PAXAGUENAXAT 50
ʼEetec ishet ra machiguiñi na ʼarhuoʼ lʼec (laỹi 2)
Na ñalaqpi lachetaqtaxanaxat ñi Jehová. Ñimaye iuattaʼa ra na ntaʼalpi ỹataqta iloʼogue neʼena lachetaqtaxanaxat. Ỹoqoʼoye ỹanem na noʼon nqataxacpi yaqtoʼ ishet ra ỹañoxot. Taq ỹanem na lqataxacpi na ñalaqpi yaqtoʼ ishet ra itauan ra machiguiñi na lhuoʼ lʼec.
1. ¿Négueʼt ca nqataxacpi ỹanem ñi Jehová na ntaʼalpi?
Ñi Jehová iuattaʼa ra na ntaʼalpi taq nateʼelpi ỹauotec na llalaqpi taq huetaʼaguet namayepi. Taqaʼen ñimaye huotaique ra iloʼoguet camachaqca chaqaic taq ỹapaxaguen nateeteguet na lqataxacpi aye la Biblia (Proverbios 1:8). Souaxat na ñalaqpi, ñi Dios ʼenapega na ntaʼalpi: «Qauapaxagueñi, qataq qaỹaʼañim dam napaxaguenataxanaxac maye quetagueʼ nam ỹaʼamaqteetac so Qarataxalaʼ [ñi Jehová, NWT]» (ʼautaxaỹaxan Efesios 6:4). Ñi Jehová lauela ra ilaʼa ra na ntaʼalpi ỹaqchet na llalaqpi quetagueʼ na lqataxacpi ñimaye qataq ra saishet ra ỹasaxalec reʼera qaipataxalec ca lỹa.
2. ¿Négueʼt ca lqataxacpi ñi Jehová ỹanem na ñalaqpi?
Ñi Jehová ʼenapega na ñalaqpi ʼeeta: «ỹataqta qaualaqaiguet ca qadtaʼai» (ʼautaxaỹaxan Colosenses 3:20, TBSNT). Ra ca ñalec huoʼo naq ʼenec taq ỹalaxaguet caua ltaʼal nqaʼen machiguiñi caua maye qataq ñi Jehová (Proverbios 23:22-25). So Jesús nogotolec ỹataqta noʼon naloqnaxanaxat chaʼaye naiʼctaxa ra nalochiguiñi, ỹalaxaguet taq huoʼo ra ʼenec soua ltaʼal maye saq nalochiguiñi (Lucas 2:51, 52, TBSNT).
3. ¿Négueʼt ca ishet ra ỹoʼot ʼenauac na nhuoʼ lʼec yaqtoʼ nquigot ñi Jehová?
Ra huoʼo ca ʼaiʼalaqpi, yoqta ra ʼaryaxa ra ỹataqta ỹauotec ñi Jehová ʼeetaʼa ʼam. ¿ʼEetec ishet ra ʼauañoxot? Qoquegue neʼena lqataxac aye la Biblia: «nache ʼaviʼeguelaxattalec [naua lʼaqtaqa ñi Jehová] da ʼauapaxagueeteguec na ʼaỹaʼalaqpi, da qonetaña ca ʼarmaʼ, huoʼotaq da qoquetagueʼ ca nqaʼaic» (Deuteronomio 6:7). Yoqta ra ʼam mashe ʼauaỹaten ra saxaỹet ỹoltaxa ʼaviʼeguelaxattalec na mashe ʼauʼaqtaxanem na ʼaiʼalaqpi yaqtoʼ ntoueetaʼac. Ỹoqoʼoye yeʼeye texto naigui ra ʼam iuen ra ʼanmittaique ca nraqaʼ queuoigui ca naʼaq yaqtoʼ ʼauʼaqtaxanem ñi Jehová na ʼaiʼalaqpi. Taqaʼen noʼon ra imaʼaʼt ca nhuoʼ lʼec nqatec ca Iraqaʼ ye la semana yaqtoʼ ỹiʼoxoren ñi Jehová ra napaxaguena aye la Biblia. Qaq naiʼctaxa ra qaica ca ʼaiʼalaqpi, ra maiche ʼanapaxaguena ra Lʼaqtac ñi Dios ʼenauac na la semana ishet ra ỹataqta ʼam itauan.
ÑIMITAQ RA PAXAGUENAXAT
Semetenaq caua noʼon nqataxaco maye itauan ca nhuoʼ lʼecpi nomtaʼa ra qailoʼogue qataq machiguiñi.
4. ʼAuʼapaxaguen na ʼaiʼalaqpi ʼauotaʼa ra nauotaxanaqtaic
Qaỹapaxaguen ca ñalec ishet era qalaqaic. ¿ʼEetec ishet ra ʼam itauan aye la Biblia? Qautaxaỹaxañi Santiago 1:19, 20 [TBSNT], qataq qaumalligui neʼena:
-
¿ʼEetec ishet na ntaʼalpi ra ỹachaxan ra nauotaxanaqtaic ra remalli na llalaqpi?
-
Ra ca ntaʼa renotac, ¿táʼaencoʼ ra huanna ra nlaxanec ca llalaqpi? a
5. ʼAuloʼogue na ʼaiʼalaqpi
Yaqtoʼ ʼauloʼogue na ʼaiʼalaqpi, ỹataqta ʼamaqtaqaic ra ʼauʼaqtaxanem ñi ʼoonolec camayepi ra auogaxac. Ajá, reʼera petaʼa qalaqaic. Qaumichiñi na VIDEO qataq qaumalligui neʼena:
-
¿Táʼaencoʼ ra nqaʼen qalaqaic na ntaʼalpi ra iʼaqtaxanem na llalaqpi ra auogaxac?
-
¿Négueʼt na itauan ca ntaʼalpi ra iʼaqtaxanem reʼera na llalaqpi?
ʼEnaʼam ra qaiʼaxattaʼaguet, ana ʼalhua ramaxasoxotac so Satanás, na shiỹaxauapi nquiguec taq nquiguec ra qauemaicpi. Qautaxaỹaxañi 2 Timoteo 3:1, 13 qataq qaumalligui neʼena:
-
Ye versículo 13 ʼenapec ra huoʼo na shiỹaxauapi qauemaicpi ncat na nogotolecpi. Nache, ¿táʼaencoʼ ra ʼamaqtaqaic ra na ntaʼalpi ỹapaxaguen na llalaqpi ra auogaxac? ¿Qaq négueʼt ca ishet ra ỹoʼot yaqtoʼ iloʼogue na llalaqpi na ncataxanaxac?
ʼAmeten ra
Na testigopi de Jehová ỹoʼot na qalota na ntaunaxanaxacpi yaqtoʼ na ntaʼalpi ỹapaxaguen ra auogaxac na llalaqpi taq iloʼogue na ncataxanaxac. Qaỹaloqnaxana:
-
Qauloʼoigue na qaỹalquipi (video)
-
«ʼEetec ra ʼauaqtaxanem ca ʼaiʼalec ra auogaxac» (¡Despertad! núm. 5 2016)
6. ʼAuoʼo ra ʼenec caua ʼartaʼal
Na ñaqpiolecpi taq nsoxotpi iuen ra huoʼo naq ʼenec nqaʼen caua ltaʼal, qaq reʼera ʼenec ỹachaxan ra lataxac caua lʼaqtaqa ra remalle caua maye. Qaumichiñi na VIDEO qataq qaumalligui neʼena:
-
¿Táʼaencoʼ ra noʼon ra ca nsoq huoʼo ra ʼenec caua ltaʼal ra remalle?
-
¿ʼEetec ca nsoq ỹachaxan ra huoʼo naq ʼenec caua ltaʼal?
Qautaxaỹaxañi Proverbios 1:8 qataq qaumalligui neʼena:
-
¿Négueʼt ca iuen ra ỹoʼot ca nsoq ra ca ltaʼa qoʼ aca lateʼe huoʼo ca ỹamaxalec ra ỹoʼot?
7. Ñiʼoxoretaxanaxac ye nmaʼ
Na testigopi de Jehová nqatec ye lraqaʼ ye la semana yaqtoʼ ỹiʼoxoren ñi Dios huaña ye lmaʼ. ¿Qaq négueʼt ca qaỹoʼot queʼeca ñiʼoxoretaxanaxac ye nmaʼ? Qaumichiñi na VIDEO qataq qaumalligui neʼena:
-
¿Négueʼt ca ishet ra itauan yaqtoʼ saxaỹet ra qaỹoʼot ra ñiʼoxoretaxanaxac ye nmaʼ?
-
¿ʼEetec ishet caua ntaʼal ỹañoxot ra ñiʼoxoretaxanaxac ye nmaʼ ishet ra itauan taq ntonatan ʼenauac ca lhuoʼ lʼec? (ʼAmeten ye foto chigoqchiguiña neʼena paxaguenaxat).
-
Qaq ʼam, ¿huoʼo ca ʼanqalanaxac ra qanapaxaguiñiʼ? ¿Négueʼt ca?
Coʼolloxochiye ñi Jehová iuattaʼa ra so nhuoʼ lʼecpi israelitapi saxaỹet ra iʼaxat naua ñiyiguiʼshe lʼaqtaqa ñimaye. Qautaxaỹaxañi Deuteronomio 6:6, 7 qataq qaumalligui neʼena:
-
¿ʼEetec ʼam ishet ra ʼaualaxaguet neʼena nqataxac?
Na ishet ra ʼauʼot ca ñiʼoxoretaxanaxac ye ʼarmaʼ:
-
Qanaỹamaxachitaʼaguet na naponaxacpi añi la congregación.
-
Qautaxaỹaxañi taq qauaxachi ca nʼaqtaguec huetalec aye la Biblia lauela ʼenauac ca ʼarhuoʼ lʼec.
-
Ra huoʼo ca ʼaiʼalaqpi naʼasa, ʼanỹoxoñe na ishet ra ỹoʼot tachigui na nogotolecpi ye jw.org.
-
Ra huoʼo ca ʼaiʼalaqpi nsoxotpi, ʼalcaʼauʼa ca ʼoonolec paxaguenaxat tachigui namayepi ye jw.org.
-
Qauennaxachi ca ʼoonolec nʼaqtaguec aye la Biblia.
-
Qaumichiñi taq qauaxachi ca video ye jw.org.
HUOʼO NA NASAXAUEC RA: «Aye la Biblia ỹataqta qalaqaic ra ỹaỹateeteguet na ñaqpiolecpi».
-
¿Négueʼt ca ʼarcuennataxac ʼam?
NA ʼAMAQTAQAIC
Ñi Jehová huotaique ra na ntaʼalpi ỹauotec na llalaqpi, ỹapaxaguen taq iloʼogue; na ñalaqpi huoʼo naq ʼenec nqaʼen taq ỹalaxaguet caua ltaʼal; qaq ra ʼenauac na nhuoʼ lʼec ỹiʼoxoren ñimaye.
ʼAntoueetaʼac
-
¿ʼEetec na ntaʼalpi ishet ra ỹapaxaguen taq iloʼogue na llalaqpi?
-
¿ʼEetec na ñalaqpi ishet ra ỹachaxan ra huoʼo naq ʼenec caua ltaʼal?
-
¿Négueʼt ca ʼachiquiaxacpi ỹaconguet ca nhuoʼ lʼec ra nqatec ca lraqaʼ ye la semana yaqtoʼ ỹiʼoxoren ñi Dios?
ʼAUANATA CA LỸA
¿Négueʼt ca napaxaguenataxanaxacpi itauan ca ʼaiʼalec ra iviraʼa ra ỹe?
«Seis napaxaguenataxanaxacpi ʼamaqtaqaic tachigui na ʼaiʼalaqpi» (¡Despertad! núm. 2 2019)
ʼAutaxaỹaxan naua noʼon nqataxacpi tachigui na ilotegue ca mashe ỹe.
«Iuattaʼa ñi Dios ra seloʼoxogue caua qartaʼal ra mashe ỹe?» (Paxaguenaxat ye jw.org)
ʼAmeten ʼeetec so ỹale maye saq ỹaỹaten ʼeetec ra ỹaqchet so llalaqpi ñigui ra noʼon ntaʼa.
Ñi Jehová qomiʼ ỹapaxaguenec ra sapaxaguenaq na qoyalaqpi (5:58)
ʼAmeten ʼeetec ishet ca ntaʼa ra nquiguec ra nhuoteete ca llalaqpi.
«¿Négueʼt ca ishet ra ỹoʼot ca ntaʼa yaqtoʼ nquigot ca llalec?» (La Atalaya, 1 de noviembre de 2011)
a Ra aye la Biblia ra iʼaxat ra «nlaxanaxac» naigui ra ncoỹaraxanaxac qataq napaxaguenataxanaxac. Saishet ra nayeloxo qataq nhuaxanaguec (Proverbios 19:18).
