Ra lviraxac ca ñalec ishet ra nlaqchigui ra ʼonaxaic taqaʼen ra lasamaxac caua chetaʼague ntaʼal. Petaʼa qauʼailac ra ỹataqta imeʼeguet ye qarraqaʼi taq ra qarʼañaxaquiʼ ra qaloỹigue ca ʼoʼoʼ. Ra nasamaxac taq ra naralaxat ra lataxac ra nhuennataxa ishet ra ỹoʼot ca nalemataic ye ʼarhuaỹaxac. Nache qaviñi ra qauʼochi ca qaraỹamaxaqui ra qaloỹigue ca ʼoʼoʼ taq ye qarhuaỹaxaqui. ¿ʼÉetec na lqataxacpi aye la Biblia ra qamiʼ itauaʼn ra qauaỹamaxajñi reʼera?

NA ʼENAC AYE LA BIBLIA: «Ca huoʼo da lsoxoyec, nache ỹataqta huoʼo da lhualaxavic, qataq nache ʼeetaiʼ da lauotaxanaqtaic». Taqaʼen, «saishet da napagaqaanaxaic. Qataq saishet da inogoqchet ca camachaqca» (1 Corintios 13:​4, 5). Ra chetaʼague ʼam nateʼe, lhuotta ra ndotec ʼarqochoxo ca ʼoʼoʼ. Qalaq ca ʼarhua ipetaʼa ra sa ʼaqochaʼa. Ỹoqoʼoye sa ʼacouaʼai ra taqaʼen iuen ra ʼaqochaʼa. Ra huoʼo ra ʼarhualaxavic taq nauotaxanaqtaic, ishet ra ʼauachaxanot ra ʼauen taq ra ʼauauoʼo ra ltaunaxanaxac ra qailoʼogue ca ʼoʼoʼ.

«Qamiʼ ỹalleppi [...] ñi ʼoonolec ỹataqta naỹateeteʼ qataq ichoxoren aca lhua.» (1 Pedro 3:7.) ʼAuaỹateetegue aca ʼarhua nagui imalec ra lʼañaxac ca ʼoʼoʼ. Taqaʼen ishet ra sa noʼon, nasamñe qoʼ iqalhuaqchen souaxat neʼena ralaxaic lʼonataxanaxac. Huoʼo naxa ra ʼam ralemataỹa, qalaq sa ʼaualemataỹaʼaguet, chaʼaye «ca qaỹoqchiguinguit da lalemataic camaye ỹoqta ỹaanataxanaxaic». ʼAuʼogoxona ra ʼaraỹajnaxanaxac nache ʼatauan ca iuetaique (Proverbios 14:29).

RA ISHET RA ʼAUʼOT:

• ʼAm ntaʼa: ʼAtauan aca ʼarhua ra iloʼogue ca ʼoʼoʼ, naiʼctaxa ra pe. ʼAnquigaxaraʼ na ʼauʼottacpi nache ʼaloʼoguet aca ʼarhua taq ca ʼoʼoʼ

• ʼAm nateʼe: Ca ʼarhua ra huotaique ʼam itauan ra iloʼogue ca ʼoʼoʼ, nache ʼauaconguet. Ra sa ỹaỹatelec ra ỹoʼot, sa ʼaualemataỹa. ʼAuapaxaguenec ʼeetec ra ỹoʼot qalaq ʼauauotaʼa ra nsoxoyec

NA ʼENAC AYE LA BIBLIA: «Caamaye ʼeetaʼam da ʼoonolec shiỹaxaua» (Génesis 2:​24). Naiʼctaxa ra nagui nquiguec ye ʼarmaʼ, sa ʼacouaʼai ra ʼam taq ca ʼaramoxoua queta ra «ʼoonolec shiỹaxaua». Ỹataqta qanʼañaxachi yaqtoʼ raʼañi ye qarhuaỹaxaqui.

ʼAm nhua ʼalo, ʼamiʼ ra ʼanʼachiquiaxac ca ʼarhua chaʼaye ʼam lỹatac taq itauan. Ca ʼarʼaqtaqa ra huetaigui ra ʼachiquiaxac ishet ra «datannaxaʼn» (Proverbios 12:18). ʼAm nhua ỹale, qonapega aca ʼarhua ra ỹataqta ʼauauotec taq ʼauauoʼo, taq ra sa lʼaxaic ra ʼanqopita na ỹoʼottac ye qarmaʼi (Proverbios 31:​10, 28).

«Qaica ca nmittaique ca maiche laỹamaxa. Nachaqrata da nmitaique ca nataqaʼen ỹaỹamaxaañi ca lỹa.» (1 Corintios 10:24.) Saxaỹet ra ʼauʼotec ca ỹaỹamaqchiguiñi ca ʼaramoxoua. Qauauoʼoi ca qarraqaʼi ra qanʼaqtaxañiỹaʼt, qantoñiitapegaʼt qataq qanʼaxaỹaxañiỹaʼt. Sa ishet ra ʼamta ra ʼanmatapeguelaʼt ra ʼanshetaique qoqueʼeguet ca ʼaramoxoua. ʼAuennataʼa ra lhuennaxanaxa. Aye la Biblia ʼenac: «Qaq saishet da sa naỹaanaʼt caamaye. Nachaqrata da naỹateetaʼt da ỹauoʼo ca laloqneʼc da saishet da nauañaʼt» (1 Corintios 7:​3-5). Qamiʼ ʼeesora ra qanʼaqtaxañiichigui reʼera. Ra nhualaxavic taq ra qanaỹachiñiitaʼt ỹoʼot ra iʼañaqchet ye qarhuaỹaxaqui.

RA ISHET RA ʼAUʼOT:

• ʼAcuennate ra ʼauʼot ca ʼarraqaʼ yaqtoʼ ʼandoteguet ca ʼaramoxoua

• Qanachaxañiỹaʼt ra qarauochaxaqui ʼauotaʼa ca nerec, ca regalo, qoʼ camachaqcataʼi

NA ʼENAC AYE LA BIBLIA: «Coʼollaq ñaq ʼam nogotolec, qaq nache ʼeetaiʼ da ʼautaxaỹaxaataʼape naua ñiyiguiʼshe laʼaqtaqa Ñim Loʼonatac ʼEnauacna, qaq naamaye nachenaua naua iviraʼa naqaʼen da ʼam ỹaanaxanaxaic [...], nache ʼancaʼalec» (2 Timoteo 3:​15). ʼAlapaxañi ʼeetec ra ʼauapaxaguen ca ʼaiʼalec. So saxanaxa ra ñiguiñi lhuotta ra huoʼo na ỹaỹaten. Ca ñaq huetauo, ishet ra ỹauatton ca qaravilỹaxaqui taq nanoma ra qamiʼ machiguiñi qoʼ sa ishet. ʼAutaxaỹaxanec ra ñaq qapiʼolec naiʼctaxa ra sa ỹaỹanegue. Qom ỹi, reʼera itauan ra lauela ra rtaxaỹaxan.

Sa ishet ra ʼapetaʼa ra ñaq qapiʼolec ca ʼaiʼalec ra ʼauʼaxatem ñi Dios. ʼAuʼot ra iʼaxaỹa ra ʼanatamenot ñi Jehová (Deuteronomio 11:19). Ra ʼauʼashetegueʼ, ʼauʼaxat nam ỹoʼotpi ñi Dios (Salmo 78:​3, 4). Ra nquictasheguem, ca ʼaiʼalec nanomteguet ra ỹataqta ʼauauotec ñim Jehová. Nache taqaʼen ỹauotec qome ñi maye.

RA ISHET RA ʼAUʼOT:

• ʼAnatamen yaqtoʼ huoʼo ca ʼaraỹajnaxanaxac ra ʼauapaxaguen ca ʼaiʼalec

• ʼAviʼiguelaxattalec ca nʼaqtaqa ʼauotaique ra ỹaỹajnegue yaqtoʼ pasaʼa ra ỹaỹateetegue ca ʼoʼoʼ