «Qaica ca naigui ca ʼanañanot imauec ra ʼanachaalataxac ñi Dios».
-
¿ʼAcuennate ra huoʼo ra naigui ra ʼanañanot na ʼanachaalataxac ñi Jehová? ¿Táʼaencoʼ?
NA ʼAMAQTAQAIC
Ra qarauotaxanaqtaic ñi Jehová qomiʼ iraxan ra ñañanqot ñimaye qataq ñachelaq.
ʼAntoueetaʼac
-
¿Táʼaencoʼ ra ʼoonolec ñi Jehová taiguet ra sauotaxac imauec ra qarquiyaqteỹaxac qataq ra shiʼoxorenaq?
-
¿Négueʼt ca lachetaqtaxanaxat ỹanem ñi Jehová na testigopi mashe nachel?
-
¿ʼArauela ra ʼanañanot ñi Jehová?
ʼAUANATA CA LỸA
ʼAmeten táʼaencoʼ aso cantante taq so deportista lcaʼauʼa ra nañanot ñi Jehová.
ʼAuanata táʼaencoʼ ra itchiguiñi ra qanañanot ñi Jehová.
«¿Táʼaencoʼ ra iuen ra qanañanot ñi Jehová?» (La Atalaya, 15 de enero de 2010)
ʼAmeten neʼena nʼonec ra ntonaxac nam nañanot ñi Jehová.
ʼAutaxaỹaxan táʼaencoʼ aso ʼalo ra nmit so ʼeetapeguecpi ye nʼaqtaguec «Queuoigui so viʼiyelpi ra ñinataxateguelaʼt táʼaencoʼ ra qonaqtaina».
«Aye la Biblia naralaxat ra achaalataxac» (La Atalaya, 1 de noviembre de 2012)
