Na cheʼetague ra huaronpi, iuattaʼa ra queta ra machiguiñi ʼeetaʼam so naʼaq ra huaron. Qaq ishet ra qaỹañoxot. Reʼera ỹataqta ỹaỹaten na cristianopi queuoigui qalota viʼiyel ra namoxou qataq nʼañaxat ra queta ra ỹalaxaguet na lqataxacpi aye la Biblia.

1. ¿Négueʼt ca lqataxacpi aye la Biblia ỹanem ca nhua?

Ñi Jehová ipataxalec ca nhua ra lqaic ca lhuoʼ lʼecpi (ʼautaxaỹaxan Efesios 5:23). Ñimaye iuattaʼa ra qalcaʼauʼa ra ỹoʼot camaye ỹanem ra ʼachiquiaxac ca lhuoʼ lʼec. Aye la Biblia ỹanem neʼena lqataxac na nhuapi: «na ỹalleppi maye mashe huaron ỹataqta ỹauotec aca lhua» (Efesios 5:25). ¿Négueʼt ca naigui reʼera? Ca nhua ỹauotec aca lhua ỹauotaʼa ra lqopitaxanaqtaic ra ndoteʼ taq ra huoʼo ra ỹalectaʼaguetpi. Iloʼogue aca lhua qataq nʼañaxat ra npaxajlec ra yoʼoqchigui lhuenaxanaxa taq nanomaxapi (1 Timoteo 5:8). Qaq ra ʼamaqtaqaic, ra ipacapega ra npaxajlec ra lhuenaxanaxa ra ỹauatton taq ỹiʼoxoren ñi Dios acamaye (Mateo 4:4). Qaỹaloqnaxana, ishet ra nnaictegueʼ acamaye ra natamen taq itaxaỹaxan ana la Biblia. Ra ca nhua ntelaʼa ỹauotaʼa ra lauotaxanaqtaic aca lhua, nache queta ra iʼañaqchet ra nauochaxac ñi Jehová (ʼautaxaỹaxan 1 Pedro 3:7).

2. ¿Négueʼt ca lqataxacpi aye la Biblia ỹanem aca nhua?

Ye lʼaqtac ñi Dios ʼenapec ra aca nhua iuen ra «ỹataqta huoʼo naq ʼenec naqaʼen ca lhua» (Efesios 5:33). ¿ʼEetec ra ỹañoxot reʼera? Ishet ra icuennate naua noʼon lataxaco ca lhua taq ra lañaxataxa ra iloʼogue acamaye taq na llalaqpi. Taqaʼen ishet ra ỹachaxan ra ʼenec ra lhuotta ra itauan ca lcaʼauʼa ra ỹoʼot camaye, remalli ỹauotaʼa ra lauotaxanaqtaic taq ʼonaxaic ca nasaxauec ra lataxac camaye, naiʼctaxa ra saishet ra lʼamaqtenaxaua.

3. ¿ʼEetec caua nhua ishet ra iʼañaqchet ra lhuaỹaxac?

Qaq caua nhua, aye la Biblia ʼenapec ra caua maye «eetaʼama da ʼoonolec shiỹaxaua» (Mateo 19:5). Reʼera naigui ra iuen ra ỹataqta ntelaʼaguet camachaqca ra ishet ra isorache. Ỹoqoʼoye saxaỹet ỹoʼot ra lraqaʼ yaqtoʼ ndotaʼt taq iʼaxat ra lcuennataxac taq iʼaxatta na huetaigui añi lquiyaqte ỹauotaʼa ra lauotaxanaqtaic. Taqaʼen caua maye saishet ra ỹaxanec ra ca lỹa ỹactec ra ʼamaqtaqaic napacalec ca lamoxoua, ndotec ñi Jehová. ʼEnauaque ỹataqta iloʼoguet ra saishet ra ñaxat ra lqopitaxanaqtaic ca saishet ra lamoxoua.

 ÑIMITAQ RA PAXAGUENAXAT

4. Nhua, ʼauauotec taq ʼauloʼogue aca ʼarhua

5. Nhua, ʼauauotec taq ʼauʼot ra ʼenec ca ʼarhua

Aye la Biblia ỹanem ra lqataxac aca nhua ra huoʼo ra ʼenec nqaʼen ca lhua, naiʼctaxa ra ỹiʼoxoren ñi Jehová qoʼ saishet. Qautaxaỹaxañi 1 Pedro 3:1, 2 qataq qaumalligui neʼena:

• Ra ca ʼarhua saishet ra ỹiʼoxoren ñi Jehová, yoqta ra ʼam huotaique ra camaye ỹoʼot reʼera. ¿Négueʼt ca ishet ra ʼam itauan yaqtoʼ ʼauañoxot reʼera? ¿Saxaỹet ʼauʼaxatem ra nʼaqtac qoʼ auotaʼa ra ʼarataxac taq ra ʼauʼot ra ʼenec camaye? ¿Táʼaencoʼ ra nache ʼeetec ra ʼarcuennataxac?

Ca nhua taq aca nhua ʼenauaque ishet ra noʼon na ʼalcaʼauʼapi ra ỹoʼot. Ajá, huoʼo ca huaña acamaye npeʼenguet ra lmejnaxanaxac ca lhua. Huaña nache saishet ra renotapiguiʼ ra iʼaqtaxanem na lcuennataxacpi taq ỹachaxan ra ʼenec, qalaxaye iuen ra ntoueetaʼac ra ñi Jehová ipataxalec  ca lhua ra ishet ra lcaʼauʼa cam ỹanem ra ʼachiquiaxac ca lhuoʼ lʼec. Qataq iuattaʼa ra acamaye nʼañaxat ra itauan na lcaʼauʼapi ca lhua. Ra ỹoʼot reʼera nache itauan ra machiguiñi ca lhuoʼ lʼec. Qautaxaỹaxañi 1 Pedro 3:3-5 qataq qaumalligui neʼena:

• ¿ʼEetec ra lquiyaqteỹaxac ñi Jehová ra ilaʼa ra aca nhua ỹachaxan ra huoʼo naq ʼenec ca lhua?

6. Ishet ra qanapacalec na nqalanaxacpi na nhuaỹaxac

 NA ʼAMAQTAQAIC

Ca nhua taq aca nhua ishet ra machiguiñi ra nauotaʼt, huoʼo naq ʼenec taq ỹalaxaguet na lqataxacpi aye la Biblia.

ʼAntoueetaʼac

• ¿ʼEetec ishet ca nhua ra itauan ra ỹactec ra machiguiñi ra lhuaỹaxac?

• ¿ʼEetec ishet aca nhua ra itauan ra ỹactec ra machiguiñi ra lhuaỹaxac?

• ʼAm ra mashe ʼauaron, ¿négueʼt ca lqataxac aye la Biblia ishet ra ʼam itauan yaqtoʼ ʼauʼañaqchet ra ʼarhuaỹaxac?