ʼAm mashe ʼanapaxaguena anaʼana mejna: aye la Biblia nlaqchigui na lqataxacpi yaqtoʼ ʼam itauan qataq ye maiche ʼarmaʼ. Ñi Jehová nshetaique ra qamiʼ machiguiñi. Taqaʼen, ʼenac ra ʼauʼauaxaañe ra ʼaviʼoxoren, nache ñi maye ʼam ỹañeʼ ʼenauac ca ʼauenaque (Mateo 6:​33). Ñi Dios ỹataqta nshetaique ra ʼam nauochaxaua. Ỹoqoʼoye ʼaqopitaxan ca camachaqca ishet ra nquigaxateec ra ʼanauochaxaua ñi maye, chaʼaye ʼiye ye ỹataqta ltaʼaraic nʼoxoyec huetalec ca shiỹaxaua (Mateo 22:37, 38).

NA ʼENAC AYE LA BIBLIA: «Aỹem Qartaʼai. Qaq qamiʼ, qalaq qamiʼ ỹalqa qataq qamiʼ ỹalel, qaq ʼera dam shenapec, Aỹem Nataxalaʼ» (2 Corintios 6:18). Ñi Dios nshetaique ra ỹataqta qanauochaxaua. Ra atamnaxac nacheye ye ʼam itauan. Ñi maye qomiʼ iỹaxanalo: «Nache ʼeetaiʼ qome da qanqouagaxauñiitac» (1 Tesalonicenses 5:17). Nqopita ra ʼauʼaxatem na ʼarhuogoxoc taq na huetaigui ra ʼarquiyaqteỹaxac (Filipenses 4:6). Ra ʼanatamnaxaua na ʼarmaʼ lʼecpi, nache ilaʼa ra ỹataqta ʼauʼamaqten ñi Dios.

Ra ʼataqtacot ñi Dios taqaʼen ʼauen ra ʼanʼaxaỹaxan. ¿Qaq ʼéetec ra ʼashet? Ra ʼanapaxaguena aye la Biblia taq ana mejnapi iʼaxat aye maye (Salmo 1:1, 2). ʼAuennataxaalec na ʼanapaxaguetega (Salmo 77:11, 12). Ra ʼanʼaxaỹaxana ñi Dios taqaʼen iuen ra saxaỹet ʼauaʼa na naponaxac (Salmo 122:1-4).

Ra ʼauʼaxateec ñi Jehová na shiỹaxaua laỹipi, taqaʼen iʼañaqchet ra ʼarauochaxac ñi maye. Ra qoquelec raʼa, nache ʼananomteguet ra qouetaʼaguet ñi maye (Mateo 28:19, 20).

RA ISHET RA ʼAUʼOT:

• ʼAuoʼo ca ʼarraqaʼ ra ʼanatamen taq ʼautaxaỹaxan aye la Biblia ima na naʼaxaʼte

• ʼAtauan ye ʼarmaʼ ra iʼauaxaañe roʼonataxanot ñi Dios, sa ishet na nmataguec

NA ʼENAC AYE LA BIBLIA: «Qanquiquiỹot Ñim Loʼonatac ʼEnauacna, qaq Ñimaye nataqaʼen qamiʼ nquiigueta» (Santiago 4:8). ʼAuen ra ʼalapaxañe ʼeetec ca lataxaco ye ñiʼoxoretaxanaxac ye nmaʼ nache qoquetegue (Génesis 18:19). Qalaq sa ishet ra nachaqyita: ʼauennataʼa ra ʼaualecneuo ñi Dios na naʼaxaʼte. ʼAuʼañaqchet ye ʼarmaʼ ra ỹauotec ñi Dios. ʼAuʼaqtaxanem na mayepi ñi Dios «da qonetaña ca ʼarmaʼ, huoʼotaq da qoquetagueʼ ca nqaʼaic, huoʼotaq da ʼannaañi ye pe, qataq da qoñisheguem ye nteʼeta» (Deuteronomio 6:6, 7). ʼAviʼinaxat so Josué ra ʼenapec: «Qalaxaye aỹem qataq na ỹalamaxatpi, soʼonataxanaqot qome Ñim Nataxalaʼ» (Josué 24:15).

RA ISHET RA ʼAUʼOT:

• ʼAlapaqchiguiñi ye lataxaco nache qoquegue ca paxaguenaxac, ỹalecneuo ca lhuenaxanaxa ñi ʼoonatac ye ʼarmaʼ