Na demoniopi huotaique na shiỹaxauapi ra saỹalaxaguet ñi Dios
Huoʼo na shiỹaxauapi ỹamaqten na leuaxaicpi ishet ra ilaʼa, reʼera sa ishet ra ʼeesa.
Qalaxaye, ¿táenʼco ra nañaxatac so Diablo taq na demoniopi ra ỹayeʼetac na shiỹaxauapi? Chaʼaye na mayepi huotaique na shiỹaxauapi saỹalaxaguet ñi Dios. Huotaique ra qaỹiʼoxoren so maye, sa ishet Ñi Dios. So maye huotaique ra samatenac na layenaxac qataq soʼotaq na saỹaỹamaxaren Ñi Dios. Qalota na shiỹaxauapi huoʼo na qauem nʼonataxac chaʼaye saỹaỹaten cam lataxac na leuaxaicpi.
Ra ileu ñe nauotaxat nache quiʼaq saxaỹet raʼa chaʼaye nache ʼeetec ra lataxac ra huoʼo ñi qaica, nache noỹiitac ca shiỹaxaua ỹaguec ra lquiʼic chaʼaye qaica ñem lauotaxat. Coʼollaxa so ileu so nauochaxaua Lázaro, “nache so Jesús noỹiitac” (Juan 11:35).
Qalota na shiỹaxauapi ỹottaʼaʼt ra nʼonataguec ra huoʼo ñi ileu. Huoʼo na ʼonataguec na ỹaỹamaxareta Ñi Dios. Qalaxaye, taqaʼen huoʼo na ʼonataguec ra huoʼo ñi ileu nache huoʼo ra lcaʼalaxa qoʼ huoʼo na lquiʼi na leuaxaicpi. Ra huoʼo ñi ileu nache qalota na shiỹaxauapi ỹachaxanapec ra recopchetaq qoʼ nalaqtapiguiñe, ỹeraxatoigui na lqoỹaranaxat qataq ỹaʼateua na laỹil so nleuaxaqui na nanguishec lauoxo. Chaʼaye huoʼo na ñiʼitega ra ralemata ñe lquiʼi na leuaxaic. Ỹoqoʼoye qomiʼ nagui saỹatenac nam qaỹaxatac nache ra huoʼo ñi ileu “qaica ca ỹaỹaten” qataq na ỹamaqteetac naʼa qaỹaxatac ratenataxana so Satanás (Eclesiastés 9:5).
Taqaʼen huoʼo na shiỹaxauapi ỹamaqten ra ishet qaitauan na leuaxaicpi, qalaxaye reʼera sa ishet ra ʼeesa.
Huoʼo na lỹa na nʼonataguec qataq ỹamaqteetac na shiỹaxauapi ra huoʼo ñi ileu nache ñe leuaxaic ỹauoteque ra qaitauan qaq na ncaaltauecpi ishet ra qanachaxana ra sa ishet ra nmanaqchet na lquiʼi na leuaxaicpi. Taqaʼen huoʼo na shiỹaxauapi ỹamaqten ra huoʼo ñi ileu nache qanatameteguelec saxaỹet chaʼaye qaỹahuotaique so lquiʼi som leuaxaic ivirasheguem ñi Dios.
Neʼena qaỹaxatac sa ishet ra ʼeesa chaʼaye ratenataxana so Satanás. ¿Ỹaỹamaxareta Ñi Jehová ra soʼotaq neʼena ʼonataguecpi? ¡Sa ishet ra nache ʼeetec ra qarataxac! (2 Corintios 6:14-18).
Na lʼonataxanaxanecpi ñi Dios ỹataqta sa ishet ra ỹoʼot na lataxac ca ỹaỹamaxaren so Satanás. Ỹoqoʼoye na mayepi itauan qataq ỹañaqchet na ncaaltauecpi. Taqaʼen na mayepi ỹaỹaten, chaqrata Ñi Jehová ishet itauan na leuaxaicpi (Job 14:14, 15).
Na espiritismo saỹaỹamaxaren Ñi Dios
¿Négueʼt ca naigui na espiritismo? Na espiritismo naigui ra qanaʼaqtaxaneʼ na demoniopi. Na mayepi taqaʼen retaqtapoigui na piʼoxonaqpi. Na conaxanaxaic na piʼoxonaq, na iyaqan, sottaxaicpi ỹalectaigui ana rueda, qataq iaʼaxat na leuaxaicpi, taqaʼen naigui espiritismo.
Na qauem nʼonataguec saỹaỹamaxaren Ñi Dios. Chaʼaye ñi maye huotaique ra aỹioʼoxoren qataq ʼauʼonataxanot (Mateo 4:10).
Ñi Dios saỹaỹamaxaren reʼera, ỹoqoʼoye ra lʼaqtac Ñi maye ʼenapec: “Sa ishit da qanapaxaguiñiỹa da ʼicoʼ ishit da qailauoigui ca nỹa, qataq da qaiʼaxataʼaguet cam saq chaʼa, qataq sa ishit da qauʼochi da naconaxanaxac; qataq da naueguelaʼt ca nhuennataxac, qataq sa ʼaunat ca ilauʼa ca ʼonataxac, qataq nam imaʼaguet na saq chaʼapi, qataq na ishit da nauegueuo na lquiʼipi na leuaxaicpi. Chaʼayi ñi qadataxalaʼ ỹataqta sa ishiteguet cam iʼottac neʼenapi” (Deuteronomio 18:10-12).
¿Táenʼco Ñi Jehová qomiʼ ỹanem reʼera saq chochi reto lamaxasoxonaxac?
Chaʼaye Ñi Jehová ỹataqta ỹauoteque qomiʼ. Ñi maye ỹaỹaten ca ʼenauac na shiỹaxauapi ra ltaxaỹaxaua na demoniopi, nache qome huoʼo ra ltaraic nquejnaxac na mayepi.
Huoʼo aso ʼalo Brasil lashe lʼenaxat Nilda. Aso maye coʼollaxa ltaxaỹaxaua na demoniopi. So demoniopi ỹahuotaique ra qaica ca naigui ra nachaalataxac aso maye. Aso Nilda ʼenapec: “Na demoniopi aỹem imaigui maiche ca ʼeetec aỹem. Qataq aỹem huoʼo ra ñitouetaac ra huoʼo na soʼotaq, huoʼo ra sañetouen qoʼ sa saỹaten ra soʼotaq. Na demoniopi aỹem roʼonataxatapigui ra ñachaalataxac, nache ivita ra aỹem qaỹauegueua añe qanataren ra huoʼo na qauem lqaic chaʼaye aỹem iloquen na demoniopi. Nache iviraʼa ra ñeñomtapigui na nataʼ qataq huoʼo ra ñiñomtaq qataq sasheraxataq. Nache reʼera qoỹoctegue ra ñiquejnaxac”.
Na shiỹaxauapi ra ỹoʼot na espiritismo nache huoʼo ra nquejnaxac. Na mayepi ishet ra ỹaqattec so lmaʼ, saq ishet ra maiche ỹoʼot ra lataxac, taqaʼen ishet imeuo ra nachaalataxac.
Nagui ỹaguec ra nachiquiaxac ʼenaq aso maye, chaʼaye Ñi Jehová qataq nam ntestigo ñi maye, itauan ra napaxaguena ana la Biblia. Nache so Nilda machiguiñe nagui ra nachaalataxac chaʼaye na demoniopi sa ishet ra caʼategue aso maye. Nache nagui quiʼita na nachaalataxac qataq qaica ca l-lliaxa. Nache ʼeetaʼ ra lʼaqtac: “Nagui qamiʼ shenapexa ra sa ishet ra qauaqoñia na qauem lʼonataxanaxac na demoniopi”.
