SO L’AQTAXANAXANECPI co’olloxoche ỹachaxanapec ra lpi’iỹaxac ñi Dios. I’amaqten na ’eetapeguec ñi maye, ra nachaalataxac so mayepi ndotec ra ỹataqta ỹo’ot re’era. ¿Négue’t so qaỹaxatta’aguet?

Nqarguenapec ñi Dios co’ollaxa so sanaxaỹaxana soua Adán taq Eva ye Edén, ỹaqataxanapec ra huo’o ca pigui na lqaic «so n’adaxanaq» —taq’en qaỹamata’ac «’ico’ da’ail’oc. Qaq somayi nachiso so n’adaxanaq mayi l’atchiguiñi da datenataxan, l’enaxat Satanás, som shiỹaxaua mayi lma’na»—, nache nlaxajñe qome’ so maye (Génesis 3:14, 15; Apocalipsis 12:9, 12). ¿Négue’t ca ishet ra ỹauota’a ipacchigui re’era?

Soua dos mil vi’iye lcopa’ague, ñi Jehová ỹaqataxanapec so l’aqtaxanaxanec Abrahán que’eca qaỹaxatta’aguet, ra ipacchigui ra chigoqchigui ca llalaqpi so maye: «Qaq ’enauac na ỹotta’a’t shiỹaxauapi mayi huetalec ana ’alhua huo’o da laỹamaxa, chigoqchigui camayipi, souaxat da aỹim ’aualaxalec» (Génesis 22:18).

So vi’i 1473, co’ollaxa saxanaxa na na’axa’te so Jesús, nache ñi Dios yoqta ia’axat ra qaỹaxataguet so Ñalacpi ỹauota’a so Moisés. So maye ỹaqtaxanem so llalacpi so Israel, maye llalacpi so Abrahán, ’eeta: «Qaq ñi qadataxala’ mayi qanatamnaxala’ai qome qami’ chigoqtoiguilo naq’en cam l’aqtaxanaxanec ’eeta’am aỹim, qaq camayi ỹataqta qaualaqaiguet qome» (Deuteronomio 18:15). Nache ’ena’am so Moisés, se’eso l’aqtaxanaxanec chigoqchigui ra chigaqaigui so llalacpi so Abrahán.

Se’eso l’aqtaxanaxanec, taq’en llalec so nta’a David, taq’en qome so maye nta’a. Ñi Dios ỹaqataxanapec so David: «Aỹim qome sanagui da ’ad’onataxanaxac ca ’oonolec na ’ai’alaqpi, nachi camayi sanagui da nta’a [...], nachi sanagui camayi da nachi ’eetai’ da nta’a» (2 Samuel  7:12, 13). Ñi Dios taq’en ia’axat ra huo’o qome ca chigaqaigui na llalacpi so David maye qaỹamata’ac «nta’a ñi mayi i’ot da nlagaxa» taq ’enapec so nta’a qome lta’araic ra l’onataxanaxac, machiguiñe taqa’en talec so nso’onaxaqui so David so maye tateec l’onataxanaxac sa ishet ra imeuo (Isaías 9:6, 7). Se’eso nta’a qome ỹi’iguelaxatem ra ỹaỹamaxajñe ra ỹo’ot ra machiguiñe qataq ra ỹaỹamaqchiguiñisat’enauacna. Qaq, ¿lagui ra nvi’ ra maye?

So ángel Gabriel ’enapeco’ ra l’aqtac se’eso n’aqtaxanaxanec Daniel: «Tashe maiche ’auaỹateetaq taq ’auaỹajnataxatac so huaña inoxonec se’eso n’aqtac ra qaỹaỹamaxajñe taq qanoxoosheguem ye Jerusalén ra nvi’ qome so Mesías nataxala’, huo’o soua siete semana taqa’en sesenta taq dos semana» (Daniel 9:25, NM). Co’olloxochiye soua 69 semana naigui ra siete vi’i na ’oonatac. Qanaloqtenapi ’enauac nache ivi’ 483 vi’iye, chigoqchiguiña so vi’i 455 co’ollaxa saxanaxa na na’axa’te so Jesús, nache ivita so vi’i 29. a

So Mesías ¿yoqta ivi’ so vi’i 29? Semetenac re’era.