RA NPI’IỸAXAC ra ỹataqta ’eesa naigui ra sa ishet ra ndotec ra auamaqteetac ñi Dios. Qalota na shiỹaxauapi ’enapec ỹamaqteetac ñi Dios qaq ỹo’otaq ra qauem. Ỹoqo’oye ra lpi’iỹaxac, ’ena’am aca plaata saq ’eesa, cha’aye qaica ca naigui; ico’ ’eesa ra ameten qaq qaica ca naigui. Qo’oye, ¿négue’t ra npi’iỹaxac ra ỹataqta ra ’eesa?

Ana la Biblia qomi’ ỹachaxanalo ra naỹajnec ’eesa nache ỹahuo’o ye ỹo’ot ra qarpi’iỹa­xac ỹataqta ’eesa. ’Enauac na nerguishecpi lamaxasoxonaxac ñi Dios qomi’ ’enapega ra ’eesa ñi Dios nache ishet ra sauattonac. Qomi’ ỹachaxanalo na nanettañe, ra ’eetapeguec taq lapaxaguenataxanaxac. Qo’oye huo’o na lapaxaguenataxanaxac ’eeta’:

• Ñi Dios ’oonolec ñi Maye. Qaica ca ’ena’am.

• So Jesús sa ishet ra Dios qaica ca saỹaqalanapec; so maye lamaxashec ñi Dios.

• Ñi Dios saỹaỹamaxaren ra anatamenot na nqolacpi.

• Nayeetauo ye laloqo’ ra nmit na shiỹaxauapi.

• Na ileupi qancaalaxateec qome que’eca Mataqa’.

Na npi’iỹaxac ỹataqta ’eesa qomi’ ỹavega ra so’otaq ca no’on. Re’era qar’onataxanaxac ỹaỹamaxareeta ñi Dios. Taq’en qomi’ itauan taq ca qaria. Ina na laỹipi ’eeta’:

• Qaỹi’oxoren ñi Dios.

• Qaỹo’ot ca ỹaỹamaxareeta ñi Dios taq qai’enaxat ra lauotaxanaqtaic ñi maye.

• Qanqat ra qauem ncuennataxa taq ra qanshiitaique ca machaqca.

• Qansallaxaune ra npi’iỹaxac ñi Dios, nai’ctaxa ra huo’o ca souaqaigui.

• Qaỹapaxaguen ca shiỹaxaua ra ’eetapeguec ñi Dios.

Siquiguio’otaq ra qomi’ itauan ñi Dios: So lamaxashec Moisés iquiguio’ot ñi Dios: «Aỹem auachaxanapec ca ỹataqta ’eesa nqa’aic ra ’am qaỹauatton, nache ’am aua­ỹamaxareta na so’otaqpi». a Ñi Dios naxaỹaxana so iquictaique so Moisés. Ra lpi’iỹaxac so maye qaỹaloqnaxa ra shenaxatac taqa’en. Ñi Dios itauan qomi’ ra so’otaq ca ỹataqta ’eesa qarpi’iỹaxac.

So’otaq ca qardaqa ra ñapaxaguenaxa ana la Biblia. Ana la Biblia ỹalectauo na lerguishe so Moisés, na Salmos taq na Evangelios. Na nerguishecpi aye qaỹenaxat na ỹotta’a’t na n’aqtacpi qataq hueto’ot na shiỹaxauapi ana a’lhua. ¿’Am huo’o ca ana Biblia?

Qaỹo’ot na huetalec ana la Biblia. Ra npi’iỹaxac nache ’ena’am na nañaxaqui, ra huotaique na maye ra ñaxatec, nache iuen ra n’añaxat. Ra seqatactegue ra lqataxac ñi Dios nache nquiguec ra qarpi’iỹaxac nache no’on ra qarataxac. Nagui ana la Biblia qalota masheye na shiỹaxauapi itauan ra ỹaỹamaxajñe ra lataxac. Yeua lỹa paxaguenaxat qaỹachaxanapec ra huo’o na qaỹaloqnaxanapi.