¿Neguét cam ỹataqta ‘eesa? Qalota na shiỹaxauapi nnataxatac ram ‘eesa re’era qaỹaxactaq, qaq ne’ena qaỹaxactacpi ‘eeta’:

• ¿Isheto’ ra qomi iauoteque Ñim Qartaa Dios?

• ¿Ñaxañi qome ra naalataxac qataq ra nque’ejnaxac na shiỹaxauapi??

• ¿Ca eeteco’ ca aloiq na leuaxaicpi?

• ¿Ishet ra ltaq qancaʹalaxatec qome na leuaxaicpi?

• ¿Cam eeteco’ ca qanatamnaxac yaqto qomi naxaỹaxanalo Ñim Dios?

• ¿Cam shenaqteco’ ra sanataxa ca chochaq tateec qantonaxac?

¿Hua’ague ca sachigoxotaca’ague ca ỹataqta nateteuo qaraỹanec? Qalota na ỹajnaxanaxaicpi, qalaxayi ra laỹajnec huo’o ra sanatenhuo huo’otaq saqaỹague ye laỹanec. Na shiỹaxauapi nataq’en huo’o ra npe’en cam ỹataqta ‘eesa naỹajnec.

Qalaxayi, huo’o aye neré saishet ra ratenataxan qataq iaxat cam ‘eesa naỹajnec. So Jesús enapeco: “Ram araqtac mayi ỹataqta ‘eesa” (Juan 17:17 Dios nvita na shiỹaxauapi). Nagui aye nere qaỹamata’ac La Biblia. Na huetalec ana’ana nmejna nache qaỹachigotaigui aye nere La Biblia.

¿TA’AINEC RA QAINATAXALEC RE’ERA QAỸAXATTAQ? Enauac ana a’lhua nlaqtelec na nayiloxo qataq na quejnaxac. Huo’o na amaqtaxanaxaicpi ỹapaxaguenec ra Ñi Dios nache ena’ac re’era lqui’ic na shiỹaxauapi.

QALAXAYE ANA LA BIBLIA ’EETA RA LAPAXAGUENATAXANAXAC: Ñi Dios sa ishet ra chigoqo’ot ca qauem. Job 34:10 enapec: ‘Ñi Dios sa ishet ra ỹo’ot ca qauem cha’aye ỹaỹamachiguiñi ra l’onataxanaxac.’ Ỹaguec ram lauochi Ñi Dios na shiỹaxauapi ỹoqo’oye nache huotaique ỹanem na shiỹaxauapi cam ỹataqta no’on l’mariaxac, ỹoqo’oye so Jesús qomi ỹapaxaguenque ra ‘eeta’ ca qanatamnaxac: “Am Qartaa Dios mayi qoneto’ot na piguem [...] Ña anamaxaño qome ra aronataxanaxac. Ỹaqto ỹo’ot ca qonetapeguec, enauac nam huetalecna, eeta’am nam hueto’ot na piguem” (Mateo 6:9,10 Dios nvita na shiỹaxauapi). Ñi Dios ỹataqta ‘eesa ra qomi ỹauoteque ỹoqo’oye co’ollaxa huo’o so ỹan ỹaqto ishet ra ỹo’ot cam eetapeguec (Juan 3:16).

Nataqa’en anmitaique ye: Génesis 1:26-28; Santiago 1:13, qataq 1 Pedro 5:6, 7.

¿TA’AINEC RA QAINATAXALEC RE’ERA QAỸAXATTAQ? Ra laataxac nmaañe na shiỹaxauapi. Nataqa’en huo’o na ỹoqta’a quejnaxacpi.

QALAXAYE ANA LA BIBLIA ’EETA’ RA LAPAXAGUENATAXANAXAC: ‘Ñi Dios ỹapalaxat qome ra laataxac huetalec ana a’lhua, nache huo’o ca nlaxaxayec. Qome nvita na a’lhua ra l’onataxanaxac ñi Dios nache na shiỹaxauapi sa ishet ra qaỹapaxaguenec ca laataxac, qataq ca lainecpi qaiahuotaa ñigui l’onataxanaxat ra ỹo’ot ana a’lhua’ (Isaias 2:4). Nataqa’en Ñi Dios iaxaneguet ra nque’ejnaxac na shiỹaxauapi. Ana Nere La Biblia enapec: “Nache ñi mayi iỹodeec ‘enauaque naua lachiʹ namayipi. Huaña, nache sa ishet ra ileu ca shiỹaxaua, qataq sa ishet ra noỹiitac, huo’otaq ra n’alactapiguiñi, huo’otaq ra huo’o ra nqui’ic. Cha’aye ‘enauac na seloqtaigui nagui enuac imeuo” (Revelación [Apocalipsis] 21:4 Dios nvita na shiỹaxauapi).

Nataqa’en anmitaique ye: Salmo 37:10,11; 46:9 qataq Miqueas 4:1-4.

¿TA’AINEC RA QAINATAXALEC RE’ERA QAỸAXATTAQ? Huo’o na ỹapaxaguenec ra huo’o ca lqui’i qataq ca lpaqal na leuaxaicpi. Nataqa’en huo’o na ia’axatac cam leuxaic Ishet ra am ỹoiqnapec qataq ra ishet ra am naaxat. Nataqa’en huo’o na ỹapaxaguenec ra Ñi Dios ishet ra am ỹamaxa cam nhuaxanaxanqa’ huetaña ca noreq.

QALAXAYE ANA LA BIBLIA ’EETA’ RA LAPAXAGUENATAXANAXAC: Ra Seleuac nache semaxauo. Eclesiastes 9:5 enapec “na leuaxaicpi sa ishet ra huo’o ca nomtega” Sa ishet ra huo’o ca ỹaỹaten, sa ishet ra huo’o ca noma, huo’otaq huo’o ca ỹo’ot, nache sa ishet ra qomi itauan huo’otaq qomi ỹoiqnaape.

Nataqa’en anmitaique ye: Genesis 3:19 qataq Eclesiastés 9:6,10.

¿TA’AINEC RA QAINATAXALEC RE’ERA QAIAXATTAQ? Enauac ñamanac ra qanachalataxac qataq sauotaxac ra nachalataxac ca qanauochaxaua. Ỹoqo’oye, sauoqtaique ra qa’ancalaxateec ca qanauochaxaua mashe sogote ileu.

QALAXAYE ANA LA BIBLIA ’EETA’ RA LAPAXAGUENATAXANAXAC: Qalota qome na shiỹaxauapi qancalaxatec qataq qanachalataxañe. Cha’aye so Jesús enapeco’ ‘enauac na leuaxaicpi huaxaỹa qome cam lavilỹaxac so maye nache nca’alecpi’ (Juan 5:28,29 NM). Nam ỹoltaxa qancalaxatecpi nache ishet ra tateec ra nachalataxac ne’ena a’lhua cha’aye chigoqchigui ra maiche lcuenataxa Ñi Dios. Nache qome na qancalaxatecpi ra ỹataqta ỹalaxaguet ñi Dios nache ishet ra tateec ra nachalataxac. Ana La Biblia enapec: ‘Nam ỹaxalaxaguetpi ñi Dios nachena na ỹanalec ana a’lhua nache tateec ra lca’alaxa’ (Salmo 37:29).

Nataqa’en anmitaique ye: Job 14:14,15; Lucas 7:11-17 qataq Hechos 24:15.

¿TA’AINEC RA QAIANATAXALEC RE’ERA QAỸAXATTAQ? Qalota na shiỹaxaua tamnaxaicpi. Qalaxaye, huo’o na eetexa Ñi Dios saiasateguet na tamnaxac.

QALAXAYE ANA LA BIBLIA ’EETA’ RA LAPAXAGUENATAXANAXAC: So Jesús enapeco’: “Qaq ra ‘anatamen, nachi sa ishet ra ‘avi’iguelaxattalec ca ‘ar’aqtac maye qaiqa ca naigui” (Mateo 6:7 Dios nvita na shiỹaxauapi). So’ottaq cam ỹataqta ỹaỹamaxareta Ñi Dios nache ishet ra ỹasateguet cam qanatamnaxac. Ỹoqo’oye ye 1 Juan 5:14 enapec: “Cha’aye qomi’ saỹajnaqta ra huo’otaq seỹaxanqaique ca ỹaỹamaxareeta ñimaye, qalaq ishet ra qomi’ hua’axaỹalo”.

Nataqa’en anmitaique ye: Salmo 65:2; Juan 14:6,14, qataq 1 Juan 3:22.

¿TA’AINEC RA QAIANATAXALEC RE’ERA QAỸAXATTAQ? Huo’o nam nocopita ran nsallaxa, qataq huo’ona nocopita ra nataxala. Qalaxaye enauac re’era sa ishet ra qomi ỹanem ca ỹataqta no’on qantonaxac.

QALAXAYE ANA LA BIBLIA ’EETA’ RA LAPAXAGUENATAXANAXAC: So Jesús enapeco’: “Ỹataqta machiguiñi qome nam nauattotela’t ra iuen ca ltaunaxanaxac Ñi Dios” (Mateo 5:3 Dios nvita na Shiỹaxauapi). Ra sauoqtaique sa’amaxasoqchiguiñi qataq ra sauoqtaique sanataxa ca qantonaxac, nache ñimitaque cam ỹataqta ‘eesa lataxac Ñi Dios qataq cam iaxataque ñi maye. Ana La Biblia ia’axat ra ỹataqta ‘eesa Lataxac Ñi Dios qataq qomi ỹapaxaguenque cam ỹataqta no’on. Ra salagasoxoguet ram L’aqtac Ñi Maye Qartaa Dios nache ishet ra sanataxa ca qantonaxac qataq ishet ra sa’amaxasoqchiguiñi (Lucas 11:28).

Nataqa’en anmitaique ye: Proverbios 3:5,6,13-18 qataq 1 Timoteo 6:9,10.

 Ana La Biblia mashe semetenaqtaq ra ishet ra ỹasategueta naua’ seis qaỹaxatape. Qalaxaye, ¿aua’uotaique ra nquictasheguem cam araỹajnec ram huetalec ana La Biblia? Qaq ra “anauotootela’t ra auen ra amitauan Ñi Dios”, nache yoqta ra huotaque nquictec ca araỹajnec. Qalaxaye ỹoqta ra ña anataxatac ra ta’enco Ñi Dios ra ỹaxattec ra quejnaxac qataq ra nquiic huetalec ana a’lhua ra qaiaxattac ra ‘eesa ra qomi iauoteque ñimaye. Huo’otaq ra auauotaique ra no’on ra arcoxoc. Nache ana La Biblia qomi itauan cam shenatapeguec qataq ishet ra ỹasateguet qataq ia’axat cam sasaỹatenac.

Qalaq huo’o na sanocopita ra itaxaỹaxan ana La Biblia cha’aye eetega qalaqai. ¿Auaỹamaxareta ra am qaitauan ỹaqto’ ishet ra auaỹaten nam huetalec ana La Biblia? Nache na Testigopi de Jehová ishet ra am itauan, na mayipí dos naua ltauanaxanaxactel.

Aye uauchiguiñi ltaunaxanacte lere ‘eeta’ ra lenaxat: “Ishet ra qanauachaxaua Ñim Dios”, aye aye nere ca’ỹo’ot yaqto ishet ra am itauan ra anapaxaguena ana La Biblia. Qaq ra lỹa ltaunaxanaxac nachi naigui ra am qaỹapaxaguenec ana La Biblia cam maiche arma’. Huo’otaq ca maiche iqchiguiña. Qalota na shiỹaxauapi mashe qaitauan nache ỹaguec ra ntonaxac cha’aye ‘eetaxa ra ilalec ram ỹataqta ‘eesa ia’axataq Ana La Biblia.

Am natqa’en ishet ra auanata cam ỹataqta naigui ra l’aqtac Ñi Dios. Qataq ishet ra qomi isoreec cam saq ‘eesa naỹajnec qataq nam ỹoqta’a’t qaỹaxatacpi sanateneguet ram lapaxaguenataxanaxac ana La Biblia. Qalaxaye qomi ỹanema ra qanaquitaxac qataq ỹo’ot ra ỹataqta sa’amaxasoqchiguiñi. Cha’aye So Jesús enapeco’: “Nachi qami qome ỹataqta qauauatoñita ra ‘eesa lataxac, qaq re’era ‘eesa lataxac, nachi ra ỹataqta qami’ huesochiyiñi naqa’en” (Juan 8:32 Dios nvita na Shiỹaxauapi).