Queuoigui neʼena paxaguenaxac aye la Biblia, ʼam masheye qalota na ʼauaỹaten ra lataxac ñi Jehová. Qaq qanaʼachec reʼera ra ʼarauotaxanaqtaic ñi Dios ỹataqta ltaʼaraic, ỹoqoʼoye petaʼa masheye ra ʼanañanot ñimaye qataq ʼanachel. Qaq ra saxanaxa, nache petaʼa mashe ʼacuennataxateguelec ra yaqtaʼa ra ʼauʼot reʼera. Qalaxaye qaiuattaʼa ra ime ra ʼanachel queta ra nquictashiguem ra ʼarpiʼiỹaxac. Ajá, ʼam ishet ra chochaq tateec ra ʼauʼañaqchetac ra ʼanauochaxac ñi Jehová. Semetenaq ʼeetec ra ʼauañoxot reʼera.

1. ¿Táʼaencoʼ ra iuen ra queta ra ʼauʼañaqchetac ra ʼanauochaxac ñi Jehová?

Iuen ra ỹataqta ñaʼañaxataq ra saʼañaqchetaq ra qanauochaxac ñi Jehová. ¿Táʼaencoʼ? «Yaqtoʼ saishet da qolaqaʼai so nqaʼaic maye qomiʼ ỹachaxanalo Ñim Loʼonatac ʼEnauacna» qataq saishet ra salataq ñimaye (Hebreos 2:1). ¿Négueʼt ca qomiʼ itauan yaqtoʼ queta ra npeʼet ra soʼonataxanaqtecot ñi Jehová? Semataqalec na qalraqaʼ ra saʼaxataq ra nʼaqtac qataq ñimittaqaique ca laỹipi lataxac ra nquictashiguem ra soʼonataxanqot ñi Qartaʼa Dios (ʼautaxaỹaxan Filipenses 3:16, NWT). ¡Qaỹoʼonataxanot ñi Dios ỹataqta ỹaỹamaqchiguiñi ra achaalataxac, qaica ca lỹa! (Salmo 84:10).

2. ¿Négueʼt ca iuen ra queta ra ʼauʼottac?

Naiʼctaxa ra na ʼanapaxaguenaxac aye la Biblia yaqtaʼa ra ime, ra ʼanachaalataxac ra ʼam cristiano chetaʼague ra chegoqtoʼot. Ana la Biblia ʼenapec ra ñi ʼoonolec cristiano iuen ra ỹaañi «da dalaxaic achaalataxac» (Efesios 4:23, 24, TBSNT). Ra queta ra ʼanapaxagueetega na lʼaqtac ñi Dios taq ʼaualegueuaʼa na naponaxacpi añi la congregación, nquiguec ra ʼanapaxaguena ñi Jehová taq naua lataxaco ñimaye. ʼAnmittaique caua lataxaco ra nquiguec ra ʼaviʼinaxat ra lataxac ñimaye. Qaq saishet ra ʼaxaneec ra ʼauʼot ca ʼanqochenaxat ʼauen yaqtoʼ ʼanqaʼen machiguiñi ñi Jehová.

3. ¿ʼEetec ra ʼam itauan ñi Jehová ra nquictashiguem ra ʼarpiʼiỹaxac?

Aye la Biblia ʼenapec: «Ñi Dios ỹataqta qamiʼ nalochiyiñi naqʼen, qataq qamiʼ qadamchiyiñi, qataq qamiʼ ʼañaxaiqa, qataq qaica ca qamiʼ ỹayigoʼt» (1 Pedro 5:10, TBSNT). ʼEnauac qomiʼ huoʼo na qañiʼiguenataguecpi. Qalaxaye ñi Jehová qomiʼ ỹanem ca seuenqaique yaqtoʼ ñaʼañaxataxaguet namayepi (Salmo 139:23, 24). Qataq ñimaye ỹachaxanapec ra ʼam ỹanem ca nyaxa qataq taqaʼen ca nʼañaxac yaqtoʼ npeʼet ra ʼauʼonataxanot (ʼautaxaỹaxan Filipenses 2:13, NWT).

 ÑIMITAQ RA PAXAGUENAXAT

4. Saishet ra ʼaxaneec ra ʼamalle ñi ʼanauochaxaua ʼamaqtaqaic

Ra ʼanatamen taq ʼanapaxaguena aye la Biblia ʼam itauan ra ʼanauochaxaua ñi Jehová. ¿Ishet neʼenapi ra ỹoʼot ra nquictashiguem ra ʼanquigot ñimaye? ¿ʼEetec ra ỹoʼot reʼera?

Qautaxaỹaxañi Salmo 62:8 qataq qaumalligui neʼena:

• Ra ʼanʼonaxat na ʼanatamnaxacpi ʼam itauan ra ʼauʼañaqchet ra ʼanauochaxac ñi Jehová. ¿ʼEetec ra ishet ra ʼauʼot reʼera?

Qautaxaỹaxañi Salmo 1:2 qataq qaumalligui neʼena:

• Ra ʼanʼonaxat ra ʼartaxaỹaxanataxanaxac aye la Biblia ʼam itauan ra ʼauʼañaqchet ra ʼanauochaxac ñi Jehová. ¿ʼEetec ra ishet ra ʼauʼot reʼera?

¿ʼEetec ishet ra ỹataqta ʼanqatec ra naigui ca maiche ʼanapaxaguenaxac? Yaqtoʼ ʼauanata caua nqataxaco, qaumichiñi na VIDEO. Ime nache qaumalligui neʼena:

• ¿Négueʼt ca nqataxacpi so video ishet ra ʼauʼot qome?

• ¿Négueʼt ca paxaguenaxatpi ʼarauela ra ʼanapaxaguena?

 NA ʼAMAQTAQAIC

Queta ra ʼauʼañaqchetac ra ʼanauochaxac ñi Jehová qataq ʼalapaxañi na qonetapeguecpi ra ʼauʼonataxanot ñimaye. ¡Nache ishet ra ʼantonatan ra ncaʼalaxa chochaq tateec!

ʼAntoueetaʼac

• ¿Táʼaencoʼ ra ishet ra ʼaupiʼiỹaʼa ra ñi Jehová ʼam itauan ra ʼanpeʼet ra ʼauʼonataxanot?

• ¿Négueʼt ca ishet ra ʼauʼot yaqtoʼ nquiguec ra qaramta ra ʼanauochaxac ñi Jehová?

• ¿Táʼaencoʼ ra ỹataqta ʼamaqtaqaic ra ʼalapaxañi na qonetapeguecpi yatqoʼ nquictashiguem ra ʼarpiʼiỹaxac?