Ra sauoctaique ra qanauochaxaua Ñi Dios nache seuenac ra nate’eteuo qataq ỹaỹamaxareta Ñi Dios ca qaramqajnataxanaxac. So Jesús ‘enapec “Na ỹoqta ‘eesa ra ỹi’oxodeetac” Ñi Dios nache iuen ra nate’eteuo ca lli’oxonataxanaxac qataq iuen ra ỹaỹamaxareta Ñi Dios (Juan 4:23, 24 DNS). Huo’o ra ‘onolec n’amqajnataxanaxac ỹataqta ỹaỹamaxareta Ñi Dios (Efesios 4:4-6). Nachera re’era am ỹanem ca anachaalataxac, qalaxaye ca n’amqajnataxanaxac saỹaỹamaxaren Ñi Dios nacheca ca taỹa’a ra n’leuaxa (Mateo 7:13, 14).

Ishet ra auauatton ca n’amqajnataxanaxac ỹataqta ỹaỹamaxareta Ñi Dios ra alogui ca lataxac na lataxanatacpi. Ñi Jehová ỹataqta nate’eteuo ra lataxac nache ca ỹoxoretac ñi maye nataq’en iuen ra nate’eteuo ra lataxac. Nache ‘ena’am aca qo’ipaq ra maye no’on acamaye nache ỹataqta no’on ra alaỹaxac. Ca n’amqajtaxanaxac ỹataqta ỹaỹamaxareta Ñi Dios, ỹo’ot nataqa’en ca lataxanatacpi ra no’on ra n’onataguec (Mateo 7:15-20).

Na Nauochaxaua Ñi Jehová ỹauotec aye la Biblia. Na mayepi ỹalaxaguet aye la Biblia cha’aye ỹaỹaten ra itauan ra huo’o ca saỹaỹamaxañi qataq ỹo’ot ra nquiguec ra ỹauatton Ñi Dios (2 Timoteo 3:16). Taqa’en, ra huo’o ca rapaxaguenataxanec nache nataqa’en ỹo’ot.

 Na nauochaxauapi Ñi Jehová ỹataqta ỹauotec ca lỹa. So Jesús ỹataqta ỹauotec na shiỹaxauapi ỹoqoye ỹapaxaguenec ca ‘eetapeguec Ñi Dios qataq itauan so sa no’onpi. Nache ena’am so Jesús na lataxanatacpi Ñi Dios sa ishet ra iỹo’otauxa ca choxorac huo’otaq saỹauotec ca salahuo’ l’ec. So Jesús ‘enapec ra qaỹauatton qome ca lataxanatacpi cha’aye ỹataqta ỹauotec ca lỹa (Juan 13:35).

Na nauochaxauapi Ñi Dios ỹauotec ra l’enaxat ñi Maye: Jehová. Ra huo’o ca ‘eetexa ra anauochaxaua qalaxaye huanna ra nasaxauec ca arenaxat nache ¿Isheto’ ra ỹataqta ‘eesa ra anauochaxaua? Sa ishet ra am ỹauotec. Nataqa’en ra huo’o qanauochaxaua nache ñasaxasoxouec ra l’enaxat qataq seuelecaq ca maye. Ỹoqo’oye na nauochaxauapi Ñi Dios nache rogoxona ra l’enaxat qataq ia’axatt cam ‘eetapeguec ñi maye. Cha’aye Ñi Jehová huotaique ra nache shenactec re’era (Mateo 6:9; Romanos 10:13, 14).

‘Ena’am so Jesús, na nauochaxauapi Ñi Dios rapaxaguenataxanec cam naigui ra l’onataxanaxac Ñi Dios. Ra l’onataxanaxac Ñi Dios nache ra qome ra ỹo’ot ra ‘enauac ana a’lhua ca mataqa’. Nam nauochaxauapi Ñi Dios ia’axattac re’era ra no’on n’axaỹaxac l’onataxanaxac Ñi Dios (Mateo 24:14).

Na Testigopi de Jehová ỹataqta huotaique ra nauochaxaua Ñi Dios. Na mayepi ỹauotec aye la Biblia qataq ỹauotec ca lỹa. Taqa’en rogoxona qataq ỹauotec ra l’enaxat Ñi Dios, qataq rapaxaguenataxanec ca naigui ra l’onataxanaxac Ñi Dios. Na Testigopi de Jehová re’era l’amqajnataxanaxac ỹataqta ỹaỹamaxareta Ñi Dios cha’aye ỹataqta ỹo’ot re’era ‘eetapeguec Ñi Jehová.