Naiʼctaxa ra ʼam ỹataqta ʼauauotec ñi Jehová qataq ʼanʼañaxat ra ʼavitaʼaguet ra ʼauʼot ra nquiʼic, huoʼo ca huaña ishet ra huoʼo ca ʼarasouaxashetpi Qalaxaye huoʼo na ltaʼaraic nasouaxashetpi saq ʼenaʼam na laỹipi (1 Corintios 6:9, 10). Ra ʼam ltaʼaraic ca ʼarasouaxashet, ʼantoueetaʼac ra ñi Jehová saishet ra ỹaxaneec ra ʼam ỹauotec; ñimaye lhuotta ra ʼam ichoxoren qataq ʼam ỹanem ra ltaunaxanaxac.

1. ¿Négueʼt ca iuen ra soʼotaq yaqtoʼ ñi Jehová qomiʼ ichoxoren?

Ra huoʼo ca ỹauotec ñi Jehová nanomta ra ỹoʼot so ltaʼaraic lasouaxashet, ỹataqta huoʼo ra laquicoxo. Qalaxaye ñi Jehová iʼañaqchet ỹauotaʼa reʼera ỹachaxanapec som pueblo coʼollaxa: «Naʼaictoxoʼ da ỹataqta togaxaraic na qarasouaxashichi, qalaxaye Aỹem soʼot qome da ỹataqta ỹapagaq ʼeetaʼam aca aloñi» (Isaías 1:18). Ra ñitouenaq imaʼaʼt ra qarquiyaqteỹaxac, ñi Jehová imaʼaʼt ra qomiʼ ichoxoren. ¿Qaq négueʼt ca naigui ra ntogotaxac? Naigui ra ca shiỹaxaua nanomtaʼa ra nquiʼic souaxat ra ỹoʼot ca lasouaxashet, ỹalat ra ỹoʼottac na qauem taq nqouagaxaunot ñi Jehová ra ichoxoren. Nache camaye ỹataqta nʼañaxat ra naralaxat ra lcuennataxac qoʼ ỹalat na nʼonataguecpi ỹauega ra reʼepenaxan, qataq nʼañaxat ra quegue ra nachaalataxac na quiʼitta lqataxacpi ñi Jehová (ʼautaxaỹaxan Isaías 55:6, 7).

2. Ra huoʼo ca nasouaxashet ltaʼaraic, ¿ʼeetec ra roʼogoxona ñi Jehová na ancianopi yaqtoʼ qomiʼ itauan?

Cam huoʼo ra lasouaxashet ltaʼaraic, ñi Jehová ʼenapega «ra nmittaique ra ltaunaxanaxac na ancianopi añi la congregación» (ʼautaxaỹaxan Santiago 5:14, 15, NWT). Neʼena ỹalleppi ỹauotec ñi Jehová taq na nqaỹañecpi. Namayepi masheye ra qaiqataxanaiʼ yaqtoʼ qomiʼ itauan ra saỹamaxataxañe ra qanauochaxac ñi Dios (Gálatas 6:1).

¿ʼEetec ra qomiʼ itauan na ancianopi ra huoʼo ca qarasouaxashet ltaʼaraic? Dos qoʼ tres namayepi roʼogoxona na lqataxacpi aye la Biblia yaqtoʼ qomiʼ ỹaỹamaxajñe. Taqaʼen qomiʼ ỹanem na noʼon nqataxacpi taq naʼañaqtaxanaxac seuenaq yaqtoʼ saishet ra ỹoltaxa sepeʼenaxanac. Ra ca shiỹaxaua huoʼo ra lasouaxashet ltaʼaraic qataq saishet ra ntogotac, na ancianopi nqateuaʼa yaqtoʼ npaxajlec añi la congregación ra qauem lataxac camaye.

 ÑIMITAQ RA PAXAGUENAXAT

3. Ra saʼaxataq na qarasouaxashetpi ỹoltaxa qomiʼ iʼañaqchet

Camachaqca qarasouaxashet iviroʼot ra iʼotec ñi Jehová, ỹoqoʼoye iuen ra saʼaxatemaq na qarasouaxashetpi. Qautaxaỹaxañi Salmo 32:1-5 qataq qaumalligui neʼena:

• ¿Táʼaencoʼ ra noʼon ra saishet ra sogotaxañi na qarasouaxashetpi ndaʼ ra saʼaxatemaq ñi Jehová?

 4. Ñi Jehová ỹachaxana ra lchoxonnataxanaxac na huoʼo ra lasouaxashet

Ra huoʼo ca ỹoʼot ca lasouaxashet ltaʼaraic saq nashen ra ỹalaxaguet na lqataxacpi ñi Jehová, nache qanqateuʼa camaye añi la congregación qataq saq ishet ra qanauochaxaua. Qautaxaỹaxañi 1 Corintios 5:6, 11 [TBSNT], qataq qaumalligui neʼena:

• Ñitouenaqtaʼa ra aca lalecte ỹasheeraxachigui ʼenauac ca ndaqñiguishec ʼayiiña, ¿ʼeetec ra naʼaqchet añi la congregación ra qanauochaxaua cam saq ntogotac ra lasouaxashet?

• Ra lataxac ra itauan na huoʼo ra lasouaxashet ¿ʼeetec ra ỹachaxana ñi Jehová ra huesota ra lataxac, choxonnataxanaxaic taq huotaxanaqtaqaic?

 NA ʼAMAQTAQAIC

Ra huoʼo ca qarasouaxashet ltaʼaraic qalaxaye ʼeesa ra ñitogotaqtac taq itchiguiñi ra saishet ra ỹoltaxa soʼotaq queʼeca, ñi Jehová qomiʼ ichoxoren.

ʼAntoueetaʼac

• ¿Táʼaencoʼ ra noʼon ra saʼaxatemaq na qarasouaxashetpi ñi Jehová?

• ¿Négueʼt ca iuen ra soʼotaq yaqtoʼ ñi Jehová ichoxoren na qarasouaxashetpi?

• Ra huoʼo ca ltaʼaraic qarasouaxashet, ¿táʼaencoʼ ra iuen ra ñimittaqaique ra ltaunaxanaxac na ancianopi?