ʼEnauac na shiỹaxauapi ishet ra lcaʼagui ra ỹioʼoxoren ñi Jehová qoʼ so Satanás qataq na demoniopi. Saq ishet ra ỹioʼoxoren soua dos. ¡Qaq ra avioʼoxoren ñi Jehová qomiʼ ỹataqta ishet ra ỹajnaxanaxaic!

So ñapaxaguenaqtexa, na demoniopi ncopita ra saralemaqtaxan qataq ra ỹayetalec na shiỹaxauapi. Ñi Jehová sa ishet ra nache ʼeetec. Ñi maye ỹauotec nam shiỹaxauapi nache ʼenaʼam ca ntaʼa ra ỹauoteque ca llalqaʼ. Ñi maye ỹanem ra “ʼenauac na ỹaỹamaqchiguiñi qataq nalochiguiñi” (Santiago 1:17). Ñi Jehová ỹanem ra noʼon na shiỹaxauapi, huoʼo so ỹan coʼollaxa iuetapec, qalaxaye ỹoʼot raʼa (Efesios 2:4-7).

Acueinnate coʼolloxochiye so lʼonataxanaxac so Jesús so huetaña ana aʼlhua, so llalec ñi Dios. So maye nataren na ralolaxaicpi, nache huoʼo so shiỹaxaua ỹauotaʼa ra retaqaʼ qataq nauachiguiñe ỹauotaʼa so sanauaañe. Nataren so nchega lʼoc qataq so qaica ca lchel. Taqaʼen ỹorauec so demoniopi nache nataren ʼenauac na nalolaxa. Ñi Dios ỹanem ra ʼenec so Jesús nache so maye ncaʼalaxateec na leuaxaicpi. (Mateo 9:32-35; 15:30, 31; Lucas 7:11-15).

Ñi Dios sa ishet ra ratenataxan, Ñi maye saxaỹet qomiʼ ỹaqtaxanem ye ʼeesa. Sa ishet ra qomiʼ ỹayen (Números 23:19).

Nache ʼenaʼam ca lotaxañe ra noxona ca palachiyexa, ỹaguec na shiỹaxauapi huoʼo na icoʼ nache ʼenaʼam so lotaxañe ra noxona na maye, nache nagui qalota na shiỹaxauapi ỹamaqten ra huoʼo na sa ishet ra ʼeesa. Taqaʼen ñiỹa na leuaxaicpi qataq na demoniopi. Ñitexa na piʼoxonaqpi qataq ñiỹa ra qairan ñiỹa camachaqca. Chaʼaye qalota na shiỹaxauapi ỹapaxaguenec ñi lỹa na ỹamaxateetac ra latenataxanaxac so Satanás. Qalaxaye na lʼonataxanaxanec ñi Dios sanashenguet na qauem.

Ñi Jehová ỹaguec na lʼañaxac napacalec so Satanás. Nache ʼam ra auonataxanot ñi Jehová, ʼam ntelaʼa (Santiago 4:7). Na piʼoxonaqpi saq ishet ra ʼam naaqchet. Saloqnaxana, ye Nigeria huoʼo soua tres piʼoxonaq conaxanaxaicpi ỹaguec na lapiishic nache soua maye huotaique ra qairan so ntestigo ñi Jehová, chaʼaye so maye sanashen ra jec ye peulo chaʼaye qaỹooteguec qalaq so maye. Qalaxaye soua piʼoxonaq conaxanaxaica saq ishet ra iran so maye, nache huoʼo so ʼonolec piʼoxonaq ỹaguec ra l-lỹaxa, nqoʼona so testigo nache so piʼoxonaq nachoxoronot so maye.

Na demoniopi ra ʼam saỹaxanapec, ʼam aushet ra anasaxauec so lʼenaxat ñi qadataxalaʼ Jehová, nache ñi maye ishet ra ʼam ntelaʼa (Salmo 91:14, 15). Qalaxaye ra qomiʼ sauotaique ca ltelaxat ñi Dios ʼam iuen ra sa ishet ra auacona ca qauem na nʼonataguecpi na piʼoxonaqpi, conaxanaxaicpi, qoʼ espiritismo camachaqca qauem. Na lʼonataxanaxanecpi ñi Dios coʼolloxochiye ye Éfeso ỹoʼot naʼa. Laponat ʼenauac na napaxagueetega na nmejna qataq nerepiolec qauem, nache ỹavitgaxat ʼenauac  camachaqca napaxaguenataxanaxac qauem (Hechos 19:19, 20). Nagui na lʼonataxanaxanecpi ñi Dios nache ỹoʼot ra nqatec ʼenauac na nʼonataguecpi qauem. Ra iyaxaic ra netoʼot na tonolec ra ỹatañe na nqolac qoʼ nhuaxagashec na huetaigui na nataʼ, camachaqca ỹalectaigui na nʼonataguec qauem sa ishet ra soʼotaq.

ʼAm ra auotaique ʼavioʼoxoren ñi Dios, sa ishet ra chochaq aualat saq ʼeesa nʼamaqtenaxanaxac qataq  na qauem nʼonataguecpi. ʼAm anapaxaguena ca ỹataqta ʼeesa nʼamaqtenaxanaxac. Aye la Biblia qomiʼ ỹachaxana négueʼt ca naigui naʼa:

So Satanás qataq na demoniopi huoʼo lʼonataxanaxanecpi huetaña ana aʼlhua. Na mayepi huoʼo na qauem nʼonataguec qataq rapaxaguenataxanaxac ỹataqta sa ishet ra ʼeesa. Qalaxaye ñi Jehová taqaʼen huoʼo na lʼonataxanaxanecpi. Na mayepi qaỹamataʼac na testigopi de Jehová (Isaías 43:10). Huetaña ʼenauac ana aʼlhua huoʼo na siete millones na Testigopi. ʼEnauac na mayepi nañaxatac ra ỹoʼot na ʼonaxaic qataq ra ỹapaxaguen na ỹottaʼaʼt na shiỹaxauapi na ỹataqta ʼeesa. Qalota ra qoỹoctegue na naña na mayepi qalaxaye ishet ra auolotaʼa ra huetaʼa na Laponaxaqui, na mayepi ỹataqta huoʼo na ntonaxac chaʼaye aualectauo taqaʼen.

Ra huotaique na mayepi ra itauan ñi lỹa yaqto ỹioʼoxoren ñi Dios. Na mayepi ʼam ỹapaxaguenec ana la Biblia ye armaʼ, qataq ʼam ỹapaxaguenec na ỹataqta ʼeesa nʼamaqtenaxanaxac. Na mayepi sa ishet ra ausheeten ra ʼam ỹapaxaguen. Nam testigopi ntotaguec ra huoʼo ñi ỹapaxaguenec na ỹataqta ʼeesa chaʼaye ỹauotec nam shiỹaxauapi qataq ñi Jehová.