So Dauda, maye lañocoʼ ye aʼlhua lʼenaxat Sierra Leona, icuennate: “So aỹem naʼasolec nache imaʼ ye peulolec naʼague ye lnorte. Huoʼo so naʼaq huoʼo so nqotaxac so iuoʼlʼecpi qataq so sa ishet iuoʼlʼecpi. Chaʼaye qancotatapigui cam lalamaxat yem aʼlhua. Nache qaỹaxana so piʼoxonaq yaqto iaʼaxat chaxan négueʼt ca yoqta lalamaxat ye aʼlhua qancotatapigui. So piʼoxonaq ỹamiʼ aso tannaxai so shiỹaxaua nache napoxonaxanaxaña so naqanec lapagaxaic. Nache so shiỹaxaua ỹataqta iviloxol qataq nchilchaxañe. Imeten aso tannaxai nache ỹalac chaʼaye huoʼo so nauanaqtec ʼeetaʼ: —¡Selotaʼa ra shiỹaxaua ỹataqta ỹaxaiqui nache anacta! Ra maye logoraic qataq ỹaxaiqui, ỹapaxac na laueʼ qataq lapagaxaica na loxo qataq qollemta ra lqueuoxoc.

”¡Ỹataqta iaʼaxatac ram lashiguiaxac so ỹapi! Qataq so shiỹaxaua naʼalaxañe, nache ʼeetaʼ: —¡Ra aỹem saqauamaqchiñi ra saxattaq nache, qamichiñi ram huetalec ana tannaxai!— ¡Qaq qaica cam nasheeta ra imeten seʼeso! So piʼoxonaq nmanaqchet so shiỹaxaua icorelec so nataʼ lalegue ana ʼepac laue qataq ʼetaxat huetangui aso ʼaarai.

”So ỹapi ỹaqtaxanaxan so shiỹaxaua nasoqtaʼa aso tannaxai, ra maiche qaralamaxat ye aʼlhua. ʼEnapega aso qomeʼ ra maiche ranaxalec ye aʼlhua, nache ʼam auimaqta. Qaq so sa ishet iuoʼlʼecpi ỹalaxaguet ra lʼaqtac so ỹapi. Nache ime so nqotaxac”.

 Huoʼo na ñichiguiñalo aʼlhuapi raʼa África qaỹaqtega saxaỹet reʼera qaỹaxatac. Taqaʼen ỹataqta qalota nam aʼlhuapi netaña na shiỹaxauapi ỹamaqten ra huoʼo ñi ileu nache nqoʼona ye naña na lquiʼi na leuaxaicpi. Taqaʼen qaỹaxatac na lquiʼi na leuaxaicpi imetetac nam shiỹaxauapi nam naña na aʼlhua nache ishet ra itauan qoʼ naaqchet ra nachaalataxac. Qalaxaye, ¿ỹataqta ʼeesa reʼera qaỹamaqteetaq? ¿Ỹataqta ʼeesa na leuaxaicpi ra ncaaltauec? Qaq ra sa ishet ra ʼeesa nache, ¿négueʼt na mayepi iʼenaxat na leuaxaicpi? Seuenac qomiʼ ra saỹatenac cam ʼeesa ra qainataxatapeguelec, chaʼaye naigui ra qanachaalataxac qoʼ qarleuaxa.