ʼEnauac na lamaxashec piguem lʼecpi lʼonatac Ñi Jehová, coʼollaxa soxoraicpi na mayepi. Nache huoʼo coʼollaxa so ʼonolec piguem lʼec ra yiloxoic qaỹamataʼac Satanás qoʼ Diablo. Som Satanás huotaique nam shiỹaxauapi ra qaỹiʼoxoren so maye, sa ishet ra qaỹiʼoxoren Ñi Dios. ʼAmeten négueʼt ca naigui raʼa:

Coʼollaxa so Edén nache ỹaguec ana nanguishecpi ʼepaq nache amma na ala. Ñi Dios ʼeetaʼ so Adán qataq aso lhua Eva ishet ra maiche ca cheq na ỹottaʼaʼt ʼepaq ala. Qalaq huoʼo aso ʼonole nanguishe huoʼo na ala saq ishet ra cheq. Chaʼaye ra cheq aso ʼepaq ala nache ileu (Génesis 2:9, 16, 17).

Huoʼo so naʼaq ʼonole aso Eva, nache huoʼo so araxanac itaxaỹoʼot. Qalaq sa ishet ra araxanac so rtaqtac, so Diablo nache ỹogona so araxanac. So maye ʼenapega aso Eva ra coʼolleq añi ʼepaq ala ishet ra ʼam ỹajnaxanaxai nache qonaʼam Ñi Dios. Taqaʼen ʼenapecoʼ aso maye sa ishet ra ileu. Qalaq so lʼaqtaxanaxac so Satanás sa ishet ra ʼeesa. Aso Eva ỹalaxaguet so Diablo, nache aso maye cheq aso ʼepaq ala, taqaʼen ỹanem so Adán (Génesis 3:1-6).

Naʼa qaỹaxatac ỹataqta ʼeesa nache ishet ra saỹatenaq so Diablo ra yiloxoic qataq tenataxanaxaic. Taq ʼenapega aso Eva ra sa ishet ra ileu ra saỹalaxaguet Ñi Dios. Nache som lʼaqtac so Satanás sa ishet ra ʼeesa. Qalaq aso Eva qataq so Adán taqaʼen ileu soo maye. So Diablo sa ishet ra ileu coʼolloxa qalaq iviraʼa qome ra ileu chaʼaye huoʼo ra lasouaxashet. Qalaq nagui  ñaq huoʼo so maye isomaxanacheqtac, na shiỹaxauapi. So maye ñaq huoʼo ra latenataxanaxac, nache huotaique nam shiỹaxauapi saỹalaxaguet ñi Dios (Juan 8:44).

Coʼollaxa huoʼo so piguem lʼecpi ỹacona ra qauem. So mayepi ỹalletaña na aʼlhua nache imeteetaq ra ʼonaxaale na ʼalpi, nache huotaique ra hueguet na ʼalpi. Ỹoqoʼoye taỹaña ana aʼlhua nache ñigui na ỹallippi. Taq ỹacona na ʼalpi ra lhua. Reʼera saỹaỹamaxaren Ñi Dios (Génesis 6:1, 2; Judas 6).

Coʼollaxa ỹacona na qauem so piguem lʼecpi nache ỹoʼot ra ỹaguec na nquejnaxac na shiỹaxauapi. Som ʼalpi lhua so piguem lʼecpi huoʼo nam llalec qalaq sa ishet ra ʼenaʼam na llalacpi na shiỹaxauapi. So mayepi nquiqtaxashiguem coʼollaxa nache logoraic taq huoʼo ra layeloxo taq ncopita ra ỹalletaa na nquejnaxac na shiỹaxauapi. Coʼollaxa na aʼlhua nlaxalec na qauem nache ñi Jehová ʼeetaʼ ra lʼaqtac, ñilaxajñe na yiloxoicpi sauotaʼa ca auot ltaraic. Qalaq huoʼo soua shiỹaxaua sa ishet ra ileu lʼenaxat Noé taq so lauo (Génesis 6:4, 11; 7:23).

Qalaq so namaxashecpi qauemaic ỹiguelaxa ye huetaña piguem; sa ishet ra ileu. Qaỹahuoʼo so nhuaxanaguec. Nache saqaỹashenem ra ỹiguelaxa ye netaña Ñi Dios taq som piguem lʼecpi soxoraicpi. Ñi Dios saỹashenem so mayepi ra ñigui na shiỹaxauapi. Nache qome ra nviʼ ca paʼateec naʼaq qom nmit ʼenauacna Ñi Jehová (Judas 6).

Coʼollaxa so viʼi 1914 huoʼo so nloquiaxac ltaraic coʼollaxa ye piguem. Ye nerec Apocalipsis iaʼaxat coʼollaxa som qaỹaxatac: “Ime, nachi huoʼo so ltaʼadaic loquiaxac, huoʼot na piguem, chaʼayi so lataxalaʼ na namaxashic piguem lʼecpi, lʼenaxat Miguel [so Jesucristo], qataq ʼenauac so nallippi [piguem l’ec soxoraic], qailoctagueʼ so shiguiỹac mayi ʼicoʼ daʼailʼoc [Diablo]. Qaq seʼeso shiguiỹac qataq na nallippi [piguem lʼec yiloxoicpi] ỹataqta deloctac, qalaxayi somayi sa ishit da dauegaxan. Nachi somayi qataq so nallippi qaica ca lmaʼ na piguem. Qaq ʼeda da ʼeetec coʼollaq qaỹamaqhuec seʼeso ʼicoʼ daʼailʼoc. Qaq somayi nachiso so nʼadaxanaq mayi lʼatchiguiñi da datenataxan, lʼenaxat Satanás, som shiỹaxaua mayi lmaʼna. Qaq somayi qataq ʼenauac so nallippi qaiʼodalec ana ʼalhua”.

¿Ca ʼeetec coʼollaxa qome raʼa? Nam qaỹaxatac ʼeetaʼ: “Qaq ỹoqoʼoyi ʼam piguem, qataq ʼenauac na ʼam netalec, ỹataqta qauamaichiguiñi qome”. Soo piguem lʼecpi soxoraic machiguiñe chaʼaye so Diablo qataq so laỹipi lamaxashecpi yiloxoic sa ishetma ra iguelaxa ye piguem. ¿Machiguiñe na shiỹaxauapi qome? Aye la Biblia ʼeetaʼ: “Qalaxayi ỹataqta choxodaicpiolec qome na netalec ana ʼalhua qataq asom auaxai. Chaʼayi so shiỹaxaua lmaʼna ỹataqta dalemata. Qaq somayi qamiʼ huenoteeguesopa, chaʼayi somayi ỹaỹateetaʼa da mashi sa qaỹapeque ca laloqoʼ” (Apocalipsis 12:7-9, 12).

So Diablo taq so piguem lʼecpi yiloxoic isomaxanaqchet taq ỹoʼot na nquejnaxac na shiỹaxauapi. Na piguem lʼecpi yiloxoic qaỹamataʼac demoniopi. Na mayepi npaʼaguenaxauapi ñi Dios. ʼEnauac na demoniopi yiloxoicpi.