ÑI DIOS mashe ỹaqataxanapec ra Nataxala’ so Mesías na ’enauac na shiỹaxauapi. Ñi maye ỹaỹateetac som nataxala’ iuen na shiỹaxauapi, qo’oye lca’ateua so maye. ¿Ca ’eetec ra lataxac se’eso nataxala’? ¿Nache ’ena’am na qaỹamata’ac militar? ¿Qo’ na político? ¿Qo’ ’eeta’am na shiỹaxaua ỹajnaxanaxaic? Ana la Biblia ’enapec so Mesías nacheso som Jesucristo, so n’aqtaxanaxanec sa ishet ra ’eeta’am na laỹi’ l’aqtaxanaxanecpi (Mateo 23:10).

Ñi Dios nsallaxaune’ so Jesús ñiguiñe nalochiguiñi taq qui’itta so maye. Taq so Jesús n’añaxateguet ’enauac som ’eetapeguec so Satanás ra nshepaxanaxaqchet ra lataxac so maye. ’Enauac so ỹo’otaq so maye taq ra ltaxaỹaxac, so Jesús ỹachaxanapec ra i’naqchichigui ra l’añaxac, ỹaỹamaqchiguiñisat, laỹajnaxanaxac taq ra lauotaxanaqtaic ñi Dios. Semetenac ca ’eetec ra ishet ra ñapaxaguenaxa na lataxac so maye.

So maye rogoxona ra l’añaxac ñi Dios yaqto itauan ca lỹa. Sanañaxañe so Jesús ra itauan na shiỹaxauapi, ra ro’ogoxona na l’añaxac, ra ỹanem ra iuetaque na shiỹaxauapi. Huo’o so na’aq ’enac: «Aỹim ỹataqta huo’o da ichoxonnataxanaxa ne’ena shiỹaxauapi. Cha’ayi [...] namayipi mashi qaica ca aloq» (Marcos 8:2). Nache so Jesús iquiaxan so qalota shiỹaxauapi naxaỹaxatega ra lapaxaguenataxanaxac.

So Jesús taqa’en coleetapeguelec na ỹotta’a’t a’lhua taq rapaxaguenataxatac «qataq natadeetac ’enauac na ỹotta’a’t lalolaxaguesat na shiỹaxauapi» (Mateo 4:23). Nagui saỹatenaqtac ra maye, so shiỹaxauapi co’ollaq qaicattegue so maye taq qaihuotaique ra qaipoteua cha’aye «somayi da natadeetac ’enauac na shiỹaxauapi, qalaq idolec da l’añaxac» (Lucas 6:19). So Jesús «sa ishit da anac da yaqto’ qanayiutapegue’. Chaqdata da namayi anac da yaqto’ huapec, qataq ỹan da nachaalataxac, da ’eeta’am naq’en aca lashiue da yaqto’ qalota na qanca’alaxateec» (Mateo 20:28). a ¿Lqata na nta’a shiỹaxauapi ra ỹachaxanapec ra lataxac ’ena’am so maye?

Inaqchichigui ra ỹaỹamaqchiguiñisat lataxac ñi Dios. So Jesús ỹo’ot na lqataxac ñi Dios, taq ipacchichigui naq’en ra lamaxasoxonaxac ñi maye. Nache ipacchigui som ia’axataguet ana la Biblia, nache ico’ l’aqtac ra ’enapec so maye: «Qaq aỹim ỹataqta saỹamaxadeeta da so’ot cam qonetapeguec, ’am ñatamnaxala’; ¡Qaq ỹataqta huetaiguilo ñaq’en naua ’adapaxaguenataxanaxaco añi iquiyaqte!» (Salmo 40:8). So Jesús ’eeta’a’t ỹauota’a na shiỹaxauapi —na sallaxanecpi taq choxorac, nam ỹale taq ’alo, ñaqpiolec taq na mashe ỹi— ichoxoren taq qaica ca napacalec taq sa ishet ra lca’atapigui na shiỹaxauapi nache ’ena’am ñi Dios. Huo’o so na’aq soua ndiscipulo ralemataỹa so nta’alpi cha’aye qairotacot so Jesús som ñaqpiolec, qaq so Jesús ’enapec: «Ña qauauaqaita’a na ñaqpiolec da aỹim nau’a, sa ishit da sa qanashiñiiguet, cha’ayi de’eda l’onataxanaxac ñi Dios nam huetaigui nachina na ’eeta’am namayipi» (Marcos 10:14).

So maye ỹachaxanapec ra laỹajnaxanaxac ñi Dios. So Jesús ỹaỹateetac ram lataxac ca shiỹaxaua. Qo’oye, «somayi maichi ỹaỹateetac na lhuennataxacpi na shiỹaxauapi» (Juan 2:25). Co’ollaq so npa’aguenaxauapi ỹamac so n’allipi ra qaicoñi so maye, so mayepi rauattonaxac nache ’enapec: «¡Ỹataqta sa ỹauango’ da huo’o ca ’eeta’am da ltaxaỹaxac de’eda shiỹaxaua!». ¿Ỹachigoxotague so Jesús ra laỹajnaxanaxac? So maye ’enapeco’: «Da ỹapaxaguenataxanaxac, damayi sa ishit da ỹalamaxat, damayi chigoqo’ot ñim aỹim namaq» (Juan 7:16, 46).

 Ỹachaxanapec ra lauotaxanaqtaic ñi Dios. So Jesús taqa’en ichoxoren na shiỹaxauapi. Huo’o so na’aq, so «shiỹaxaua nchiga na l’oc» nachoxorenot ’enac: «’Am ỹataxala’, da ’aushit, qaq no’on da ’auỹouec da ỹalolaxa». So maye choxonataxanaxaic «nachi so Jesús ipoteu’a somayi, nachi ’enapega, ’eeta’: Aja’, seshit. Nagui ’am qui’itta. Qaq co’ollaq nasaxauec de’eda l’aqtac, nachi so nalolaxa ca’ai na l’oc som sa no’on» (Lucas 5:12, 13; Marcos 1:41, 42). So Jesús ỹataqta huotaique nqat ra nquejnaxac so choxoraicqolec shiỹaxaua.

¿Icuennate so Jesús qomi’? ’Eeta’ ra l’aqtac: «Qauanaiua’a aỹim ’enauac da qoñiita mayi qanasamiitañi souaxat da qad’onataxanaxaqui qataq souaxat na qayi’aqui, nachi aỹim qami’ ñimataxanaxaadeec. Qaq qauacoñiiguet qome dam ỹachoxonaxala’ mayi qami’ sachilguete, qataq aỹim qanapaxaguiñiỹa, cha’ayi ỹataqta aỹim hua­laxauaic qataq da iquiyaqteỹaxac sa ishit da n’amqajnaxaic, nachi ishit qome da qauanachiỹa ca nmataxac da qanachaalataxaqui» (Mateo 11:28, 29).

So Jesús ’onolec so maye ra nta’a no’on. Qo’oye so maye qomi’ ỹaxanalo: «Aỹim qanapaxaguiñiỹa». ¿’Am aualaxaguet ra ’am ỹaxana so maye? Ra aualaxaguet nache ’am machiguiñe.