Ñi Jesús nacheñi ñi «lqaic» añi la congregación cristiana (Efesios 5:23). Nagui naua naʼaxaʼte, roʼogoxona na «nlatac da ỹataqta ipactelec ca lʼonatac qataq huoʼo na ỹaỹaten» yaqtoʼ ilotalec na lʼaqtaxanaxanecpi ana ʼalhua chigoqchigui na piguem (ʼautaxaỹaxan Mateo 24:45, TBSNT). Neʼena «nlatac» ñi Jesús nacheñi ñi lcaʼauʼa, ỹoqoʼoye namaye huoʼo ra ʼenec ra huoʼo na lcaʼauʼa ra ỹoʼot. Naiʼctaxa reʼera ñaq queta ra nlatac ñi Cristo qataq itauan na lqaỹañecpi ñimaye. ¿Négueʼt neʼena nlatac? ¿ʼEetec ra qomiʼ iloʼogue?

1. ¿Négueʼt na «nlatac da ỹataqta ipactelec ca lʼonatac qataq huoʼo na ỹaỹaten»?

Ñi Jehová saxaỹet ra roʼogoxona na shiỹaxaua qoʼ ca ỹaleʼt saqaloteʼ ncoriguishecpi yaqtoʼ ilotalec nam npueblo (Malaquías 2:7; Hebreos 1:1). Qaỹaloqnaxana, so lcopague ra ileu so Jesús, nacheso so apostolpi taq ancianopi ye Jerusalén maye ilotalec aso la congregación (Hechos 15:2, NWT). ʼEnaʼam coʼollaxa, nagui naua naʼaxaʼte naua ỹaleʼt saqaloteʼ na ancianopi—na Cuerpo Gobernante na testigopi de Jehová—ỹanec na lapaxaguenataxanacpi ana la Biblia taq ilotalec ra qaiʼaxat ra nʼaqtac. Neʼena ỹaleʼt saqaloteʼ nachena na «nlatac da ỹataqta ipactelec ca lʼonatac qataq huoʼo na ỹaỹaten, da huoʼotaq ca nʼacoʼ [Jesús] ipataxalec camayi» ra ỹoʼot (Mateo 24:45a, TBSNT). ʼEnauac na shiỹaxauapi huetaigui na Cuerpo Gobernante cristianopi ncaʼaguishecpi chigoqchigui so espíritu santo taq iuattaʼa ra roʼonataxan ra Lʼonataxanaxac ñi Cristo qom ime ra nachaalataxac ana ʼalhua.

2. ¿Négueʼt na lapaxaguenataxanacpi ana la Biblia ỹanec na nlatac huoʼo na ỹaỹaten?

So Jesús ʼenapec ra neʼena nlatac huoʼo na ỹaỹaten qaipataxalec ra «iquiʼaxaatac [na laỹipi cristianopi] [...] da ivita yi laloqoʼ da nquiʼaxac» (Mateo 24:45b, TBSNT) ʼEnaʼam ca yoʼoqchigui nallic ỹoʼot ra qarʼañaxac taq qomiʼ noʼoite, na lapaxaguenataxanacpi ana la Biblia qomiʼ ỹanem ra qarʼañaxac yaqtoʼ saq saxanaxauec ñi Jehová taq soʼotaq na nʼonataxanaxac qomiʼ ipataxalec so Jesús (1 Timoteo 4:6, TBSNT). Neʼena napaxaguenataxanacpi chigoqchigui na naponaxacpi, naponaxacpi ltaʼaraic, na nmejnapi taq videopi huetalec ana la Biblia. ʼEnauac reʼera qomiʼ itauan ra saỹatenaqteguet na ỹaỹamaxareeta ñi Jehová qataq iʼañaqchet ra qanauochaxac ñimaye.

 ÑIMITAQ RA PAXAGUENAXAT

3. Nam pueblo ñi Jehová iuen ra naỹamaxatta

Ñi Jesús ilotalec na Cuerpo Gobernante yaqtoʼ ỹaỹamaxajñi na lʼonataxanaxacpi na testigopi de Jehová. So huaʼauñe siglo, aso congregación cristiana ʼenaʼam ra laỹamataxac. Qaumichiñi na VIDEO.

Qautaxaỹaxañi 1 Corintios 14:33, 40 qataq qaumalligui neʼena:

• Nateeteguet neʼenaua versículos, ¿lauela ñi Jehová ra naỹamaxatta na testigopi ñimaye? ¿Táʼaencoʼ ra nache ʼeetec ra ʼarcuennataxac?

4. Na nlatac huoʼo na ỹaỹaten ỹaỹamaxajñi ra qaiʼaxat ra nʼaqtac

So huaʼauñe cristianopi ỹataqta ʼamaqtaqaic nqaʼen ra iʼaxat ra nʼaqtac. Qautaxaỹaxañi Hechos 8:14, 25 qataq qaumalligui neʼena:

• So huaʼauñe siglo, ¿négueʼt so ilotalec ra qaiʼaxat ra nʼaqtac?

• ¿Négueʼt so ỹoʼot so Pedro qataq Juan so nqataxacpi chigoqoʼot so laỹipi apostolpi?

Ra qaiʼaxat ra nʼaqtac nʼonataxanaxac ỹataqta ʼamaqtaqaic ỹaỹamaxajñi na Cuerpo Gobernante. Qaumichiñi na VIDEO.

 So Jesús ỹachaxan ra ỹataqta ʼamaqtaqaic ra qaiʼaxat ra nʼaqtac. Qautaxaỹaxañi Marcos 13:10 qataq qaumalligui neʼena:

• ¿Táʼaencoʼ na Cuerpo Gobernante nqaʼen ỹataqta ʼamaqtaqaic ra qaiʼaxat ra nʼaqtac?

• ¿Táʼaencoʼ ra seuenaq ra na «nlatac da ỹataqta ipactelec ca lʼonatac qataq huoʼo na ỹaỹaten» ỹaỹamaxajñi neʼena nʼonataxanaxac ʼenauac ana ʼalhua?

5. Na «nlatac huoʼo na ỹaỹaten» qomiʼ icoỹarague

Na Cuerpo Gobernante icoỹarague na cristianopi ʼenauac ana ʼalhua. ¿ʼEetec ra lcaʼauʼa négueʼt na nqataxacpi iuen ra ỹan? ʼAmeten ʼeetec ra ỹoʼot reʼera so Cuerpo Gobernante ilotalec so huaʼauñe cristianopi. Qautaxaỹaxañi Hechos 15:1, 2 qataq qaumalligui neʼena:

• ¿Négueʼt so ncotatapigui so cristianopi so huaʼauñe siglo?

• ¿Négueʼt so ỹiʼiguenot so Pablo, Bernabé taq so laỹipi cristianopi yaqtoʼ ỹaỹateeteguet seʼeso qancotatapigui?

Qautaxaỹaxañi Hechos 15:12-18, 23-29, qataq qaumalligui neʼena:

• Huaʼauñe ra huoʼo so lcaʼauʼa, ¿négueʼt so ỹoʼot so cuerpo gobernante so huaʼauñe siglo yaqtoʼ ñi Dios icoỹarague so qancotatapigui? (Qaumichiñi ye versículos 12, 15 taq 28).

Qautaxaỹaxañi Hechos 15:30, 31 taq 16:4, 5, qataq qaumalligui neʼena:

• ¿ʼEetec ra lquiyaqteỹaxac so huaʼauñe cristianopi so ỹaconguet na lqataxacpi so cuerpo gobernante?

• ¿ʼEetec ra saỹatenaq ra ñi Jehová ỹanem ra ʼachiquiaxac souaxat ra ỹalaq?

Qautaxaỹaxañi 2 Timoteo 3:16 taq Santiago 1:5, qataq qaumalligui neʼena:

• Na Cuerpo Gobernante nagui naua naʼaxaʼte ra huoʼo ca lcaʼauʼa, ¿négueʼt ca ỹoʼot yaqtoʼ ỹaconguet ca iuen ncoỹaraxanaxac?

 NA ʼAMAQTAQAIC

Na Cuerpo Gobernante nachena na «nlatac da ỹataqta ipactelec ca lʼonatac qataq huoʼo na ỹaỹaten» maye lcaʼauʼa ñi Cristo. Neʼena nIatac ỹanem na nqataxacpi taq lapaxaguenataxanacpi ana la Biblia na cristianopi ʼenauac ana ʼalhua.

ʼAntoueetaʼac

• ¿Négueʼt ca lcaʼauʼa na «nlatac da ỹataqta ipactelec ca lʼonatac qataq huoʼo na ỹaỹaten»?

• ¿ʼEetec ra qomiʼ itauan na Cuerpo Gobernante?

• ¿ʼAuʼamaqten ʼam ra na Cuerpo Gobernante nachena na «nlatac da ỹataqta ipactelec ca lʼonatac qataq huoʼo na ỹaỹaten»?