ʼEnauac qomiʼ huoʼo ra maiche lataxac ra qanʼotaxac taq ra seloʼoxogue ra qanʼotaxac. Sañoxotaq ra sachaxanaq na maiche qanʼotaxac taq ñaqaʼenaq machiguiñi ñi Jehová ra salaxasoxoguet na lqataxacpi aye la Biblia. Semetenaq naua maye.

1. ¿Négueʼt ca nqataxacpi iuen ra huoʼo ca iʼotec ra lataxac ra qanʼotaxac?

Ca cristiano ra lcaʼauʼa ca nogoxot nache iuen ra «ỹaỹamaxatta da nʼotaxac, qataq ỹaỹaten da ntel-laʼt, sa ishit da ñiʼoxonnaxai». Taqaʼen iuen ra quiʼitta ra logoxot yaqtoʼ ỹachaxan ra «quetagueʼ ñi Dios» (1 Timoteo 2:9, 10, TBSNT). ʼAmeten neʼenaua cuatro nqataxaco maye ñaqataxauec neʼena texto: 1) Ca qorogoxot iuen ra «ỹaỹamaxatta» qoʼ ỹaỹamaqchiguiñi. Nam npueblo ñi Jehová huoʼo na qalota ỹottaʼaʼt ʼotaxacpi ye mashe ʼaulaʼa na laponaxacpi añi la congregación. Qalaxaye na qorogoxot taq na lataxac ra soʼotaq na qaraue ỹachaxan ra sauoqoʼo ra ʼenec ñi Dios maye shiʼoxorenaqtac. 2) «Sa ishit da ñiʼoxonnaxai», reʼera naigui ra sevitaqaʼaguet na nogoxot ra ỹoʼot ra sachaxanaq ra lataxac na qarʼoc qataq nam ỹoʼot ra ñimittaqaique na maiche qaryoʼoxoyec. 3) «Ỹaỹaten da ntel-laʼt» qoʼ naỹajnec, reʼera sachaxanaq ra saishet ra sheʼenaxataq ʼenauac na paʼatec lataxac na nʼotaxac na shiỹaxauapi. 4) «Quetagueʼ ñi Dios», naigui ra na qaryaquiaxac saxaỹet iuen ra nqaʼen saq alaq ra na laỹipi ilaʼa ra shiʼoxorenaq ñi ʼeesa Dios (1 Corintios 10:31).

2. ¿Négueʼt ca ishet ra iʼotec na laỹipi cristianopi ra lataxac ra qaryaquiaxac?

ʼEesa ra ʼenauac qomiʼ paỹoʼot ra llicaʼaxauʼa ca sanaxañi, qalaxaye seuenaq ra secuennataxanaxalec ra ca qaryaquiaxac petaʼa ishet ra nqaʼen huañi na laỹipi. Ỹataqta ñaʼañaxataq ra saishet ra ñaqaʼenaq saq ỹaỹamaxañi na laỹipi. Salaxasoxoguet neʼena nqataxac: «ʼEnauac da shenaqta iuen da souaqapegueʼ na qaraỹepi qataq selaqaique ca laỹamaxa maye ishet da machiguiñi naqaʼen. Qaq ʼera da ʼeetec da setaunaxac namayepi da nquiguisheguem da lpiʼiỹaxac» (ʼautaxaỹaxan Romanos 15:1, 2).

3. ¿ʼEetec ra qaryaquiaxac itauan na laỹipi ra huotaique ra ỹauatton ñi Jehová?

Ñaʼañaxataq ra sanaxañi na nogoxot huoʼo ra lyac, qalaxaye ỹataqta secuennataxanaxalec négueʼt ca sanaxañi ra saxauaʼa na laponaxacpi añi congregación taq ra saʼaxataq ra nʼaqtac. Saishet ra sauoqtaique ra na shiỹaxauapi qaica ca ỹanaigui ra naʼaqtaxanaxac sachoqtac souaxat ra qaryaquiaxac. Ndaʼ ra sauoqtaique ra itauan na laỹipi ra ỹauatton ra ʼeesa taq ra ỹoʼot «da lyac da lapaxaguenataxanaxac Ñim Loʼonatac ʼEnauacna maye Qarcaʼalaxaqui» (Tito 2:10).

 ÑIMITAQ RA PAXAGUENAXAT

4. Na noʼon nyaquiaxac ỹachaxan ra ʼenec ñi Jehová

¿Négueʼt ca huomshe ỹataqta ʼamaqtaqaic ra soqochaqaʼa négueʼt ca nyaquiaxac sachaxanaxa na laỹipi? Qautaxaỹaxañi Salmo 47:2 qataq qaumalligui neʼena:

• ¿Négueʼt ca iuen ra iʼotec ra lataxac ra qanʼotaxac ra saỹatenaq ra qomiʼ lʼaqtaxanaxanecpi ñi Jehová?

• ¿ʼAuʼamaqten ra ỹaỹamaqchiguiñi ra soqochaqaʼa ʼeetec ra qanʼotaxac ra saxauaʼa na naponaxacpi taq ra saʼaxataq ra nʼaqtac? ¿Táʼaencoʼ ra nache ʼeetec ra ʼarcuennataxac?

 5. ʼEetec ra noʼon ra llicaʼaxauʼa ca qorogoxot qataq ra lataxac ra qanʼotaxac

Qaumichiñi na VIDEO.

Naiʼctaxa ra qaỹoqteuʼa qoʼ sa qaỹauaʼa ca qorogoxot, ʼamaqtaqaic ra quiʼitta qataq ỹaỹamaqchiguiñi tachigui cam qonactaña. Qautaxaỹaxañi 1 Corintios 10:24 taq 1 Timoteo 2:9, 10 [TBSNT]. Ime, qauʼaxachi táʼaencoʼ ra saishet ra sanaxañi ca nogoxot...

• ... qaica ca ỹanaigui ca qonactaña ltoxoic qoʼ shepaxan.

• ... ichecteuo qoʼ chaviigui ỹachaxan na qarʼoc.

Naiʼctaxa ra qomiʼ saishet ra seuenaq ra salaxasoxoguet so namaxasoxonaxacpi ca ỹanem so Moisés, neʼena namaxasoxonaxacpi qomiʼ ỹachaxana ra lcuennataxac ñi Jehová. Qautaxaỹaxañi Deuteronomio 22:5 qataq qaumalligui neʼena:

• ¿Táʼaencoʼ ra saq ỹaỹamaxañi ra sanaxañi ca nogoxot maye ỹachaxan ra ca ỹale egoʼ ʼalo qataq aca ʼalo egoʼ ỹale?

Qautaxaỹaxañi 1 Corintios 10:32, 33 taq 1 Juan 2:15, 16, qataq qaumalligui neʼena:

• Ra na qaryaquiaxac nqaʼen saq ỹaỹamaxañi na shiỹaxauapi lmaʼ ca qonactaña qoʼ añi la congregación, ¿iuen ra soqochaqaʼa reʼera? ¿Táʼaencoʼ?

• ¿ʼEetec ca nogoxot taq ra lataxac ra nʼotaxac ca qonetaña?

• ¿ʼAuʼamaqten ʼam ra neʼena nʼotaxacpi ishet ra ỹaañi ca cristiano? ¿Táʼaencoʼ ra nache ʼeetec ra ʼarcuennataxac?

 NA ʼAMAQTAQAIC

Ra noʼon ra llicaʼaxauʼa na qorogoxot taq ra lataxac ra qanʼotaxac, sachaxanaq ra sauoqoʼo ra ʼenec ñi Jehová taq na laỹipi.

ʼAntoueetaʼac

• ¿Táʼaencoʼ ra ỹoqochaʼa ñi Jehová ra lataxac ra qanʼotaxac?

• ¿Négueʼt caua nqataxacpi iuen ra huoʼo ca iʼotec ra lataxac ra qanʼotaxac?

• ¿Ishet ra huoʼo ca iʼotec ra qaryaquiaxac ra lcuennataxac na laỹipi ra ñiʼoxonnataxanaxac ʼeesa? ¿ʼEetec ra ỹoʼot reʼera?