¿Ỹataqtaʼeesa ra huoʼo na lquiʼi na leuaxaicpi?
Ra huoʼo ñi ileu, ¿nache ʼeesa ra huoʼo cam inoxonec lquiʼi, nqoʼona ca netaña na lquiʼi na leuaxaicpi? Sa ishet. ¿Cam ʼeetecoʼ ra ishet ra saỹatenaq reʼera? Chaʼaye huetalec aye la Biblia. Aye nere la Biblia iaʼaxat yem ʼeesa chaʼaye chigoqoʼot ñi Dios, lʼenaxat Jehová. Ñi maye lʼonatac coʼollaxa na shiỹaxauapi, ỹoqoʼoye taqaʼen ỹaỹaten ra taigue ra huoʼo ñi ileu (Salmo 83:18, Nuevo Mundo [NM]; 2 Timoteo 3:16).
So Adán qaỹachigoxotaigui ana aʼlhua qataq ỹiʼiguelaxaigui ana aʼlhua.
Aye la Biblia iaʼaxat ñi Dios ra lʼonatac so Adán, so huaʼauchiguiñe shiỹaxaua, “ỹachigoxotaigui ana ʼalhua” (Génesis 2:7). Ñi Dios ỹanalec so aʼlhua ỹataqta ʼonaxaic, lʼenaxat Edén. So Adán ra ỹalaxaguet so lamaxasoxonaxac ñi Jehová, nache sa ishet ra ileu. Qalaq so Adán ỹataqta saq iqochaʼa ra lamaxasoxonaxac ñi Dios, nache saỹalaxaguet nache Ñi maye ʼenapec: “ʼAviʼiguelaxaigui ana ʼalhua mayi ʼauachigaqaigui coʼollaq ʼam qaiʼoxon, chaʼayi ʼam ʼalhua, qaq nam ʼalhua ʼapactoigui” (Génesis 3:19).
¿Négueʼt cam naigui naʼa? Arcueinnate neʼena: ¿Huaʼague ca netaʼague so Adán coʼolloxoche saxanaxa qaiʼoxon? Sa ishet ra huoʼo ca netaʼague. Sa ishet ra lquiʼi ca noxotolec saxanaxa ñiguiñe chochaq sa ishet ra huoʼo. Ỹoqoʼoye coʼolloxoche Ñi Jehová ra ʼenapega so Adán: “ʼAviʼiguelaxaigui ana ʼalhua”, nache lʼaqtac ra chochaq ileu. So Adán qaica ca chigaqaigui lquiʼi nache huoʼo ca taigue. Nache so Adán ileu, imeuo ra nachaalataxac. Ỹoqoʼoye ra nleuaxa nache naigui ra saq huoʼo ra chaalataxac.
Qalaxaye, ¿cam ʼeetecoʼ na lataxac nam laỹipi leuaxaicpi? ¿Taqaʼen imeuo ra nachaalataxac? Aye la Biblia iaʼaxat:
-
“ʼEnauac [shiỹaxauapi qataq shiguiỹacpi] da ʼeetaʼaʼt ca qotaỹaʼa, qaỹachigoqtoigui coʼollaxa na ʼalhua, qaq nachi qaỹiʼiguelaqtoigui qome na ʼalhua” (Eclesiastés 3:20).
-
“Nam leuaxaicpi, [...] qaica ca ỹaỹaten” (Eclesiastés 9:5).
-
“Imeuo da lsoxoyic, lquiỹaxanaqtaic qataq nam ʼeetapeguecpi” (Eclesiastés 9:6).
-
“Chaʼayi ʼañim huachiqui mayi ʼaỹaʼa, huaña da qaica ca ʼauʼot qataq sa ishit da ʼauennataxaatac, qataq huaña da qaica ca nauattonaxanaxac qataq ca naỹajnec” (Eclesiastés 9:10).
-
“[Ca shiỹaxaua] da ivita da ileu, qalaq ipactoigui na ʼalhua, nachi queʼeca naʼaʼq huetoigui da imeuo nam huotaique da iʼotpi” (Salmo 146:4).
Nachaqnata na ncaaltauecpi ishet ra ỹoʼot ca nʼonatac.
¿Ỹapac ra sa ishet ra auamaqten na huetalec ana la Biblia? Ra sa ishet ra auamaqten, nache analoqten naʼa: Qalota na ỹalleppi roʼonataxan chaʼaye huotaique iquiaxan aca lhua qataq na llalacpi. Ra ileu ca ỹale nache aca lhua qataq na llalacpi nache huoʼo ra nquejnaxac, chaʼaye qaica ca aloq, qaca ca ʼalom. Huoʼo ra na nqotaxauapi so ỹale mashe ileu ỹahuoʼo ra lachoxoyec aca lhua qataq na llalacpi. Nagui qaltaq analoqten neʼena: “Ra ʼeesa ra huoʼo ca lquiʼi na leuaxaicpi, ¿táʼainec qoneʼ ra sa ishet iquiaxan na llalacpi? ¿Táʼainec ra sa ishet ra iuejlec na llalacpi?”. Chaʼaye so ỹale imeuo ra nachaalataxac, sa ishet ra huoʼo ca ỹoʼot. Aye la Biblia ỹataqta ʼeesa ra huoʼo ye iaʼaxat (Salmo 6:5).
Na leuaxaicpi sa ishet ra itauan na qouaxaicpi qataq sa ishet ra iuejlec ca lauoʼlʼec.
¿Naigui reʼera na leuaxaicpi ra sa ishet ra qancaʼalaxateec qome? Sa ishet ra naigui reʼera. Qome maiche ʼam qaỹactaxanem négueʼt ca naigui ra qancaʼalaxateec na leuaxaicpi. Qalaxaye reʼera qaỹaxatac naigui na leuaxaicpi ra saỹaỹaten ra huoʼo na auʼottaq. Sa ishet ra ʼam ilaʼa, sa ishet ra ʼam huaqtega, sa ishet ra ʼam itaxaỹaxan. Ỹoqoʼoye sa ishet ra añetega ca mashe ileu. Na mayepi sa ishet ra ʼam itauan qataq sa ishet ra ʼam ỹioʼiquetaq (Eclesiastés 9:4).
