ʼEnauac ana ʼalhua, qalota na shiỹaxauapi machiguiñi ra ỹiʼoxoren ñi Jehová huaigui na qalota congregacionpi. Neʼenapi cristianopi ỹataqta ỹauoʼo ra naigui na nqataxacpi taq ra ncoỹaraxanaxac ỹaconguet taq machiguiñi ra ỹottaʼaʼt ye lataxac ra itauan añi la congregación. ¿Nache ʼeetec ra ʼarquiyaqteỹaxac ʼam ca ʼancongregación?

1. ¿ʼEetec ishet ra ʼautauan añi la congregación ʼauotaʼa na ʼalraqa taq ra ʼarʼañaxac?

ʼEnauac qomiʼ sishetaq ra setauanaq añi la congregación. Qaỹaloqnaxana, ¿huoʼo ca nqaỹañecpi ỹaxaiquipi qoʼ ralola aca ʼancongregación? ¿Ishet ra ʼautauan camayepi yaqtoʼ ỹalectauo na naponaxacpi? ¿Qoʼ ishet ra ʼausheenaxana ca iuen nallic qoʼ ʼauỹo ca lmaʼ? (ʼautaxaỹaxan Santiago 1:27). Taqaʼen ishet ra setauanaq ra qaỹio qoʼ ca lỹa nʼonataxanaxac aca naponaxaqui. Qaica ca qomiʼ ỹamaqtalec ra soʼotaq neʼenapi. Ra qarauotaxanaqtaic ñi Dios taq na qarqaỹañecpi qomiʼ iraxan ra shenqapec: «Aỹem sootaʼa neʼena, qaq aỹem ʼauamaq qome» (Isaías 6:8).

Na testigopi mashe nachel taqaʼen ishet ra ỹottaʼaʼt ca lataxac ra itauan añi la congregación. Na nqaỹañecpi maye ipaquejlec na qaiỹaxanaique huetalec aye la Biblia ishet ra ntauapi añi la congregación, taq ra lcoʼopague iviraʼa ra anciano. Taq ʼenauac na nqaỹañecpi ỹalleppi taq ʼalpi ishet ra ỹan ca lraqaʼ ra iʼaxat ra nʼaqtac yaqtoʼ ỹaconeuaʼa ca lʼonataxanaxac ca precursor. Taqaʼen huoʼo na testigopi itauan ra qanʼoxosheguem na naponaxaquipi, qataq huoʼo na laỹipi ra taỹaʼa ca lỹa congregación maye iuen ca ntaunaxanaxac.

2. ¿ʼEetec ra sishetaq ra setauanaq añi la congregación sauoqtaʼa na qorom taq laỹipi yoʼoqchigui qaralamaxatpi?

Aye la Biblia ʼenapec: «Huoʼo naq ʼenec ʼanqaʼen Ñim Nataxalaʼ [Jehová, NWT] maye chegoqoʼot da ʼarsallaxa» (Proverbios 3:9). Qomiʼ sauoqoʼo ra naigui ra soʼogoxonaxa na qorom taq na laỹipi yoʼoqchigui qaralamaxatpi yaqtoʼ setauanaq aca qancongregación taq ra qaiʼaxat ra nʼaqtac ʼenauac ana ʼalhua (ʼautaxaỹaxan 2 Corintios 9:7). Ana qarachetaqtaxanaqte taqaʼen setauanaq ra nʼonataxanaxac ra qaitauan na laỹipi maye ltaʼaraic ra nqueʼejnaxac. Qalota na qarqaỹañecpi saxaỹet ra «huoʼo aca iỹotauga» yaqtoʼ lachetaqtaxanaqte (ʼautaxaỹaxan 1 Corintios 16:2). Aca anom ishet ra qaỹachangui ana laỹiʼ na nachetaqtaxanaqte huaña na naponaxaquipi qoʼ qaỹamaq qaỹauotaʼa ye donate.pr418.com. Ñi Jehová qomiʼ ỹanem ra ishet ra soʼogoxonaxa ca yoʼoqchigui qaralamaxatpi yaqtoʼ sachaxanaq ra qarauotaxanaqtaic ñimaye.

 ÑIMITAQ RA PAXAGUENAXAT

 NA ʼAMAQTAQAIC

Ñi Jehová ỹataqta huoʼo naq ỹanaigui na qarʼañaxataxac na soʼotaq yaqtoʼ setauanaq añi la congregación sauoqtaʼa na qalraqaʼ, qarʼañaxac taq yoʼoqchigui qaralamaxatpi.

ʼAntoueetaʼac

• ¿ʼEetec ishet ra setauanaq añi la congregación sauoqtaʼa na qalraqaʼ taq qarʼañaxac?

• ¿ʼEetec ishet ra setauanaq añi la congregación sauoqtaʼa na yoʼoqchigui qaralamaxatpi?

• ¿Négueʼt ca huotaique ra ʼauʼotpi yaqtoʼ ʼautauan añi la congregación?