Ñi Jehová a Dios ỹaronaʼt soua huaʼauchiguiñi namoxoʼu. Aye la Biblia ʼenac ñi maye ỹoʼot aso huaʼauchiguiñe ʼalo. Ime nache, «ỹauegueuaʼa som ỹale». Nache so Adán ỹataqta ntootapeguec nache ʼenac: «Anaʼana nachana ana maiche ỹapachiyaxaua, qataq maiche ipiʼinecỹaxaua» (Génesis 2:22, 23). Ñi Jehová ñaq queta ra nshetaique machiguiñi na mashe huaroʼn.

Ra ʼauaron, petaʼa ʼapitaxaatega ra ʼenauac nalochiguiñi. Qalaxaye naiʼctaxa ra ỹataqta nqopichiỹaʼt ca huaronaʼt, huoʼo ra lqalaic qome (1 Corintios 7:28). Anaʼana mejna huetalec na lqataxacpi aye la Biblia. Ra ʼaualaxaguet, nache ishet ra itauan ra machiguiñi ye ʼarhuaỹaxac taq na ʼaiʼalaqpi (Salmo 19:8-11).

NA ʼENAC AYE LA BIBLIA: «Ca lhua nacheca ca lqaic acamaye» (Efesios 5:23).

Ra ʼam ỹale, ñi Jehová iuataʼa ra ʼaloʼogue aca ʼarhua ʼauauotaʼa ra ʼarqopitaxanaqtaic (1 Pedro 3:7). Ñi maye ỹoʼot aso ʼalo yaqtoʼ ʼanalochiguiñi. Qataq nshetaique ra ʼauahuoʼo taq ʼanqopita aca maye (Génesis 2:18). Ra ỹataqta ʼauauotec, nache ʼalhuotta ra ʼauamataxaañe na lqopiche (Efesios 5:25-29).

Ra ʼam ʼalo, ñi Jehová iuataʼa ra ỹataqta huoʼo ca naq ʼenec ca ʼarhua taq ra ʼautauan yaqtoʼ ishet ra ỹoʼot ra lʼonataxanaxac (1 Corintios 11:3; Efesios 5:33). ʼAlhuotta ra ʼatauan ca ʼeetapeguec naiʼctaxa ra huoʼo ra lqalaic (Colosenses 3:18). Ra ʼauʼot reʼera, ñi Jehová taq ca ʼarhua ỹataqta ʼam ỹahuoʼoi (1 Pedro 3:1-6).

RA ISHET RA ʼAUʼOT:

• ʼAnat ca ʼaramoxoua negueʼt ca ishet ra ʼauʼot yaqtoʼ ʼam noʼon nhua. Ỹataqta ʼanʼaxaỹaxaachiguiñi, nache ʼanʼañaxat ra ʼauʼot

• Ñaq ʼanhualaxauen, chaʼaye sa ishet ra pasaʼa ra qaỹaỹaten ra lqopiche ca nỹa

NA ʼENAC AYE LA BIBLIA: ʼAuen ra ʼalotelec ca laỹamaqaʼ ca ʼaramoxoua (Filipenses 2:3, 4). ʼAren ca ʼaramoxoua, ʼahuennate ñi Jehová iuataʼa ra na lalamaxatpi «nauoteʼ ʼenauac na laỹipi» (2 Timoteo 2:24, Dios Nvita Na Shiỹaxauapi, DNS). «Huoʼo na shiỹaxaua deʼequemaqtaxaʼn naua laʼaqtaqa, qaq naua laʼaqtaqa ca ỹaanaxanaxaic qalaq datannaxaʼn». Ỹoqoʼoye ỹataqta ʼaloʼoguelo naua ʼarʼaqtaqa (Proverbios 12:18). Ra lʼañaxac ñi Jehová qomiʼ itauan ra ỹajnaxanaxaiqa taq ỹoʼot na qarʼaqtaqa ra huetaigui na nauotaxanaqtaic taq nsoxoyic (Colosenses 4:6; Santiago 3:17).

RA ISHET RA ʼAUʼOT:

• ʼAnatamen yaqtoʼ ʼam maguiñi qataq sa ʼauapogui añi ʼarquiyaqte ra yaqtaʼa ʼanʼaqtaxaneʼ ca ʼaramoxoua cam ʼamaqtaqaic

• ʼAuennataxaatelec ca ʼarʼaqtaqa taq ʼeetec ʼanqaʼen

NA ʼENAC AYE LA BIBLIA: Ra ʼauaron, nache qoñiitaʼam ca «ʼoonolec shiỹaxaua» ra qoñiita (Mateo 19:5). Qalaxaye queta ra qamiʼ dos shiỹaxaʼu taq ỹottaʼaʼt na qarmejnaxanaxaqui. Ỹoqoʼoye qaviñi ra qanapaxaguiñiỹa ra ʼoonolec ra qarhuennataxaqui taq na qoñiitapeguec (Filipenses 2:2). Ra huoʼo ca qauʼochi nache qaviñi ra qanaỹachiñiitaʼt. Qanʼaqtaxañiỹaʼt yaqtoʼ huoʼo ca qarauegaxanaxaqui. ʼAnasheeteguet na lqataxacpi aye la Biblia ra qamiʼ ỹapaxagueʼn ra huoʼo ca qauʼochi ʼamaqtaqaic (Proverbios 8:32, 33).

RA ISHET RA ʼAUʼOT:

• ʼAuen ra ʼauʼaxatta na huetaigui añi ʼarquiyaqte ca ʼaramoxoua, sa ishet ra ndotec ca ʼarʼaqtaxanaxac sochaqna

• Sa ishet ra ʼanec ca ʼarʼaqtac ra ʼanshetaique huoʼo ca ʼauʼot ra saxanaxa ʼanʼaqtaxaneʼ ca ʼaramoxoua