Huoʼo ca huaña, ʼenauac qomiʼ sataỹaqaʼaguet ra npaʼaguenaxac taq ncanaguec. ¿Iuen ra qomiʼ iquichoqchet reʼera?

1. ¿Táʼaencoʼ ra saishet ra saʼaalaxa ra qomiʼ qaicanapec?

Aye la Biblia ỹataqtegue ra ʼenapec ra ʼenauac na huotaique ra ỹiʼoxoren ñi Dios qataq na «quetagueʼ So Cristo Jesús, nataqaʼen nqueʼetaxangui qome da ncanaguec» (2 Timoteo 3:12). So Jesús qaicanapec chaʼaye somaye saishet ra ʼeetaʼam ra lataxac nam huetalec ana ʼalhua maye ramaxasoxootac so Satanás. Ye qomiʼ sheʼenaxataq somaye, saishet ra saʼaalaxa ra na ntaʼalpi taq na nʼorganizacionpi na nʼamaqtenaxacpi neʼena ʼalhua qomiʼ icanapec (Juan 15:18, 19).

2. ¿ʼEetec ishet ra ñaỹamaxataqtaʼaguet ra ncanaguec?

Iuen ra saʼañaqchetaq ra qarpiʼiỹaxac ñi Jehová nagui. ¿Qaq ʼeetec ra qaỹoʼot reʼera? ʼAnqatec ca ʼalraqaʼ ʼenauac naua naʼaxaʼte yaqtoʼ ʼanatamenot ñi Dios qataq ʼautaxaỹaxan ye lʼaqtac. Qataq taqaʼen saxaỹet ra ʼauʼa na naponaxacpi añi la congregación. ʼEnauac reʼera ishet ra ʼam ỹanem ca nʼañaxac ʼauen yaqtoʼ ʼam ʼañaxaic ra ʼauataỹaʼaguet camachaqca ncanaguec, naiʼctaxa ra queʼeca ncanaguec chigoqchigui nam maiche ʼarhuoʼ lʼecpi. So apóstol Pablo, maye saxaỹet ra huoʼo ra ncanaguec, ỹiriñe: «Qaica ca sheʼetaique. [...] Chaʼaye Ñim Loʼonatac ʼEnauacna aỹem itauaatac» (Hebreos 13:6).

Cam qomiʼ itauan yaqtoʼ qomiʼ ʼañaxaiqa nachera ra saxaỹet ra saʼaxataq ra nʼaqtac. Ra qaiʼaxat ra nʼaqtac qomiʼ ỹapaxaguenque ra sepiʼiỹaqaʼa ñi Jehová qataq ñapagaqalec na qayiʼiỹaxa na shiỹaxauapi (Proverbios 29:25). Ra nagui ʼam ʼañaxaic ỹataqta ʼanaỹamaxatta yaqtoʼ queta ra ʼauʼaxattac ra nʼaqtac naiʼctaxa ra na ntaʼaIpi na shiỹaxauapi huotaique ỹiʼaxanguet ra qarʼonataxanaxac (1 Tesalonicenses 2:2).

3. ¿Qomiʼ itauan ra ñaʼañaxataxaguet na ncanaguec?

Ajá, saishet ra ñitonaqtapeguec ra qomiʼ qaicanapec. Qalaxaye ra sañoxotaq ra ñaʼañaxataxaguet na ncanaguec, ra qarpiʼiỹaxac nquiguec ra qaramta. Taqaʼen nquiguec ra ñiquigoqoʼot ñi Jehová chaʼaye ñanomaqteguet ra qomiʼ itauan ra ñaʼañaxataq ra qolaqta qom qaica ca qarʼañaxac ra soʼotaq reʼera (ʼautaxaỹaxan Santiago 1:2-4, TBSNT). Ñi Jehová huoʼo ra nquiʼic ra qomiʼ ilaʼa ra huoʼo ra qanqueʼejnaxac, qalaxaye ỹaỹamaxareeta ra ñaʼañaxataq ra qolaqta. Aye la Biblia ʼenapec: «Huoʼotaq qanqueʼetaxañi souaxat da qauʼochiitac ca ỹaỹamaqchiguiñi [...] damayi ỹataqta ỹaỹamaqchiguiñi, ỹaỹamaxadeeta ñi Dios» (1 Pedro 2:20, TBSNT). ʼEnauac nam nʼañaxat taq saq ỹaxanec ñi Jehová, ñimaye ỹanem ra ʼachiquiaxac ra achaalataxac chochaq tateec ana ʼalhua maye qaica ca npaʼaguenaxauapi ra ñiʼoxonnataxanaxac quiʼitta (Mateo 24:13, NWT).

 ÑIMITAQ RA PAXAGUENAXAT

4. Ishet ra ʼanʼañaxateguet ra ʼam npaʼagueneʼ na ʼarhuoʼ lʼecpi

So Jesús ỹataqta ỹaỹaten ra huoʼo na qarhuoʼ lʼecpi ishet ra saq ỹaỹamaxaren ra shiʼoxorenaq ñi Jehová. Qautaxaỹaxañi Mateo 10:34-36 qataq qaumalligui neʼena:

• Ra huoʼo ca lcaʼauʼa ra ỹiʼoxoren ñi Jehová, ¿ʼeetec ishet ra lataxac na lhuoʼ lʼecpi?

5. Queta ra ʼaviʼoxoreetac ñi Jehová naiʼctaxa ra huoʼo ca ncanaguec

 6. Ñi Jehová ʼam itauan yaqtoʼ ʼanʼañaxat

 NA ʼAMAQTAQAIC

Ñi Jehová ỹataqta huoʼo naq naigui nqaʼen ra qarʼañaxataxac ra shiʼoxorenaq ñimaye naiʼctaxa ra huoʼo na ncanaguec. ¡Ishet ra ñaʼañaxataq souaxat ra ltaunaxanaxac ñimaye!

ʼAntoueetaʼac

• ¿Táʼaencoʼ saishet ra iuen ra saʼaalaxa qomiʼ na cristianopi na ncanaguec?

• ¿ʼEetec ishet ʼam ra ʼanaỹamaxattaʼaguet nagui qom huoʼo ca ncanaguec?

• ¿Négueʼt ca ʼam itauan ra ʼaupiʼiỹaʼa ra ishet ra ʼaviʼoxoren ñi Jehová naiʼctaxa ra huoʼo camachaqca ñiʼiguenataguec?