ÑI DIOS mashe ia’aqtaxanema na l’onataxanaxanecpi ishet ra qaỹiguen ra lpi’iỹaxac. Ñi maye ’enapec: «Qanloiteec, cha’ayi so qami’ ipa’agueeta’pe shiỹaxaua lma’na coleetac, nmittaique ca loxonec, ’eeta’am ca quiyoc da desoqtac» (1 Pedro 5:8). ¿Ca ’eetec so Satanás ra ishet ra nasaxañe ra npi’iỹaxac?

Ishet ra io’onataxangui ca lỹa shiỹaxaua, taqa’en ỹauota’a ca qarauotaxat, ra ’am ’enaxa ra axañe ra anapaxaguena ana la Biblia. Ỹoqo’oye so Jesús ’enapec: «Maichi npa’agueetapegue’ ca maichi lalamaxat lauo’ l’ec» (Mateo 10:36). Nam arhuo’l’ecpi taq anauochaxa’u ico’ ỹaỹamaqchiguiñe ra l’aqtac, qaq sa ỹaỹaten négue’t ca naigui na L’aqtac ñi Dios ra huetaigui na ’onaxai ’eesa. Peta’a na mayepi ishet ra ñi’i ra qoinaxa cam ’eetec ca l’aqtac ca lỹa. Qalaq ana la Biblia huetalec: «Ñi qadataxala’ nachi ’eetai’ da aỹim hueta’aguet, ỹoqo’oyi sa ishit da shi’itac. Qaq ỹoqo’oyi sa ishit da huo’o ca aỹim i’otec ca shiỹaxaua» (Salmo 118:6). Ra huo’o cam ỹalat ra napaxagueetega ana la Biblia cha’aye nmeten ca lỹa, ¿Ñi Dios ncopita re’era? Sa ishet. Qaq ỹoqo’oye, ca ỹachaxan ra lpi’iỹaxac ’eesa, ñi Dios itauan. «Qomi’ sa ishit qome da nachiqomi’ da shi’iguelaxasoq qataq da ’ico’ qomi’ qanlaxajyiñi. Chaqdato’ da qomi’ ỹataqta huo’o da qadpi’iỹaxac, yaqto’ ishit da qaỹaỹamaxat da qanachaalataxac» (Hebreos 10:39).

Antoueta’ac se’eso qaỹaxattac so Dumas. So cheta’ague, aso lhua i’eetac ra lpi’iỹaxac so maye, qaq co’ollaq aso maye taqa’en ỹahuotaique ra ỹaỹaten ana la Biblia. Nache ’ena’am, ra queta ra au’o’ot ye no’on, ishet na anauochaxa’u taq nam auauotecpi ishet ra ’am i’enaxat. Qalota na mashi ye, nam nhuo’l’ecpi «namayipi da huo’otaq saxanaxa da i’amaqten da n’aqtac, nachi ishit da da’amqajnataxan, souaxat da ỹauaachigui da no’on ’an’onataxac. Nachi nai’ctaxa da sa ishit da ’au’aqtaxanem camayi, qalaxayi souaxat da ila’a da no’on ’adataxac da ’aualaxaguet ñi Dios» (1 Pedro 3:1, 2).

So Satanás nmitaique ra lataxac na shiỹaxauapi ra ico’ qaica ca lraqa’ ra ỹapac ra napaxagueetega ana la Biblia. Navela ca shiỹaxaua ra ime’eguet na n’onataxanaxacpi qo’ nhuenaxanaguec, nache «’enauac ne’enapi ỹapolec da n’aqtac, nachi sa ishit da ỹauo’o ca alaỹaxac» ra lpi’iỹaxac (Marcos 4:19). ¡Sa ishet ra nache ’eetec ra arcuennataxa! Ana la Biblia ʼenapec: «Qaq de’eda achaalataxac mayi chochaq tateec, damayi nachida da naigui da ’am qaỹauatton, ’am Dios mayi nachi’amta qataq ’am ’eesa, qataq na ’ai’alec Jesucristo» (Juan 17:3). Saq aushet ra ’avi’  que’eca qaỹaxataguet Nmataqa’ ra sa ishet ra anapaxaguena nam ’eetapeguec ñi Dios taq so Jesús.

Acuennate so Moisés, lauo’l’ec co’ollaq so nta’a ye Egipto. So maye ishetaxa ra qaategue na nsallaxa, qo’ ishetaxa ra qaỹauatton ra lta’araic taq huo’o ra ’enec. Qalaq «da somayi ipacapega da nque’ejnaxaua qanqoỹin som lalamaxatpi ñi Dios, qaq sa ishit da cada’ac da taigui da tonaxac souaxat da nqopitaxanaqtaic da ñi’itaxaloxo». ¿Táen’co? Cha’aye «somayi ỹataqta quetelec da lhuennataxac, ’eeta’am da ỹataqta iloto’ot ñi Dios mayi saq cha’a» (Hebreos 11:24, 25, 27). So maye ỹapac ỹaguec ra lpi’iỹaxac ñi Dios. Ỹauaxañi ra ’eetapeguec ñi Dios, qaq ra lyaxa ra ’eetapeguec so maye sa ishet ra ỹo’ot, nache Ñi Dios ỹanem ra lqouagaxanaqtaic. Ra ’am au’o’ot ra ’ena’am so maye, ñi Dios taqa’en ’am ỹanem ra lqouagaxanaqtaic.

So Satanás ra nmitaique ca lataxac ra ’am loxonec. Qaq ’am sa ishet ra ’am noxona. Ana la Biblia qomi’ ỹamaxaleguete: «Qanachaachiỹa’aguet so shiỹaxaua lma’na. Qaq somayi dataueguesopa qami’» (Santiago 4:7). ¿Ca ’eetec ra ishet ra qanachaachiỹa’aguet so Diablo?

Sa ishet ra axañe ra anapaxaguena ana la Biblia. ’Am au’o’ot sa ishet ra raqat na na’aq ra autaxaỹaxan ana la Biblia. Anapaxaguena na ’am qaỹapaxagueteguec. Ỹataqta au’o’ot ye nqataxac. Ra au’o’ot ye, ishet ra «qai’añiiñi qome ’enauac na npaqtaxanaxatpi mayi ỹan ñi Dios», nache ishet ra qanachaachiỹa’aguet so Satanás (Efesios 6:13).

Aua’a ca laponaxaqui na pi’iỹaxaicpi ’eesa. Aualegoigui na shiỹaxauapi na itaxaỹaxan, napaxaguena taq na ỹalaxaguet na L’aqtac ñi Dios. Na mayepi ’am itauan ra inquiguec ra arpi’iỹaxac, ra lliquiaxac na mayepi taỹa’a ne’ena nqataxac: «Qataq qomi’ no’on da ñi ’oonolec ipacapegue’ ca lỹa da ñaq huo’o naq’en da lsoxoyic, qataq da i’ot ca ỹaỹamaqchiguiñi. [...] Chaqdata da ñi ’oonolec i’añaqchittac ca lỹa» (Hebreos 10:24, 25).

Anquigot ñi Jehová. Aquigui’ot ñi maye ra anatamenot taq api’iỹa’a ñi maye. Ñi Jehová yoqta huotaique ra qomi’ itauan, sa ­ishet ra acouai ye. «Ỹataqta qaumachiỹo’ot ñi Dios, cha’ayi ñimayi ỹataqta qami’ ỹoqocha’alo» (1 Pedro 5:6, 7). Ñi Dios «sa ishit da qami’ ỹashiitema ca qañi’iguenataguiiqui da huo’otaq sa qanaloỹiguet. Chaqdata da huo’otaq nvi’ ca qañi’iguenataguiiqui, nachi ñimayi ỹauo’o ca lliguec, yaqto’ qami’ ishit da qadaloỹa’aguet» (1 Corintios 10:13).

So Satanás nachaachiỹa’aguet ñi Dios ’enapec ra l’aqtac qaica ca sanalo’oguet ra qanachaachiỹa’aguet ra huo’o ca qaỹiguen ra ỹalaxaguet ñi Dios. Qaq ’am aushet ra aua­chaxanapec so Satanás tenataxanaxaic. Ñi Dios ’enapec: «’Am ỹalcolec huo’o ra naỹajnec, nache da ñitonaxac ra lquiyaqte, yaqto aỹem ishet ra ỹasateguet so npa’axaguena­xaic» (Proverbios 27:11, NM). ¡’Am ishet ra auachaxanapec ra huo’o ra arpi’iỹaxac ’eesa!