So Jesucristo nache llalec Ñi Jehová qataq ỹataqta ỹaguec ra nauochaxaua ñi maye. So Jesús colloxochiye saxanaxa pelec ana a’lhua nache lma’ ra piguem qataq co’ollaxa ỹataqta salaxaic ra l’añaxac (Juan 17:5). Qaq so maye collaq nvita ana a’lhua nache ỹapaxaguenec na shiỹaxauapi ra ỹataqta ‘eesa lataxac Ñi Dios (Juan 18:37). Qataq ỹan so maiche nachaalataxac nache isheeten ra nasouaxashet qataq ra l-leuaxa na shiỹaxauapi ỹataqta ỹalaxaguet ra l’actaq Ñi Jehová yaqto huo’o ra lcaalaxa (Romanos 6:23). Nagui Ñi Jesús qoỹanem ra nta’a re’era l’onataxanaxac Ñi Dios ye piguem qaq nache ỹo’ot ne’ena a’lhua ca mataqa’ (Revelación 19:16).

Na lamaxashecpi Ñi Dios taqa’en maiche nauochaxaua ñi maye. Na sa qaila’a lamaxashecpi Ñi Dios lma’ ye piguem colloxochiye qaỹo’ot na mayepi collaq saxanaxa ra qaỹo’ot ana a’lhua (Job 38:4-7). Qataq ỹataqta qalota na mayepi (Daniel 7:10). Na mayepi taqa’en huotaique ra qaỹauatton Ñi Jehová (Revelación 14:6, 7).

Ñi Dios taqa’en huo’o na nauochaxauapi ne’ena a’lhua; qaỹamata’ac “testigo”. Ca shiỹaxaua ra huo’o ca iauaachigui hua’qaq nache ia’axatem ca huataxanaxalec ra ‘eesa lataxac cam iauaachigui nache ca shiỹaxaua qaỹamata’ac “testigo”. Nam Testigopi de Jehová ia’axatem na shiỹaxauapi cam ‘eetapeguec Ñi Jehová (Isaías 43:10). Nache ‘ena’am ra lcuennataxac na lamaxashecpi Ñi Dios na Testigopi de Jehová nataqa’en huotaique ra qaỹauatton ra ỹataqta ‘eesa lataxac Ñi Jehová. Na mayepi huotaique nataqa’en ra anauochaxaua Ñi Dios.