Ñi Dios huotaique ra qanauochaxaua. ¿Auaỹateno’ ra ishet ra anauochaxaua Ñi Dios? So Abrahán, toxoshaxapec qaỹaxana nauochaxaua Ñi Dios (Santiago 2:23). Ayem la Biblia ia’axat huo’o so shiỹaxauapi nataqa’en ntootapeguec ra nauochaxaua Ñi Dios qataq qalota so nachiquiaxac. Nagui qalota na shiỹaxauapi ‘enauac ana a’lhua mashe ivita ra nauochaxaua Ñi Dios. Am taqa’en ishet ra anauochaxaua Ñi Dios.

Ra lauotaxanaqtaic Ñi Dios ỹataqta ‘onaxaic sa ishet ra ‘eeta’am ca shiỹaxaua. Ñi Dios sa ishet ra ỹatenachet cam ỹoqta ‘eesa nauochaxauapi (Salmo 18:25). Ra lauotaxanaqtaic Ñi Dios sa ishet ‘eeta’am ca nsallaxa. Na sallaxanecpi ra ileu, nache ỹaqa’a ca shiỹaxaua lỹa nonaguet añi alom. Ỹoqo’oye ra lauotaxanaqtaic Ñi Dios nache ra re’era ỹataqta naigui ca nsallaxac qalaxaye qaica ca iuotaxanec (Mateo 6:19).

Peta’a ra huo’o ca am saiashenem ra auaỹaten ca lapaxaguenataxanaxac Ñi Dios. Ishet ra maiche anauochaxaua huo’otaq maiche arhuo’ l’ec ca am saiashenem ra auaỹaten ca lapaxaguenataxanaxac Ñi Dios (Mateo 10:36, 37). Ra huo’o ca am ieetac huo’otaq am iasauxatac, nache maiche annajla’t: “¿Negue’t ca sauotaique ñemeten, na shiỹaxauapi huo’otaq Ñi Dios?”. Acouennate ye’eye: ra huo’o ca am ‘enapexa sa ishet ra huo’o ca qollec, nache ¿aualaxagueto’? Yoqta ra sa ishet ra aualaxaguet. Cha’aye ra sauoctaique incaalaqtauec nache seuenac ra qarquiaxac. Ñi Dios ishet ra ỹo’ot ra tateec ra ancaaltauec. Ỹoqo’oye, no’on ra ñaq coquetalec ra anapaxaguetexa cam naigui ra anauochaxaua Ñi Dios, nache sa ishet ra aualaxaguet cam ‘eetega ra anañaxañe (Juan 17:3).