Ra sonaqtaguet na qarqaỹañecpi, ra qarquiyaqteỹaxac ʼeetaʼam so ntaʼa David. Somaye ʼenapec: «Ñaq qauloỹa da ỹataqta noʼon qataq huoʼo da lyac, da ỹataqta nhuoteetaʼt na nqaỹañecpi» (Salmo 133:1). Yaqtoʼ ñiuotenaqtaʼt ʼenauac iuen ra setaunaxanaq. Ñi ʼoonolec iuen ra nʼañaxat yaqtoʼ saishet ra seqataqchetac.

1. ¿Négueʼt ca nataxaco qaiʼaalac nam pueblo ñi Dios?

Ra ʼanamaqtega ca congregación ca lỹa país, petaʼa saishet ra ʼauaỹateeteguet na lʼaqtaqa, qalaxaye ishet ra ỹataqta ʼauamaqchiguiñi. ¿Táʼaencoʼ? Chaʼaye camachaqca ca qonetague, ishet ra ʼaulaʼa ra na testigopi ʼenʼaʼt na nmejnapi na paʼaiguelo ana ʼalhua ra napaxaguena ana la Biblia. Taqaʼen ñaʼañaxataq yaqtoʼ sachaxanaq ra qarauotaxanaqtaic ñi ʼoonolec ra shenaqta. Camachaqca ca qarmaʼ, ʼenauac shiʼoxorenaq ñi Jehová qataq «ʼoonolec ca» qarcuennataxac ra soʼonataxanqot (Sofonías 3:9).

2. ¿ʼEetec ishet ʼam ra ʼautauan añi la congregación yaqtoʼ nhuoteetaʼt?

«Ñi ʼoonolec da qoñiita ỹataqta imauec naqaʼen da lquiyaqteỹaxac qataq da laʼañaxac da ỹauotec ca lqaỹa» (1 Pedro 1:22). ¿ʼEetec ishet ra ʼaualaxaguet neʼena nqataxac? Saishet ra ʼaulaʼa na npeʼenaxacpi na qarqaỹañecpi, ndaʼ ra ʼaulaʼa na noʼon lataxacpi. Saishet ra qonetaguet ndotec ca ʼanhuoteeteʼ, taqaʼen ʼanʼañaxat ra ʼauauatton ca laỹipi ỹottaʼaʼt na chegaqaʼague. Taqaʼen ʼanʼañaxat ra ʼanqatec camachaqca nquiỹaqtaxanaxac huetaigui añi ʼarquiyaqte (ʼautaxaỹaxan 1 Pedro 2:17). a

3. ¿Négueʼt ca ʼauʼot qom ʼancotaỹapegueʼ ca nqaỹa?

ʼEesa ra ñiuotenaqtaʼt, qalaxaye qomiʼ saq nalochiguiñi; ỹoqoʼoye huoʼo ye huaña ñi ʼoonolec ra shenaqta petaʼa ishet ra ỹoʼot ra nquiʼic ca lỹa. Ỹoqoʼoye ra Lʼaqtac ñi Dios ʼenapec: «Qauchoxoyiñi cam qarỹai». Taqaʼen ʼenapec: «Ñim Loʼonatac ʼEnauacna maye Qartaʼai [...] qamiʼ ichoxoreʼn» (ʼautaxaỹaxan Mateo 6:14). Qomiʼ huoʼo na qarasouaxashetpi ỹoʼot ra nquiʼic ñi Jehová, qalaxaye ñimaye qomiʼ ichoxoren. Ỹoqoʼoye ñimaye iuattaʼa ra sechoxorenaq na qarqaỹañecpi. ʼAm ra ʼananomtaʼa ra ʼauʼot ca nquiʼic ca ʼarỹa, nache ʼauaʼau ra ʼanmaneʼ camaye (ʼautaxaỹaxan Mateo 5:23, 24). b

 ÑIMITAQ RA PAXAGUENAXAT

4. ʼAnapacalec na nquiỹaqtaxanaxacpi

Qomiʼ sauoqtaique ra sachaxanqot ra qarauotaxanaqtaic ʼenauac na qarqaỹañecpi. Qalaxaye petaʼa ñaqaʼenaq qalaqaic ra saconaxaguet na laỹipi, qaỹaloqnaxana, nam saq ʼenaʼam qomiʼ. ¿Négueʼt ca ishet ra qomiʼ itauan? Qautaxaỹaxañi Hechos 10:34, 35 qataq qaumalligui neʼena:

• Ñi Jehová ỹaconguet na shiỹaxauapi ỹottaʼaʼt na chegaqaʼague yaqtoʼ ishet ra ntestigopi. Ñitouenaqtaʼac reʼera, ¿ʼeetec iuen ʼam ca ʼarmejnaxanaxac nam shiỹaxauapi saq ʼenaʼam ʼam?

• Cam qonetaña, ¿négueʼt na nquiỹaqtaxanaxac na shiỹaxauapi? ¿Táʼaencoʼ ra iuen ra ʼavitaʼaguet neʼena nquiỹaqtaxanaxacpi?

Qautaxaỹaxañi 2 Corintios 6:11-13 qataq qaumalligui neʼena:

• ¿Négueʼt ca ishet ra ʼauʼot ʼam yaqtoʼ nquiguec ra ʼauauotec ʼenauac na qarqaỹañecpi ỹalleppi taq ʼalpi?

5. ʼAm choxonnataxanaxaic taq ʼauʼot ra ʼanmanaxac

Naiʼctaxa ra qomiʼ huanna ra iuen ra sechoxorenaq ñi Jehová, ñimaye saxaỹet ra qomiʼ ichoxoren. Qautaxaỹaxañi Isaías 55:7 qataq qaumalligui neʼena:

• ¿Négueʼt ca qomiʼ ỹapaxaguenec neʼena versículo souaxat ra lataxac ra lchoxonnataxanaxac ñi Jehová?

• ¿Huoʼo ra ʼanachiquiaxac ra lchoxonnataxanaxac ñi Jehová? ¿Táʼaencoʼ?

• ¿Négueʼt ca aloicpi ishet ra ʼanqaʼen qalaqaic ra ñiuotenaqteʼ na laỹipi?

¿Négueʼt ca iuen ra soʼotaq yaqtoʼ sheʼenaxataq ñi Jehová taq ñiuotenaqteʼ na qarqaỹañecpi? Qautaxaỹaxañi Proverbios 19:11 qataq qaumalligui neʼena:

• Ra huoʼo ca ỹoʼot ca ʼam inogoqchet qoʼ saq ʼauaỹamaxaren, ¿négueʼt ca ishet ra ʼauʼot yaqtoʼ ʼauaỹamaxajñi reʼera?

Huoʼo ye huaña qomiʼ soʼotaq ca saq ỹaỹamaxaren na laỹipi. Ra souaqaigui reʼera, ¿négueʼt ca iuen ra soʼotaq? Qaumichiñi na VIDEO qataq qaumalligui neʼena:

• ¿ʼEetec ra ỹañoxot aso qarqaỹa so video ra ỹoʼot ra nmanaxac?

 NA ʼAMAQTAQAIC

ʼAm ra ʼauchoxoren na ʼarqaỹañecpi taq ʼauachaxana ra ʼarauotaxanaqtaic ʼenauac namayepi, ishet ra ʼautauan qome añi la congregación yaqtoʼ nhuoteetaʼt.

ʼAntoueetaʼac

• ¿ʼEetec ishet ʼam ra ʼanapacalec na nquiỹaqtaxanaxacpi?

• ¿Négueʼt ca ʼauʼot qom ʼancotaỹapegueʼ ca nqaỹa?

• ¿ʼArauela ra ʼauchoxoren na laỹipi ʼeetaʼam ra ỹoʼot ñi Jehová? ¿Táʼaencoʼ?