Ye’eye Mataqa’ ỹataqta n’onaxat qome ca qarmariaxac. Ñi Dios co’ollaxa sa ishet ra huotaique ra que’ejnaxac qataq ra nqui’ic ne’ena a’lhua. Qomchiye, Ñi Dios ỹo’ot ra ‘onaxai ‘enauac ana a’lhua. ¿Cam ‘eetec re’era? Semetenac cam ia’axat aye la Biblia.

Soxoraic na shiỹaxauapi. Ye Mataqa’ caỹo’ot lma’ na nauochaxauapi Ñi Dios. Na mayepi ỹo’ot ca ỹaỹamaqchiguiñi qataq ‘enauac ntaunapi, cha’aye qaỹalaxaguet ra l’aqtaq Ñi Jehová (Proverbios 2:21).

Qalota na nallic. Nache ye Mataqa’, qaica ca huo’o ca lqouaxa. Aye la Biblia ‘enapeco’: ‘Salaxaic qome na nallic ra nlactelec ana a’lhua’ (Salmo 72:16).

‘Onaxaica na lma’ate qataq qaỹaỹamaxareta na n’onataxanaxacpi. Ye mataqa’ ‘enauac na arhuo huo’o ca lalamaxat lma’ qataq ‘enauac na shiỹaxauapi ỹamacteguet ca l’onatac (Isaías 65:21-23).

 Nalochiguiñi ra nlagaxayec. Sa ishet ra nloqui qataq sa ishet ra nalaara’t na shiỹaxauapi. Ye l’aqtaq Ñi Dios ‘enapec: “[Dios] vi’iiguet naq’en ra alaataxac” (Salmo 46:8, 9 LÑI).

Qaica ca sa no’on. Aye la Biblia ‘enapec: Qaica ca shiỹaxaua ra hueta’a ye Mataqa’ nache ‘eeta: ‘Aỹem sa no’on’ (Isaías 33:24). Nataqa’en qaica ca sanauaañi, qaica ca qaicaua naua l’aqtaqa, qaica ca sa hua’aqa, qaica ca teraic ca lchi (Isaías 35:5, 6).

Qaica ca noiinaxac qataq ca nquiic taqa’en qaica ca nleuaxa. Ye l’aqtaq Ñi Dios ‘enapec: “Huaña, nachi sa ishet ra ileu ca shiỹaxaua, qataq sa ishet ra noỹiitac, huo’otaq ra n’alaqtapiguiñi, huo’otaq ra huo’o ra nquiic” (Revelación [Apocalipsis] 21:4 DNS).

Qaica ca shiỹaxauapi yiloxoic qataq ca qauemaic. Ñi Jehová ia’axat: ‘Ca yiloxoic qataq ca qauemaic, nache canashiuecot qataq ca que’elaqtaxañaxaic, nache canapoxosheguem’ (Proverbios 2:22).

Na shiỹaxauapi nchoxona’t qataq huo’o naqa’en ca lỹa. Nache qaica ca ñitaxaloxo, qaica ca saichoxoren ca lỹa, qaica ca shemataqaic, qaica ca nquiia ca lỹa. Na shiỹaxauapi nachoxonat qataq qaỹalaxaguet na ‘enapec Ñi Dios (Isaías 26:9).